ଜୟପୁରୁ,୨୯/୦୩: ପାଠ ପଢାରେ ମନ ଦେବା ପାଇଁ ବାପା ଓ ମା’ ମାନେ ସେମାନଙ୍କ ପିଲାମାନଙ୍କୁ ଖେଳରୁ ଦୂରେଇ ରହିବାକୁ ପରାମର୍ଶ ଦେଇଥାନ୍ତି । ମାତ୍ର ଦକ୍ଷିଣ ଆଫ୍ରିକାର ଯୁବ ପେସ୍ ବୋଲର ନାନ୍ଦ୍ରେ ବର୍ଗରଙ୍କ ପକ୍ଷରେ ଏହା ସମ୍ପୂର୍ଣ୍ଣ ଓଲଟା । ସେ ସମ୍ପ୍ରତି ବିଶ୍ୱର କିଛି ଚର୍ଚ୍ଚିତ ଯୁବ ଖେଳାଳିମାନଙ୍କ ମଧ୍ୟରେ ଅନ୍ୟତମ । ମାତ୍ର କ୍ରିକେଟ୍କୁ କ୍ୟାରିୟର ରୂପେ ଗ୍ରହଣ କରିବାକୁ ସେ ଚାହିଁ ନଥିଲେ । ବରଂ ପାଠ ପଢିବା ପାଇଁ କ୍ରିକେଟ୍ ଖେଳିବାକୁ ବାଧ୍ୟ ହୋଇଥିଲେ । ମାତ୍ର ୪ ବର୍ଷ ମଧ୍ୟରେ ସେ ଦକ୍ଷିଣ ଆଫ୍ରିକା ପକ୍ଷରୁ ଟେଷ୍ଟ ପଦାର୍ପଣ କରିବାକୁ ସୁଯୋଗ ପାଇଛନ୍ତି । ବର୍ତ୍ତମାନ ସେ ରାଜସ୍ଥାନ ରୟାଲ୍ସ ପକ୍ଷରୁ ଆଇପିଏଲ୍ ଖେଳୁଛନ୍ତି ।
ଦକ୍ଷିଣ ଆଫ୍ରିକାର ଏହି ଯୁବ ପେସ୍ ବୋଲର ୧୫ବର୍ଷ ବୟସରେ ଦକ୍ଷିଣ ଆଫ୍ରିକାର ଜଣେ ଉଦୀୟମାନ ଟେନିସ୍ ଖେଳାଳି ଭାବେ ପରିଚୟ ହାସଲ କରିଥିଲେ । ୧୭ବର୍ଷ ବୟସ ବେଳକୁ ସେ ଦକ୍ଷିଣ ଆଫ୍ରିକା ଜାତୀୟ ସ୍କ୍ୱାଶ ଚାମ୍ପିଅନ୍ସିପ୍ର ଷ୍ଟାର୍ ଖେଳାଳି ଭାବେ ଚର୍ଚ୍ଚାକୁ ଆସିଥିଲେ । ମାତ୍ର ଆହତ ସମସ୍ୟା ଯୋଗୁଁ ତାଙ୍କୁ ଖେଳ ଛାଡ଼ିବାକୁ ପଡ଼ିଥିଲା । ସେତେବେଳକୁ ସେ କ୍ରିକେଟ୍ ପ୍ରତି ଆକର୍ଷିତ ହୋଇ ନଥିଲେ ହେଁ ପରିବାର ଓ ପଡ଼ୋଶୀଙ୍କ ସହ କ୍ରିକେଟ୍ ଖେଳୁଥିଲେ ।
ୱିଟ୍ୱାଟରସ୍ୟାଣ୍ଡ(ୱିଟ୍ସ) ୟୁନିଭରସିଟି ପକ୍ଷରୁ କ୍ରିକେଟ୍ ଖେଳାଳିଙ୍କ ପାଇଁ ଛାତ୍ରବୃତ୍ତି ପ୍ରଦାନ କରାଯାଉଥିଲା । କ୍ରିକେଟ୍ ଖେଳୁଥିବା ପିଲାମାନଙ୍କୁ ମାଗଣାରେ ଉକ୍ତ ବିଶ୍ୱବିଦ୍ୟାଳୟରେ ପଢିବାକୁ ସୁଯୋଗ ମିଳୁଥିଲା । ସେ ମନୋବିଜ୍ଞାନରେ କ୍ୟାରିୟର କରିବାକୁ ଚାହୁଁଥିଲେ । ଫଳ ସ୍ୱରୂପ ସେ ୨୦୧୪ରେ ଉକ୍ତ ବିଶ୍ୱ୍ବିଦ୍ୟାଳୟରେ ପାଠ ପଢିବା ପାଇଁ କ୍ରିକେଟ୍ ଟ୍ରାଏଲରେ ଭାଗ ନେଇଥିଲେ । ତାଙ୍କ ବୋଲିଂ ଦେଖି ଉକ୍ତ ବିଶ୍ୱବିଦ୍ୟାଳୟର କୋଚ୍ ନିଲ୍ ଲିଭନେସନ ଉତ୍ସାହିତ ହୋଇଯାଇଥିଲେ । ତାଙ୍କୁ ଜଣେ ଦକ୍ଷ ପେସ ବୋଲର ଭାବେ ଗଢିବା ପାଇଁ ସେ ମନସ୍ଥ କରିଥିଲେ ।
ନିଲଙ୍କ କଥା ଶୁଣି ବର୍ଗର ପ୍ରଥମେ ହସିଥିଲେ । ଅନ୍ତର୍ଜାତୀୟ ସ୍ତରରେ ପେସ୍ ବୋଲରମାନେ ଘଣ୍ଟା ପ୍ରତି ୧୪୫ କିଲୋ ମିଟର ବେଗରେ ବଲ୍ ପକାଉଥିବା ବେଳେ ୧୨୫କିଲୋ ମିଟର ବେଗରେ ବଲ୍ ପକାଇଥିବା ବୋଲର ଅନ୍ତର୍ଜାତୀୟ କ୍ରିକେଟ୍ ଖେଳିପାରିବା ସମ୍ଭବ ହେବ ନାହିଁ ବୋଲି ସେ ଭାବିଥିଲେ । ମାତ୍ର ନିଲଙ୍କ ଠାରୁ ପ୍ରଶିକ୍ଷଣ ନେବା ପରେ ବର୍ଗରଙ୍କ ବେଗରେ ଉନ୍ନତି ହୋଇଥିଲା । ବର୍ତ୍ତମାନ ସେ ଘଣ୍ଟା ପ୍ରତି ୧୫୦କିଲୋ ମିଟର ବେଗରେ ବଲ ପକାଉଛନ୍ତି ।
ଗତ ଡିସେମ୍ବରରେ ଭାରତ ବିପକ୍ଷ ତୃତୀୟ ଟି-ଟ୍ୱେଣ୍ଟି ଜରିଆରେ ସେ ଅନ୍ତର୍ଜାତୀୟ ପଦାର୍ପଣ କରିଥିଲେ । ପରେ ପରେ ତାଙ୍କୁ ଟେଷ୍ଟ ପଦାର୍ପଣ ସୁଯୋଗ ମିଳିଥିଲା । ବର୍ତ୍ତମାନ ସେ ଦକ୍ଷିଣ ଆଫ୍ରିକା ପକ୍ଷରୁ ୩ଟି ଯାକ ଫର୍ମାଟ୍ ଖେଳୁଛନ୍ତି ।
