ନୂଆଦିଲ୍ଲୀ: ଗତ କିଛି ଦିନ ହେବ ବିହାରରେ ରାଜନୈତିକ ଅସ୍ଥିରତା ଜାରି ରହିଛି । ଖବର ମୁତାବକ ସିଏମ ନୀତୀଶ କୁମାର ପୁଣି ଥରେ ମହାଗଠବନ୍ଧନ ଛାଡି ଏନଡିଏରେ ଯୋଗ ଦେବେ । ଏସବୁ ମଧ୍ୟରେ ‘ଇଣ୍ଡିଆ’ ମିଳିତ ମଞ୍ଚର ଅନ୍ୟତମ ପ୍ରମୁଖ ଦଳ କଂଗ୍ରେସ ସଭାପତି ମଲ୍ଲିକାର୍ଜୁନ ଖଡଗେ ବିହାରର ନୂତନ ରାଜନୈତିକ ସମୀକରଣ ଉପରେ ନିଜର ପ୍ରତିକ୍ରିୟା ଦେଇଛନ୍ତି।

କଂଗ୍ରେସ ସଭାପତି ମଲ୍ଲିକାର୍ଜୁନ ଖଡଗେ କହିଛନ୍ତି ଯେ, ନୀତୀଶ କୁମାରଙ୍କ ମନରେ କଣ ଚାଲିଛି ସେ ଜାଣି ପାରୁନାହାଁନ୍ତି । ସେ ଆହୁରି ମଧ୍ୟ କହିଛନ୍ତି ଯେ ଜନତା ଦଳ (ୟୁନାଇଟେଡ୍) ଗଠବନ୍ଧନ ଛାଡ଼ିବା ବିଷୟରେ ତାଙ୍କ ପାଖରେ କୌଣସି ସୂଚନା ନାହିଁ । ମୁଁ ତାଙ୍କୁ ଏକ ଚିଠି ଲେଖିଛି । ତାଙ୍କ ସହ କଥା ହେବାକୁ ଚେଷ୍ଟା କଲି, କିନ୍ତୁ ନୀତୀଶ କୁମାରଙ୍କ ମନରେ କ’ଣ ଚାଲିଛି ତାହା ଜଣାପଡୁନାହିଁ । 

 ସେ ଆହୁରି ମଧ୍ୟ କହିଛନ୍ତି ମୁଁ ଆସନ୍ତାକାଲି ଦିଲ୍ଲୀ ଯିବି ଏବଂ ସମ୍ପୂର୍ଣ୍ଣ ସୂଚନା ନେବି । ତାପରେ କଣ ହେବ ଦେଖିବା । ଆମେ ଜାଣି ନାହୁଁ ଯେ ନୀତୀଶ ଇସ୍ତଫା ଦେବେ। ରାଜ୍ୟପାଳଙ୍କ ସହ ସାକ୍ଷାତ ବିଷୟରେ ସେ ଆମକୁ କିଛି କହି ନାହାଁନ୍ତି । 

ସୂଚନାଥାଉକି, ବିହାରରେ ଚାଲିଥିବା ରାଜନୈତିକ ଅସ୍ଥିରତା ମଧ୍ୟରେ ସିଏମ୍ ନୀତୀଶ କୁମାର ବକ୍ସର ବ୍ରହ୍ମପୁରରେ ବିକାଶ କାର୍ଯ୍ୟର ଦ୍ୱିତୀୟ ପର୍ଯ୍ୟାୟର ମୂଳଦୁଆ ପକାଇବା ପାଇଁ ଶ୍ରୀ ବାବା ବ୍ରହ୍ମଶ୍ୱରନାଥ ଧାମରେ ପହଞ୍ଚିଥିଲେ । ଏଠାରେ ଅଶ୍ୱିନୀ ଚୌବେଙ୍କ ସହ ନୀତୀଶ କୁମାରଙ୍କ ଘନିଷ୍ଠତା ଅନେକ କଥା କହୁଛି ।  ଅଶ୍ୱିନୀ ଚୌବେ ଖୋଲାଖୋଲି ଭାବେ କିଛି କହି ନାହାଁନ୍ତି, କିନ୍ତୁ ନୀତୀଶ କୁମାର ଏନଡିଏରେ ପ୍ରବେଶ କରିବାକୁ ଯାଉଛନ୍ତି ବୋଲି ସୂଚିତ କରିଛନ୍ତି ।