କଟକ ୨୪/୦୩: ଓଡ଼ିଶା ପୁଲିସର ୮୯ ତମ ପ୍ରତିଷ୍ଠା ଦିବସ ଅପ୍ରେଲ୍ରେ ୧ରେ ଅନୁଷ୍ଠିତ ହେବ । ପ୍ରତିବର୍ଷ ଉକ୍ତ କାର୍ଯ୍ୟକ୍ରମ ପାଇଁ ବ୍ୟାପକ ଆୟୋଜନ ହେଉଥିଲେ ହେଁ ନିର୍ବାଚନ ଲାଗି ଆଦର୍ଶ ଆଚରଣ ବିଧି ଲାଗୁ ହୋଇଥିବାରୁ ଏଥର କଟକଣା ଭିତରେ ପାଳନ କରାଯିବ । ଏହି ଅବସରରେ ରାଜ୍ୟ ପୁଲିସ ବାହିନୀ ପକ୍ଷରୁ ବରିଷ୍ଠ ପୁଲିସ୍ ଅଧିକାରୀ ଏବଂ ପୁଲିସ୍ କର୍ମଚାରୀ ମିଶି ୧୦୮ ଜଣଙ୍କୁ ରାଜ୍ୟ ପୁଲିସ୍ ମହାନିର୍ଦ୍ଦେଶକ ପଦକ (ଡିଜିପି ଡିକ୍ସ)ପ୍ରଦାନ କରାଯିବ । ଏଥିରେ ୬ ଜଣ ଆଇପିଏସ୍, ୨୧ ଜଣ ଓପିଏସ୍ ଅଫିସର, ୮ ଜଣ ଓଏପିଏସ୍ ଅଫିସର, ୧୪ ଜଣ ଇନ୍ସପେକ୍ଟର, ୧୨ ଜଣ ଏସ୍ଆଇ, ୭ ଜଣ ଏଏସ୍ଆଇ, ୧୧ ଜଣ ହାବିଲଦାର ଏବଂ କନଷ୍ଟେବଳ, ସିପାହୀ, ଓଏପିଏପ୍ ମିଶି ୨୭ ଜଣ କର୍ମଚାରୀ ରହିଛନ୍ତି ।
ପୁଲିସ୍ ବିଭାଗର ଏହି ସମ୍ମାନଜନକ ପଦକ ପାଇବା ଯୋଗ୍ୟ ବିବେଚିତ ହୋଇଥିବା ଅଧିକାରୀଙ୍କ ମଧ୍ୟରେ ବରିଷ୍ଠ ଆଇପିଏସ୍ ତଥା ଅତିରିକ୍ତ ଡିଜି ରାଜେଶ କୁମାର, ଡିଆଇଜି ନିତି ଶେଖର, ଏସ୍ପି ରାହୁଲ୍ . ପି. ଆର, ଏସ୍. ସୁଶ୍ରୀ, ରାଜ ପ୍ରସାଦ, ଶୁଭେନ୍ଦୁ କୁମାର ପାତ୍ର ପ୍ରମୁଖ ଆଇପିଏସ୍ ଅଧିକାରୀ ରହିଛନ୍ତି । ସେହିପରି ଓପିଏସ୍ ଏସ୍ପି ଦେବନାରାୟଣ ଦାସ, ବରିଷ୍ଠ ଓପିଏସ୍ ଅଫିସର ତାପସ ରଞ୍ଜନ ଦାସ, ଅଶୋକ ମହାନ୍ତି, ଅତିରିକ୍ତ ଏସ୍ପି ଏ. କୁଜୁର, ବିକାଶ ଚନ୍ଦ୍ର ବେହୁରା, ସୁଧାକର ମିଶ୍ର, ସୁବାସ ଚନ୍ଦ୍ର ପଣ୍ଡା, ଅନନ୍ତ ମଲ୍ଲିକ୍ ପ୍ରମୁଖ ଡିଜିପି ଡିସ୍କ ପାଇବେ ବୋଲି ପୁଲିସ ମୁଖ୍ୟାଳୟ ପକ୍ଷରୁ ସୂଚନା ଦିଆଯାଇଛି ।