- ବିଜେଡିର ‘ଅତୁଟ ଏ ବନ୍ଧନ, ସାଥେ ଅଛନ୍ତି ନବୀନ’,
- ବିଜେପିର ‘କେତେ ଦିନ ସହିବା, ଓଡ଼ିଶାରେ ପରିବର୍ତ୍ତନ ଆଣିବା’,
- ଉନ୍ନତି ନା ଅଧିକାର, ଆସୁଛି କଂଗ୍ରେସ ସରକାର’
ଭୁବନେଶ୍ୱର ୨୮/୪(ରାମଜୀବନ ଗୋଛାୟତ) : ଚଳିତ ନିର୍ବାଚନରେ ଲଢ଼େଇ ଭିନ୍ନ ଭିନ୍ନ ଢଙ୍ଗରେ ଚାଲିଛି । ଆଗଭଳି ଅଧିକ ସଂଖ୍ୟାରେ ବ୍ୟାନର, ପୋଷ୍ଟର୍ରେ ଲଢେଇ ନ ହୋଇ ଏବେ ସୋସିଆଲ୍ ମିଡିଆରେ ଚାଲିଛି ଲଢ଼େଇ । ବିଶେଷ କରି ସୋସିଆଲ୍ ମିଡିଆରେ ନିଜ ଦଳ ସପକ୍ଷରେ ଭଲ ଭଲ ସ୍ଲୋଗାନ୍ ଲେଖି ଛାଡ଼ିବାକୁ ଆରମ୍ଭ ହୋଇଛି ପ୍ରତିଯୋଗିତା । ଏଥିରେ ନିୟୋଜିତ ହୋଇଛନ୍ତି ରାଜ୍ୟର ବିଶିଷ୍ଟ ଲେଖକ ଓ କଥାକାର । ଲୋକଙ୍କୁ ଆକର୍ଷିତ କରିବା ସହିତ ବାନ୍ଧି ପାରିଲା ଭଳି ଧାଡ଼ି ଲେଖିପାରିଲେ ଦଳଗୁଡିକ ଖୁସି ହେବା ସହିତ ସୋସିଆଲ୍ ମିଡିଆରେ ଅଧିକରୁ ଅଧିକ ସେୟାର୍ କରି ଚାଲୁଛନ୍ତି ।
ବିଜେଡିର ସ୍ଲୋଗାନ୍ ରହିଛି ‘ବିକାଶଧାରା ବଜାୟ ରହିବ, ୨୦୩୬ ସୁଦ୍ଧା ଓଡ଼ିଶା ୧ ନମ୍ବର ହେବ’ । ‘ଅତୁଟ ଏ ବନ୍ଧନ, ସାଥେ ଅଛନ୍ତି ନବୀନ’ । ‘ସବୁବେଳେ ସେ ସମସ୍ତଙ୍କର ସାଥୀରେ, ଏଥର ଯୋଡ଼ିଶଙ୍ଖ ବାଜିବ ଘରେ ଘରେ’ । ‘ଶଙ୍ଖ ଚିହ୍ନରେ ଭୋଟ ଦେବା, ନବୀନ ଓଡ଼ିଶା ଗଢ଼ିବା’ । ‘ବିକାଶର ବିରୋଧୀ, ଓଡ଼ିଶାର ବିରୋଧୀ । ‘ବିଜୁ ଜନତା ଦଳ, ପ୍ରତିଟି ଓଡ଼ିଆର ବଳ’ । ‘ଭରସା ବଢୁଛି, ବଳ ବଢୁଛି’ । ‘ଗମନାଗମନ ସେବାରେ ରୂପାନ୍ତର, ବିକାଶ ହେଉଛି ନିରନ୍ତର’ । ‘ଡାବୁଗାଁ ଓ ନବରଙ୍ଗପୁରରେ ଜନସମୁଦ୍ର, ଉଡାଇଛି ବିକାଶ ବିରୋଧୀଙ୍କ ନିଦ’ । ‘ଶଙ୍ଖ ବାଜୁଛି ଘରେ ଘରେ, ଉତ୍ସାହ ଖେଳିଛି ଉମରକୋଟରେ’ । ଏଭଳି ବିଜେଡି ନେତାମାନେ ଭିନ୍ନ ଭିନ୍ନ ସ୍ଲୋଗାନ୍ ଲେଖୁଛନ୍ତି । ସୋସିଆଲ୍ ମିଡିଆରେ ସେୟାର୍ କରିବା ସହିତ ଏଥିରେ କମେଣ୍ଟଗୁଡିକର ଜବାବ ମଧ୍ୟ ରଖୁଛନ୍ତି । ଯାହା ଚଳିତ ନିର୍ବାଚନରେ ଲଢିବାକୁ ଏକ ପ୍ରକାରର ଅସ୍ତ୍ର ସାଜିଛି ।
