ନୂଆଦିଲ୍ଲୀ,୮।୬:  ନରେନ୍ଦ୍ର ମୋଦି ରବିବାର ଭାରତର ପ୍ରଧାନମନ୍ତ୍ରୀ ଭାବରେ ଲଗାତାର ତୃତୀୟ ଥର ଶପଥ ନେବାକୁ ଯାଉଛନ୍ତି। ତାଙ୍କ ସହ ନୂଆ ଭାବରେ ଗଠିତ କେନ୍ଦ୍ର ମନ୍ତ୍ରୀ ପରିଷଦର ସଦସ୍ୟ ମଧ୍ୟ ପଦ ଓ ଗୋପନୀୟତାର ଶପଥ ନେବେ। ଜେଡିୟୁ ନେତା ନୀତୀଶ କୁମାର ଓ ଟିଡିପି ମୁଖ୍ୟ ଚନ୍ଦ୍ରବାବୁ ନାଇଡୁ ଶୁକ୍ରବାର ହୋଇଥିବା ବୈଠକରେ ଏନ୍‌ଡିଏ ସଂସଦୀୟ ଦଳ ଓ ଲୋକସଭାର ନେତା ରୂପରେ ମୋଦିଙ୍କ ନାଁ ଉପରେ ମୋହର ଲଗାଇଛନ୍ତି। ତେବେ ଲୋକସଭା ନିର୍ବାଚନ ୨୦୨୪ ଫଳାଫଳ ଆସିବା ପରେ ଯେତେବେଳେ ଦେଶର ଜନତା କୌଣସି ଦଳକୁ ସ୍ପଷ୍ଟ ବହୁମତ ଦେଇ ନାହାନ୍ତି, ସେଭଳି ସ୍ଥିତିରେ ବିରୋଧି ମେଣ୍ଟ ଇଣ୍ଡିଆ କେନ୍ଦ୍ରରେ ସରକାର ଗଠନ କରିବାକୁ ଯୋରଦାର ଚେଷ୍ଟା କରିଥିଲା। ଏହାର ଖୁଲାସା ଜେଡିୟୁର ବରିଷ୍ଠ ନେତା କେସି ତ୍ୟାଗି ଏକ ଇଣ୍ଟରଭ୍ୟୁରେ କରିଛନ୍ତି।

ଇଣ୍ଡିଆ ବ୍ଲକ୍ ପକ୍ଷରୁ କେନ୍ଦ୍ର ସରକାର ଗଠନ କରିବାର ଚେଷ୍ଟା  କରାଯାଇଥିଲା କି? ଏଭଳି ପ୍ରଶ୍ନର ଉତ୍ତରରେ ତ୍ୟାଗି କହିଛନ୍ତି, ଆମ ନେତା ନୀତୀଶ କୁମାର କୌଣସି ଏଭଳି ଅଫରକୁ ସମ୍ପୂର୍ଣ୍ଣ ଭାବରେ ପ୍ରତ୍ୟାଖାନା କରିଥିଲେ। ଏପରିକି ନୀତୀଶଙ୍କୁ ପ୍ରଧାନମନ୍ତ୍ରୀ ହେବାକୁ ମଧ୍ୟ ଅଫର ଦିଆଯାଇଥିଲା। ଯେଉଁ ଲୋକମାନେ ନୀତୀଶଙ୍କୁ ଇଣ୍ଡିଆର ସଂଯୋଜକ ହେବାକୁ ମନା କରିଦେଇଥିଲେ ସେମାନେ ଏଭଳି ଅଫର ଦେଇଥିଲେ। ହେଲେ ନୀତୀଶ ଏହାକୁ ଗ୍ରହଣ କରିନଥିଲେ। ଆମେ କଂଗ୍ରେସ ପାର୍ଟିର ରାଜନୀତିକୁ ଶେଷ କରିଛୁ। ଅଖିଳେଶ ଯାଦବ, ଅରବିନ୍ଦ କେଜ୍ରିଓ୍ବାଲ, ମମତା ବାନାର୍ଜୀ... ଏମାନେ କଂଗ୍ରେସ ସହ ମଞ୍ଚରେ ଏକାଠି ହେବାକୁ ପ୍ରସ୍ତୁତ ନଥିଲେ।’

ତ୍ୟାଗି କହିଛନ୍ତି,   ଯେଉଁଭଳି ଭାବରେ ବ୍ୟବହାର ଆମ ନେତା ଓ ଦଳ ସହ ହେଲା ତାହାର ଫଳ ହେଉଛି ଆମେ ଇଣ୍ଡି ମେଣ୍ଟର ବାହାରକୁ ଆସି ଏନ୍‌ଡିଏରେ ଯୋଗ ଦେଲୁ। କେଉଁମାନେ ଏହି ଅଫର ଦେଇଥିଲେ ? ଏହାର ଉତ୍ତର  ଦେଇ କେସି ତ୍ୟାଗି କହିଛନ୍ତି, ରାଜନୀତିରେ କାହାର ନା ନେବା ଠିକ୍ ନୁହେଁ। ତେବେ ଆମେ ନରେନ୍ଦ୍ର ମୋଦିଙ୍କ ନେତୃତ୍ବରେ ଏନ୍‌ଡିଏକୁ ମଜବୁତ କରିବୁ।’