ଭୁବନେଶ୍ୱର,୨୬/୦୫: ସରିଗଲା ତିନି ପର୍ଯ୍ୟାୟ ଲଢ଼େଇ । ୧୫ ଲୋକସଭା, ୧୦୫ ବିଧାନସଭା ପାଇଁ ଭୋଟ ଶେଷ । ଏବେ ଶେଷ ପର୍ଯ୍ୟାୟ ଲଢ଼େଇ ଆସିଗଲା । ଶେଷ ଟକ୍କର ବାକି ଥିବା ୬ ଲୋକସଭା ଓ ୪୨ ବିଧାନସଭା ଆସନ ପାଇଁ । ମୁଖ୍ୟତଃ ଉପକୂଳଗଡ଼କୁ କିଏ ହାତେଇବ, ସେଥିପାଇଁ କସରତ ପୂରା ଜୋରଦାର୍ । ସବୁ ଦଳର ନଜର ଏବେ ଏହି ପର୍ଯ୍ୟାୟରେ କେତେ ଅଧିକରୁ ଅଧିକ ଆସନ ଝାମ୍ପିବେ।
ବିଜେଡି ଆରମ୍ଭ କରିଦେଇଛି ଚତୁର୍ଥ ପର୍ଯ୍ୟାୟ ମଇଦାନ ଦଖଲ କସରତ । ବିଜେଡି ସୂତ୍ର ଅନୁସାରେ ମୁଖ୍ୟମନ୍ତ୍ରୀ ନବୀନ ପଟ୍ଟନାୟକ ଓ କାର୍ତ୍ତିକ ପାଣ୍ଡିଆନଙ୍କ ପ୍ରଚାର ଆହୁରି ଜୋରଦାର ହେବ ଶେଷ ପର୍ଯ୍ୟାୟ ପାଇଁ । ପ୍ରଥମ, ଦ୍ୱିତୀୟ, ତୃତୀୟ ପର୍ଯ୍ୟାୟ ଲଢ଼େଇ ସରିବା ପରେ ସେ ସବୁ ଆସନର ଟାଣୁଆ ନେତା ଏବେ ଜଗତସିଂହପୁର, କେନ୍ଦ୍ରାପଡ଼ା, ମୟୂରଭଞ୍ଜ, ଭଦ୍ରକ, ଯାଜପୁର, ବାଲେଶ୍ୱର ମୁହାଁ ହୋଇଛନ୍ତି । ସମ୍ବଲପୁର ଲୋକସଭା ଲଢ଼େଇ ଶେଷ ପରେ ବିଜେଡି ସାଂଗଠନିକ ସମ୍ପାଦକ ପ୍ରଣବ ପ୍ରକାଶ ଦାସଙ୍କ ଉପରେ ଯାଜପୁର ଗଡ଼ର ଗୁରୁଦାୟିତ୍ୱ । ପ୍ରଣବଙ୍କ ମା’ କୋରେଇ ଆସନରୁ ବିଧାନସଭା ପାଇଁ ଲଢ଼ୁଛନ୍ତି । ତେଣୁ ଏ ଆସନ ସମେତ ସମଗ୍ର ଯାଜପୁର ଲୋକସଭା ନେଇ ପ୍ରଣବ ବର୍ତ୍ତମାନ ମଙ୍ଗ ସମ୍ଭାଳିବେ ।
ଚାନ୍ଦବାଲି ଆସନରେ ବିଜେପି ରାଜ୍ୟ ସଭାପତି ମନମୋହନ ସାମଲଙ୍କୁ ଟକ୍କର ଦେଉଛନ୍ତି ଯୁବ ବିଜେଡି ସଭାପତି ବ୍ୟୋମକେଶ ରାୟ । ୪ ବିଧାୟକ ସମେତ ପ୍ରାୟ ୮ଜଣ ବିଧାୟକ ପ୍ରାର୍ଥୀଙ୍କ ନିର୍ବାଚନ ସରିବା ପରେ ସେମାନଙ୍କୁ ଚାନ୍ଦବାଲି ପଠାଇଛି ବିଜେଡି । ଏ ଆସନରେ ଦଳ ରଚିବ ବ୍ୟୁହ । ଜଗତସିଂହପୁର ଲୋକସଭା ନିର୍ବାଚନମଣ୍ଡଳୀର ନିମାପଡ଼ା ଆସନ ଏଥର ଚର୍ଚ୍ଚାରେ । ସମୀର ଦାସ ବିଜେପିକୁ ଡେଇଁବା ପରେ ବିଜେଡି ପାଇଁ ବଡ଼ ଚାଲେଞ୍ଜ ସୃଷ୍ଟି ହୋଇଛି । ନିମାପଡ଼ା ପାଇଁ ବିଜେଡି ଏହାର ପାଶ୍ୱର୍ବର୍ତ୍ତୀ ଆସନର ୮ଜଣ ଟାଣୁଆ ନେତା, ସଂଗଠକ ଓ ପ୍ରାର୍ଥୀଙ୍କୁ ପଠାଇଛି । ଜଗତସିଂହପୁର, କେନ୍ଦ୍ରାପଡ଼ା, ମୟୂରଭଞ୍ଜର ବିଭିନ୍ନ ଆସନ ଦଖଲ ପାଇଁ ୯ଜଣ ନେତାଙ୍କୁ ଆହୁରି ପଠାଯାଇଛି । କଟକ, ପୁରୀ, ନୟାଗଡ଼ ନିର୍ବାଚନ ସରିଯାଇଥିବାରୁ ଦଳର ଅନ୍ୟ ବରିଷ୍ଠ ନେତାମାନେ ବି ଦଳର ବଳ ବଢ଼ାଇବାକୁ ବିଭିନ୍ନ ନିର୍ବାଚନମଣ୍ଡଳୀ ଗସ୍ତ କରିବେ ବୋଲି ଖବର ମିଳିଛି ।
ଚତୁର୍ଥ ପର୍ଯ୍ୟାୟରେ ବଡ଼ ସଫଳତା ପାଇବାକୁ ବିରୋଧୀ କଂଗ୍ରେସ ଓ ବିଜେପି ବି ଲାଗି ପଡ଼ିଛନ୍ତି । ବିଜେପିର ସବୁ ଟାଣୁଆ ନେତା ଓ ପ୍ରଚାରକ ଏବେ କେନ୍ଦ୍ରାପଡ଼ା, ଯାଜପୁର, ଭଦ୍ରକ ଓ ବାଲେଶ୍ୱରରେ ଡେରା ପକାଇଲେଣି । ସମ୍ବଲପୁର ଲଢ଼େଇ ସରିବା ପରେ ଏବେ କେନ୍ଦ୍ରମନ୍ତ୍ରୀ ଧର୍ମେନ୍ଦ୍ର ପ୍ରଧାନ ବର୍ତ୍ତମାନ ବାକି ଥିବା ଆସନରେ ଘନଘନ ପ୍ରଚାର କରିବେ ।
ରେଳ ମନ୍ତ୍ରୀ ଅଶ୍ୱିନୀ ବୈଷ୍ଣବ ବାଲେଶ୍ୱରରେ ମଙ୍ଗ ଧରିଛନ୍ତି । ପ୍ରଧାନମନ୍ତ୍ରୀ ନରେନ୍ଦ୍ର ମୋଦି ବି ଆସିବେ । କେନ୍ଦ୍ରାପଡ଼ାକୁ ଉତ୍ତରପ୍ରଦେଶ ମୁଖ୍ୟମନ୍ତ୍ରୀ ଯୋଗୀ ଆଦିତ୍ୟନାଥଙ୍କ ସମେତ ବହୁ ବଡ଼ ନେତାଙ୍କ ଘନଘନ ଗସ୍ତ ଲାଗି ରହିଛି । ପ୍ରଧାନମନ୍ତ୍ରୀ ନରେନ୍ଦ୍ର ମୋଦି ବି ଆସୁଛନ୍ତି ଏହି ପର୍ଯ୍ୟାୟରେ ପ୍ରଚାର ତେଜିବାକୁ । ଗୃହମନ୍ତ୍ରୀ ଅମିତ ଶାହ ବି ଆସିବେ । ବିଜେପି ବି ପ୍ରଚାରକୁ ଆହୁରି ଶାଣିତ କରିବ ।