ସେହିପରି ବିଜେପି ବି ସ୍ଲୋଗାନ୍ ପ୍ରତିଯୋଗିତାରେ ଦମଦାର ଲଢେଇ କରୁଛି । ସାରା ଦେଶରେ ଚାଲିଥିବା ସ୍ଲୋଗାନଗୁଡିକୁ ରାଜ୍ୟ ନେତାମାନେ ବି ଖୁସି ହୋଇ ସେୟାର୍ କରୁଛନ୍ତି । ସେଥି ମଧ୍ୟରୁ ‘ଅବକି ବାର୍, ଚାର୍ ଶୋ ପାର୍’ ବେଶ ଲୋକପ୍ରିୟ ହୋଇପାରିଛି । ଏହା ସହିତ ରାଜ୍ୟ ବିଜେପି ନେତାମାନେ ମାର୍କେଟକୁ ଛାଡୁଥିବା ସ୍ଲୋଗାନ୍ ହେଉଛି- ‘ମୋଦି ସରକାର ଆସିବ, ଓଡ଼ିଶାରୁ ଦୁର୍ନୀତି ହଟିବ’ । ‘ଯୋଡ଼ି ପଦ୍ମ ଫୁଲ, ବହୁତ ଭଲ’ । ‘ଯୋଡ଼ି ଶଙ୍ଖ, ଦେବ ଦାଦନ ଦୁଃଖ’ । ‘ଯୋଡ଼ି ଫୁଲ ଦେବ ବିକାଶ ସୁଖ’ । ‘କେତେ ଦିନ ସହିବା, ଓଡ଼ିଶାରେ ପରିବର୍ତ୍ତନ ଆଣିବା ।
ସ୍ଲୋଗାନ୍ ଦୌଡ଼ରେ ପଛରେ ପଡିନି କଂଗ୍ରେସ । କଂଗ୍ରେସ ନେତା ସେୟାର୍ କରୁଥିବା ସ୍ଲୋଗାନ୍ଗୁଡିକ ମଧ୍ୟରୁ ‘ଏଥର ବିଜେଡି ଯାଉଛି, କଂଗ୍ରେସ ଆସୁଛି’ । ‘ଉନ୍ନତି ନା ଅଧିକାର, ଆସୁଛି କଂଗ୍ରେସ ସରକାର’ । ‘କଂଗ୍ରେସ ଭରସା’ । ‘ନୁହେଁ ଶଙ୍ଖ ଯୋଡ଼ି- ନୁହେଁ ଫୁଲ ଯୋଡ଼ି, ଜଣେ ବାଳୁଙ୍ଗା- ଜଣେ ଅଗାଡି । କଂଗ୍ରେସ କେବଳ ରାଜ୍ୟସ୍ତରରେ ସ୍ଲୋଗାନ ନୁହଁ, ଅଞ୍ଚଳକୁ ନେଇ ବି ସ୍ଲୋଗାନ୍ ଜାରି କରିଛନ୍ତି । ଯେମିତି ‘ଦୁର୍ନୀତି ହଟିବ, ନୀତି ଚାଲିବ । ଭଣ୍ଡାରିପାଖରୀରେ ବିକାଶ ହେବ । ଏଥର ପରିବର୍ତ୍ତନ, ଏଥର ନିରଞ୍ଜନ’ । ‘ଏଥର ନାନୀ ନୁହଁ କି ନନା । ବାଲେଶ୍ୱରରେ କେବଳ ଶ୍ରୀକାନ୍ତ ଜେନା । ‘ଏବେ ନାଇଁ ତ କେଭେ ନାହିଁ । କରେ କଂଗ୍ରେସ, କରେ କୋଶଲ, କରେ କିରିଆ ଖାଉଛେ.. ।
ଦଳଗୁଡିକୁ ବାଦ୍ ଦେବା ପରେ ସାଧାରଣ ଲୋକ ଓ ବିଭିନ୍ନ ସଙ୍ଗଠନ ବି ରାଜନୀତିକୁ ନେଇ ସ୍ଲୋଗାନ୍ ଲେଖିବା ଆରମ୍ଭ କରିଛନ୍ତି । ଯାହା ସୋସିଆଲ୍ ମିଡିଆରେ ବେଶ ଟ୍ରେଣ୍ଡ କରୁଛି । ମିଳିତ ଓଡ଼ିଶା ନିଶା ନିବାରଣ ଅଭିଯାନ ପକ୍ଷରୁ ଜାରି ସ୍ଲୋଗାନ ରହିଛି, ‘ମଦ ବନ୍ଦ କରିବ ଯିଏ, ଆମରି ଭୋଟ୍ ପାଇବ ସିଏ’ । ଏଭଳି କେତେ କ’ଣ ସ୍ଲୋଗାନ୍ ମାର୍କେଟକୁ ଆସିଛି । ତେବେ କେଉଁ ଦଳର ସ୍ଲୋଗାନ୍ କେତେ ଲୋକଙ୍କ ଛୁଉଁଛି, ତାହା ଦେଖିବାକୁ ବାକି ରହିଛି ।