ଭୁବନେଶ୍ୱର,୨୨/୦୯: ଜୁଲାଇ ମାସରେ ଦେଶରେ ମୋବାଇଲ ଉପଭୋକ୍ତା ସଂଖ୍ୟା ହ୍ରାସ ପାଇଛି । ସମାନ ସମୟରେ ଓଡ଼ିଶା ଯୋଡ଼ିଛି ୨ ଲକ୍ଷରୁ ଊଦ୍ଧ୍ୱର୍ ଉପଭୋକ୍ତା । ଟେଲିକମ୍ ନିୟାମକ ଟ୍ରାଇ ପକ୍ଷରୁ ଜାରି ତଥ୍ୟରୁ ଏହା ଜଣାପଡ଼ିଛି ।
ଟେଲିକମ୍ ସେବା ପ୍ରଦାନକାରୀଙ୍କ ଦ୍ୱାରା ଟାରିଫ୍ ବୃଦ୍ଧି ଯୋଗୁ ଦେଶରେ ଉପଭୋକ୍ତା ସଂଖ୍ୟା ହ୍ରାସ ପାଇଥିବା ଜଣାପଡ଼ିଛି । ଆଲୋଚ୍ୟ ମାସରେ ଦେଶରେ ମୋବାଇଲ ଫୋନ୍ ଗ୍ରାହକଙ୍କ ସଂଖ୍ୟା ୯.୨୨ ଲକ୍ଷ ହ୍ରାସ ପାଇଛି । ଜୁନ ମାସରେ ଦେଶର ମୋଟ ମୋବାଇଲ ଉପଭୋକ୍ତାଙ୍କ ସଂଖ୍ୟା ୧୧୭ କୋଟି ୫ ଲକ୍ଷ ୨୮ ହଜାର ଥିବାବେଳେ ଜୁଲାଇରେ ଏହା ୧୧୬ କୋଟି ୯୬ ଲକ୍ଷ ୫୯୩୨କୁ ଖସିଆସିଛି ।
ବଡ଼ ବଡ଼ ସେବା ପ୍ରଦାନକାରୀଙ୍କ ଟାରିଫ୍ ବୃଦ୍ଧି ମଧ୍ୟରେ ରାଷ୍ଟ୍ରାୟତ୍ତ ବିଏସ୍ଏନ୍ଏଲ୍ ଜୁଲାଇ ମାସରେ ୨୯ ଲକ୍ଷ ୩୧ ହଜାର ୯୭୧ ମୋବାଇଲ ଉପଭୋକ୍ତା ଯୋଡ଼ିଥିବା ଜଣାପଡ଼ିଛି । ଅନ୍ୟପକ୍ଷରେ ଏୟାରଟେଲ, ଭୋଡାଫୋନ ଇଣ୍ଡିଆ ଏବଂ ଜିଓ ଗ୍ରାହକ ହରାଇଛନ୍ତି । ଏୟାରଟେଲ ସର୍ବାଧିକ ଉପଭୋକ୍ତା ହରାଇଛି । ଏହା ୧୬ ଲକ୍ଷ ୯୪ ହଜାର ୩୦୦ ଗ୍ରାହକ ହରାଇଥିବାବେଳେ ଭୋଡାଫୋନ ଇଣ୍ଡିଆ ୧୪ ଲକ୍ଷ ୧୩ ହଜାର ୯୧୦ ଏବଂ ଜିଓ ୭ ଲକ୍ଷ ୫୮ ହଜାର ୪୬୩ ଜଣ ମୋବାଇଲ ଫୋନ ଗ୍ରାହକ ହରାଇଛି।
ଅନ୍ୟପକ୍ଷରେ, ଓଡ଼ିଶାରେ ଯୋଡ଼ି ହୋଇଛନ୍ତି ସର୍ବାଧିକ ୨ ଲକ୍ଷ ୫ ହଜାର ୯୩୬ ମୋବାଇଲ ଉପଭୋକ୍ତା । ଜୁଲାଇ ମାସରେ ରାଜ୍ୟରେ ମୋଟ ମୋବାଇଲ ଉପଭୋକ୍ତାଙ୍କ ସଂଖ୍ୟା ୩ କୋଟି ୪୩ ଲକ୍ଷ ୭୭ ହଜାର ୫୫୧ରେ ପହଞ୍ଚିଥିବା ଟ୍ରାଇ ପକ୍ଷରୁ ପ୍ରକାଶିତ ରିପୋର୍ଟରୁ ଜଣାଯାଇଛି । ଜୁନ୍ ମାସରେ ଓଡ଼ିଶାରେ ମୋଟ ମୋବାଇଲ ଫୋନ ଗ୍ରାହକଙ୍କ ସଂଖ୍ୟା ୩ କୋଟି ୪୧ ଲକ୍ଷ ୭୧ ହଜାର ୬୧୫ ରହିଥିଲା । ଓଡ଼ିଶାରେ ଜିଓ ଏବଂ ବିଏସ୍ଏନ୍ଏଲ୍ ଗ୍ରାହକ ଯୋଡ଼ିଥିବାବେଳେ ଏୟାରଟେଲ ଏବଂ ଭୋଡାଫୋନ ଇଣ୍ଡିଆ ଗ୍ରାହକ ହରାଇଛନ୍ତି । ଜିଓ ଓଡ଼ିଶାରେ ୧ ଲକ୍ଷ ୮୪ ହଜାର ୬୫୩ ଗ୍ରାହକ ଯୋଡ଼ିଥିବା ଜଣାପଡ଼ିଛି ।
