ଭୁବନେଶ୍ୱର,୦୬/୮: ଆସନ୍ତା ୧୪ ତାରିଖରୁ ୧୦  ଦଫା ଦାବିରେ ରାଜ୍ୟର ସମସ୍ତ ନର୍ସିଂ ଅଫିସର ୭ ଦିନ କଳା  ପଟି ପରିଧାନ କରିବେ। ୨୧ରୁ ରୋଗୀ ସେବାରେ ବାଧା  ନଦେଇ ଆନ୍ଦୋଳନ କରାଯିବ । ଏହାପରେ ରାଜ୍ୟ ସରକାର  ଦାବି ପୂରଣ ଦିଗରେ ପଦକ୍ଷେପ ନ ନେଲେ, ୨୭ରୁ ଅନିର୍ଦ୍ଦିଷ୍ଟ  କାଳ ପାଇଁ କାର୍ଯ୍ୟବନ୍ଦ ଆନ୍ଦୋଳନ କରାଯିବ ବୋଲି ଓଡ଼ିଶା  ନର୍ସିଂ କର୍ମଚାରୀ ସଂଘ ଚେତାବନୀ ଦେଇଛି । 

ସଂଘ ସାଧାରଣ ସମ୍ପାଦକ ଅଶ୍ୱିନୀ କୁମାର ଦାସ କହିଛନ୍ତି, ରାଜ୍ୟସ୍ତରୀୟ ସାଧାରଣ ପରିଷଦ ବୈଠକରେ ଏହି ନିଷ୍ପତ୍ତି  ନିଆଯାଇଛି । ବରିଷ୍ଠ ନର୍ସିଂ ଅଫିସରଙ୍କ ୨୦୧୩ ପୂର୍ବରୁ ଛଅ  ବର୍ଷ ଚୁକ୍ତିଭିତ୍ତିକ ଚାକିରି ସୀମାକୁ ମୂଳ ଚାକିରିରେ ମିଶାଇବା, ନର୍ସିଂ ଅଫିସରଙ୍କୁ ବରିଷ୍ଠତା ଭିତ୍ତିରେ ପଦୋନ୍ନତି କରି  ଉପଯୁକ୍ତ ପଦବି ଦେବା, ଡ୍ରେସ୍‌କୋଡ୍‌ ପରିବର୍ତ୍ତନ ଆଦି ଦାବି  ରହିଛି ସଂଘ । ୪୦ ବର୍ଷ ପୂର୍ବରୁ ତିଆରି ହୋଇଥିବା ସଂଘର ପୁରୁଣା ସମ୍ବିଧାନରେ ଥିବା କିଛି ନିୟମ ସଂଶୋଧନ କରାଯିବ ।  ଆସନ୍ତା ନଭେମ୍ବରରେ ନିୟମ ଅନୁମୋଦନ କରାଯିବ ବୋଲି  ସଂଘ ପକ୍ଷରୁ କୁହାଯାଇଛି ।