ନୂଆଦିଲ୍ଲୀ: ହିଣ୍ଡେନବର୍ଗର ରିପୋର୍ଟ ପରେ ବିରୋଧୀ ଦଳ କଂଗ୍ରେସ ଏବେ ବଜାର ନିୟାମକ ସେବିର ମୁଖ୍ୟ ମାଧବୀ ବୁଚ୍‌ଙ୍କ ଇସ୍ତଫା ଏବଂ ଆଦାନୀ ଗ୍ରୁପ ସଂପର୍କିତ ମାମଲାରେ ମିଳିତ ସଂସଦୀୟ ସମିତି (ଜେପିସି) ଦ୍ବାରା ତଦନ୍ତ କରିବାକୁ ଦାବି କରୁଛି । ଆଉ ଏବେ ଏହି ଦାବିକୁ ନେଇ କଂଗ୍ରେସ ରାଜରାସ୍ତାରେ ଗର୍ଜନ କରିବ । ଅଗଷ୍ଟ ୨୨ରେ ଦେଶବ୍ୟାପୀ ପ୍ରଦର୍ଶନ କରିବ କଂଗ୍ରେସ । ଏନେଇ ଆଜି (ମଙ୍ଗଳବାର) କଂଗ୍ରେସର ସାଧାରଣ ସଂପାଦକ, ରାଜ୍ୟ ପ୍ରଭାରୀ ଏବଂ  ପିସିସି ସଭାପତିଙ୍କ ଏକ ବୈଠକ ପରେ ଦଳର ବରିଷ୍ଠ ନେତା କେସି ବେଣୁଗୋପାଳ ଆନ୍ଦୋଳନ ସଂପର୍କରେ ସୂଚନା ଦେଇଛନ୍ତି  । 

ସେ କହିଛନ୍ତି ଯେ, ଆଜି କଂଗ୍ରେସ ଅଧ୍ୟକ୍ଷ ମଲ୍ଲିକାର୍ଜୁନ ଖଡ଼ଗେ ଦଳର ସାଧାରଣ ସଂପାଦକ, ରାଜ୍ୟ ପ୍ରଭାରୀ ଏବଂ  ପିସିସି ସଭାପତିଙ୍କ ଏକ ବୈଠକ ଡାକିଥିଲେ । ବୈଠକରେ ୫୮ ନେତା ସାମିଲ ହୋଇଥବା ବେଳେ ୩୮ ଜଣ ଭଲ ପରାମର୍ଶ ଦେଇଥିଲେ । ଆଦାନୀ ଏବଂ ସେବି ଦୁର୍ନୀତି ସଂପର୍କରେ ଚର୍ଚ୍ଚା ହେଲା । କେସି ବେଣୁଗୋପାଳ ଆହୁରି କହିଛନ୍ତି ଯେ, ଅଗଷ୍ଟ ୨୨ରେ ଦେଶବ୍ୟାପୀ ଆନ୍ଦୋଳନ କରିବାକୁ ନିଷ୍ପତ୍ତି ହୋଇଛି । 

ଦୁଇଟି ଦାବିକୁ ନେଇ ଏହି ଆନ୍ଦୋଳନ କରାଯିବ । ସେବି ପ୍ରମୁଖଙ୍କ ଇସ୍ତଫା ଏବଂ ଆଦାନୀ ଗ୍ରୁପର ଦୁର୍ନୀତି ସଂପର୍କରେ ତଦନ୍ତ ପାଇଁ ଜେପିସି ଗଠନ ଲାଗି ଦାବି ରଖାଯିବ ବୋଲି କେସି ବେଣୁଗୋପାଳ କହିଛନ୍ତି । ଏହା ବ୍ୟତୀତ ଓ୍ବାୟନାଡ ଭୂସ୍ଖଳନକୁ ଜାତୀୟ ବିପତ୍ତି ଘୋଷଣା କରିବା ଏବଂ ଦେଶରେ ଜାତିଗତ ଗଣନା ପ୍ରସଙ୍ଗରେ ବୈଠକରେ ଆଲୋଚନା ହୋଇଥିବା ନେଇ ସେ କହିଛନ୍ତି ।