କଂଗ୍ରେସ ଦଳ ବି ଶେଷ ପର୍ଯ୍ୟାୟ ପାଇଁ କିଛି ଆସନ ଉପରେ ଆଖି ରଖିଛି । ଦଳର ମୁଖ୍ୟ ଟାର୍ଗେଟ ଭଦ୍ରକ ଓ ବାଲେଶ୍ୱର ଜିଲ୍ଲା ଉପରେ । ଭଦ୍ରକର ଭଣ୍ଡାରିପୋଖରୀକୁ ଜଗି ରହିଛନ୍ତି ନିରଞ୍ଜନ ପଟ୍ଟନାୟକ ଓ ତାଙ୍କ ଟିମ୍ । ସାଂସଦ ସପ୍ତଗିରି ଉଲାକା ବି ନିରଞ୍ଜନଙ୍କୁ ସହଯୋଗ କରିବାକୁ ପହଞ୍ଚିଛନ୍ତି । ବାଲେଶ୍ୱରରେ ଶ୍ରୀକାନ୍ତ ଜେନାଙ୍କୁ ସହଯୋଗ ପାଇଁ କେନ୍ଦ୍ରୀୟ ନେତା ଓ ରାଜ୍ୟର ଅନ୍ୟ ବରିଷ୍ଠ ନେତାମାନେ ଗସ୍ତ ପହଞ୍ଚିଲେଣି ।
୨୦୧୯ ନିର୍ବାଚନରେ ଏହି ପର୍ଯ୍ୟାୟରେ ନିର୍ବାଚନ ହେବାକୁ ଥିବା ୬ ଲୋକସଭା ଆସନ ଭିତରୁ ବିଜେଡି ୪ ଓ ବିଜେପି ୨ଟି ଆସନ ଦଖଲ କରିଥିଲେ । ଜଗତସିଂହପୁର ଲୋକସଭା କ୍ଷେତ୍ରରେ ୭ ବିଧାନସଭା ନିର୍ବାଚନମଣ୍ଡଳୀରୁ ୭ଟି ଯାକ ଆସନ ବିଜେଡି ଜିତିଥିଲା । ଯାଜପୁରରେ ବି ବିଜେଡି ସମସ୍ତ ୭ଟି ଆସନ ପୋଛି ନେଇଥିଲା ।
କେନ୍ଦ୍ରାପଡ଼ାର ବି ୭ରୁ ୭ ଆସନ ବିଜେଡି ଦଖଲରେ ରହିଛି । ଭଦ୍ରକରେ ବିଜେଡି ୬ଟି ଓ ବିଜେପି ଗୋଟିଏ ଆସନ ଜିତିଥିଲେ । ବାଲେଶ୍ୱର ଲୋକସଭା କ୍ଷେତ୍ରର ୭ଟି ଆସନରୁ ବିଜେଡି ୫ ଓ ବିଜେପି ୨ଟି ଆସନ ଜିତିଥିଲେ । ଯଦିଓ ପରବର୍ତ୍ତୀ ସମୟରେ ଉପନିର୍ବାଚନ ପରେ ବିଜେପି ହାତରୁ ଗୋଟିଏ ଆସନ ଛଡ଼ାଇ ନେଇଥିଲା ବିଜେଡି । ମୟୂରଭଞ୍ଜ ଲୋକସଭାରେ ବିଜେପି ୭ରୁ ୫ଟି ଆସନ ଦଖଲ କରିଥିବାବେଳେ ବିଜେଡି ଜିତିଥିଲା ୨ଟି । ୨୦୧୯ ନିର୍ବାଚନରେ ବିଜେଡି ୩୩ ଓ ବିଜେପି ପାଇଥିଲା ୯ । କଂଗ୍ରେସ ହାତ ଥିଲା ଖାଲି ।