ଭୁବନେଶ୍ୱର,୦୪/୦୮: ରାଜ୍ୟରେ  ବେଆଇନ ଭାବେ ଗଢ଼ି ଉଠିଥିବା ନର୍ସିଂ କଲେଜ ଉପରେ କଡ଼ା କାର୍ଯ୍ୟାନୁଷ୍ଠାନ ନିଆଯାଇଛି ।  ଏଭଳି ୧୪୭ଟି ନର୍ସିଂ କଲେଜର ଏନ୍‌ଓସି ରବ୍ଦ କରିଛନ୍ତି ଡିଏମ୍‌ଇଟି । 

ଇଣ୍ଡିଆନ୍‌ ନର୍ସିଂ କାଉନସିଲ୍‌  ଗାଇଡ୍‌ଲାଇନ୍‌ ଅନୁଯାୟୀ ଏହି ୧୪୭ଟି କଲେଜ  ଆବଶ୍ୟକ କାଗଜପତ୍ର ଦାଖଲ କରିପାରି ନଥିଲେ ।  ତେଣୁ ଏଭଳି କାର୍ଯ୍ୟାନୁଷ୍ଠାନ ଗ୍ରହଣ କରାଯାଇଛି । ତେବେ କଲେଜ ଉପରେ ଏହି କାର୍ଯ୍ୟାନୁଷ୍ଠାନ ଦ୍ୱାରା ନର୍ସିଂ ପଢୁଥିବା ଛାତ୍ରଛାତ୍ରୀଙ୍କ ପାଇଁ କୌଣସି  ସମସ୍ୟା ହେବନାହିଁ ବୋଲି କହିଛନ୍ତି ଡିଏମ୍‌ଇଟି  ପ୍ରଫେସର ସନ୍ତୋଷ କୁମାର ମିଶ୍ର । ଏକାଥରକେ ଏତେ ସଂଖ୍ୟାରେ ନର୍ସିଂ କଲେଜର ଏନ୍‌ଓସି ରବ୍ଦ କରିବା ଘଟଣା ରାଜ୍ୟରେ ପ୍ରଥମ ।  

ଇଣ୍ଡିଆନ୍‌ ନର୍ସିଂ କାଉନସିଲ୍‌ ନିୟମ ଅନୁଯାୟୀ  ନର୍ସିଂ କଲେଜ ଜନବସତି ଅଞ୍ଚଳରେ ହୋଇପାରିବ ନାହିଁ । ନର୍ସିଂ କଲେଜ ନିଜସ୍ୱ ଜାଗାରେ ହୋଇଥିବା ଦରକାର । ଅଗ୍ନି ନିରାପତ୍ତା ବ୍ୟବସ୍ଥା ସହ ସ୍ଥାୟୀ  ଅଧ୍ୟାପକ, ଅଧ୍ୟକ୍ଷ ଥିବା ବାଧ୍ୟତାମୂଳକ । ହେଲେ  କେତେକ କଲେଜ ଏହାର ଖିଲାପ କରିଛନ୍ତି । ବାଲେଶ୍ୱର କଲେଜ ଅଫ୍‌ ନର୍ସିଂରେ ଅଗ୍ନି ନିରାପତ୍ତା  ବ୍ୟବସ୍ଥା ନାହିଁ । ସେହିପରି ମୟୂରଭଞ୍ଜ ଜିଲ୍ଲାରେ  ମୋଟ ୧୪ଟି ନର୍ସିଂ କଲେଜର ଏନ୍‌ଓସି ବାତିଲ କରାଯାଇଛି ।