କାଠମାଣ୍ଡୁ,୧୨/୫: ପୁଣି ଏଭରେଷ୍ଟ ଶିଖରରେ ନେପାଳି ସେର୍ପା କାମି ରିତା । ୨୯ ଥର ପାଇଁ ଗିରିଶୃଙ୍ଗ ଏଭରେଷ୍ଟ ଶିଖର ଛୁଇଁ ପୁଣି ନିଜ ରେକର୍ଡ ନିଜେ ଭାଙ୍ଗିଛନ୍ତି । ୫୬ ବର୍ଷୀୟ ପର୍ବତାରୋହୀ ସେର୍ପା ଗତ ବର୍ଷ ୮୮୪୮.୮୬ ମିଟର ପର୍ବତ ଉଚ୍ଚକୁ ୨ ଥର ଚଢି ୨୮ ଥର ରେକର୍ଡ କରିଥିଲେ । ଏଥର ମଧ୍ୟ ଦୁଇଥର ପର୍ବତ ଶିଖରକୁ ଛୁଇଁବାକୁ ଯୋଜନା କରିଥିବା ସୂଚନା ଦେଇଛନ୍ତି ।

ପର୍ଯ୍ୟଟନ ବିଭାଗର ଜଣେ ଅଧିକାରୀଙ୍କ କହିବାନୁଯାୟୀ, ପର୍ବତାରୋହୀ ସେର୍ପା ରବିବାର ଦିନ ୭ଟା ୨୫ରେ ଏଭରେଷ୍ଟର ଶିଖରରେ ପହଞ୍ଚିଥିଲେ ।  'ସେଭେନ ସମିତି ଟ୍ରେକ୍' ଦ୍ୱାରା ଆୟୋଜିତ ଏକ ଅଭିଯାନର ମାର୍ଗଦର୍ଶକ ସାଜିଥିବା ବେଳେ ସେ ୨୯ ଥର ପାଇଁ ଏହି ପର୍ବତ ଶିଖରରେ ପହଞ୍ଚି ରେକର୍ଡ କରିଛନ୍ତି । ଏଥିପାଇଁ ତାଙ୍କ ପାଇଁ ସବୁଆଡୁ ଶୁଭେଚ୍ଛାର ସୁଅ ଛୁଟୁଛି । ତେବେ  ଏନେଇ ସେଭେନ ସମିତି ଟ୍ରେକ୍ ଇନଷ୍ଟାଗ୍ରାମରେ ଏକ ଫଟୋ ସେୟାର କରି ସୂଚନା ଦେଇଥିଲା । ଏଭରେଷ୍ଟ ଗିରିଶୃଙ୍ଗ ଚଢିବାର ୭୧ ବର୍ଷ ଇତିହାସରେ କାମି ରିତା ବିଶ୍ବରେ ସର୍ବାଧିକ ଥର ପର୍ବତ ଶିଖରରେ ପହଞ୍ଚିବାର ରେକର୍ଡ କରିଛନ୍ତି ।

ପ୍ରକାଶ ଥାଉକି, ୧୯୯୪ ମସିହାରୁ କ୍ରମାଗତ ଭାବେ ଏଭରେଷ୍ଟ ଆରୋହଣ କରି ଆସୁଛନ୍ତି ସେର୍ପା କାମି ରିତା । ସେହିପରି ସୋଲୁଖୁମ୍ବୁର ଅନ୍ୟ ଜଣେ ପର୍ବତାରୋହୀ ପ୍ରସଙ୍ଗ ଡାୱା ସେର୍ପା ଗତ ବର୍ଷ ୨୭ ଥର ପାଇଁ ଏଭରେଷ୍ଟ ଚଢିଥିଲେ । କିନ୍ତୁ ସେ ଚଳିତ ସିଜନରେ ପୁନର୍ବାର ପର୍ବତ ଚଢିବେ ନା ନାହିଁ ସେନେଇ କିଛି ସ୍ପଷ୍ଟ ସୂଚନା ହସ୍ତଗତ ହୋଇନାହିଁ ।