କଟକ ୩୦/୦୯: ଇ-କେୱାଇସି ପଞ୍ଜୀକରଣ ସରିବା ପରେ ଖାଉଟିଙ୍କୁ ନୂଆ ରାସନ କାର୍ଡ ବଣ୍ଟାଯିବ । ରବିବାର ଖାଦ୍ୟ ଯୋଗାଣ ଓ ଖାଉଟି କଲ୍ୟାଣ ମନ୍ତ୍ରୀ କୃଷ୍ଣଚନ୍ଦ୍ର ପାତ୍ର ଏହା କହିଛନ୍ତି । ମନ୍ତ୍ରୀ ଶ୍ରୀ ପାତ୍ର କହିଛନ୍ତି, ପାଖାପାଖି ସାଢ଼େ ୩ କୋଟି ଲୋକଙ୍କ ଇ-କେୱାଇସି ପଞ୍ଜୀକାରଣ ହେବ । ଏବେ ସୁଦ୍ଧା ୨ କୋଟି ଲୋକଙ୍କ ଇ-କେୱାଇସି ସରିଯାଇଛି । ଆଉ ମାସେ ମଧ୍ୟରେ ଅବଶିଷ୍ଟ ଲୋକଙ୍କ ଇ-କେୱାଇସି ସରିଯିବ । ଏହି ପ୍ରକ୍ରିୟା ସରିବା ପରେ ଯାଞ୍ଚ କରାଯାଇ ଅଯୋଗ୍ୟ କାର୍ଡଧାରୀଙ୍କୁ ହଟାଯିବ । କେବଳ ଯୋଗ୍ୟ ଖାଉଟିଙ୍କୁ ବଛାଯାଇ ସେମାନଙ୍କୁ ନୂଆ ରାସନ କାର୍ଡ ମିଳିବ । ଯେଉଁମାନେ ଇ-କେୱାଇସି କରିନାହାନ୍ତି ସେମାନଙ୍କର ଯାଞ୍ଚ୍ କରାଯାଇ ସ୍ୱତନ୍ତ୍ର ଟିମ୍ ଘର ଘର ବୁଲି ସମ୍ପୃକ୍ତ ବ୍ୟକ୍ତି କାହିଁକି ଇ-କେୱାଇସି କରିନାହାନ୍ତି ତାକୁ ଅନୁଧ୍ୟାନ କରିବେ। କୌଣସି ପରିସ୍ଥିତିରେ ରାସନ୍ ଯୋଗାଣ ବନ୍ଦ ହେବ ନାହିଁ । ଶେଷ ଲୋକର ଇ-କେୱାଇସି ନସରିବା ଯାଏ ଏହା ଚାଲିବ ବୋଲି ଯୋଗାଣ ମନ୍ତ୍ରୀ ସୂଚନା ଦେଇଛନ୍ତି ।
କଟକ କଳାବିକାଶ କେନ୍ଦ୍ରଠାରେ ଆଜି ଆୟୋଜିତ ଅଖିଳ ଭାରତୀୟ ଗ୍ରାହକ ପଞ୍ଚାୟତ ପୂର୍ବ ପ୍ରାନ୍ତର ସ୍ୱର୍ଣ୍ଣ ଜୟନ୍ତୀ ସମାରୋହରେ ଯୋଗଦେଇ ମନ୍ତ୍ରୀ ଶ୍ରୀ ପାତ୍ର ଏହା କହିଛନ୍ତି । ରାଜ୍ୟରେ ୨୦୧୬-୧୭ରୁ ଏ ପର୍ଯ୍ୟନ୍ତ ୧୬ ଲକ୍ଷ ୨୭ ହଜାର ୯୨୦ଟି କାର୍ଡ଼କୁ ଭୂତ ଓ ଅଯୋଗ୍ୟ କାର୍ଡ଼ ଭାବେ ଘୋଷଣା କରିବା ସହ ବାଦ୍ ଦିଆଯାଇଛି । ସେଥି ମଧ୍ୟରୁ ମୃତ୍ୟୁ ପରେ ବି ବହୁ ହିତାଧିକାରୀଙ୍କ ନାମରେ କାର୍ଡ ରହିଥିଲା । ଯାହାକୁ ଭୂତ କାର୍ଡ କୁହାଯାଉଥିଲା । ଏହି କାର୍ଡରେ ଆସୁଥିବା ରାସନ୍ ବାଟମାରଣା ହେଉଥିଲା । ସେଗୁଡିକୁ କଡ଼ାକଡ଼ି ଭାବେ ଯାଞ୍ଚ କରି ଏବେ କାଟି ଦିଆଯାଉଛି । ଅଯୋଗ୍ୟ ହିତାଧିକାରୀଙ୍କୁ କାଟିବା ପରେ ଖାଲି ପଡୁଥିବା ସ୍ଥାନରେ ନୂଆ ହିତାଧିକାରୀଙ୍କୁ ଯୋଡ଼ାଯିବ । ସେମାନଙ୍କୁ ନୂଆ ରାସନ୍ କାର୍ଡ ମିଳିପାରିବ । ପ୍ରତି କାର୍ଡରେ ଯୋଡ଼ା ହୋଇଥିବା ପରିବାରର ସମସ୍ତ ସଦସ୍ୟଙ୍କର ଆଧାରଯୁକ୍ତ ଇ-କେୱାଇସି କରାଯିବ । ଯାହା ଯୋଗାଣ ପ୍ରକ୍ରିୟାକୁ ସ୍ୱଚ୍ଛ କରିବ ବୋଲି ଯୋଗାଣ ମନ୍ତ୍ରୀ ଶ୍ରୀ ପାତ୍ର ଉଲ୍ଲେଖ କରିଛନ୍ତି ।
ଏହି ଅବସରରେ ଇ-କେୱାଇସି ସହିତ ଠକ ବ୍ୟବସାୟୀଙ୍କ ଉପରେ ସରକାରଙ୍କ ନଜର ରହିଥିବା ମନ୍ତ୍ରୀ କହିଥିଲେ । ସେ କହିଲେ, ପାର୍ବଣ ସମୟରେ ଅପମିଶ୍ରିତ ଖାଦ୍ୟ ସାମଗ୍ରୀ ଉପରେ ଜୋର୍ଦାର ଚଢ଼ଉ ହେବ । ବିଭିନ୍ନ ପ୍ରକାର ମିଠା ଦୋକାନରେ ଯାଞ୍ଚ୍ ହେବ । ଏନେଇ ଏନ୍ଫୋର୍ସମେଣ୍ଟ୍ ଟିମକୁ ନିର୍ଦ୍ଦେଶ ଦିଆଯାଇଛି । ଅପମିଶ୍ରଣର ପ୍ରମାଣ ମିଳିଲେ ସଙ୍ଗେ ସଙ୍ଗେ କାର୍ଯ୍ୟାନୁଷ୍ଠାନ ଗ୍ରହଣ କରାଯିବ । କିଛି ଦିନ ପୂର୍ବରୁ କଟକରେ ଏକ ନକଲି କ୍ଷୀର କମ୍ପାନି ଠାବ ହେବା ପରେ ଏଭଳି କଠୋର ଆଭିମୁଖ୍ୟ ଗ୍ରହଣ କରିଛି ବିଭାଗ। ଗ୍ରାହକ କିଭଳି ଠକାମିର ଶିକାର ହେବେନି ସେଥିପ୍ରତି ଗୁରୁତ୍ୱ ଦିଆଯାଉଛି ।
ବର୍ତ୍ତମାନ ଓଡ଼ିଶାରେ ପିଆଜ ଦର ବଢ଼ିଯାଇ ଥିବାରୁ ଏହା ଉପରେ ପ୍ରତିକ୍ରିୟା ରଖିଛନ୍ତି ମନ୍ତ୍ରୀ । କହିଛନ୍ତି, ଓଡ଼ିଶା ସମେତ ଭାରତରେ ପିଆଜର ଦର ବୃଦ୍ଧି ଘଟିଛି । ବର୍ଷା ଯୋଗୁଁ ଫସଲ ନଷ୍ଟ ହେବା ଫଳରେ ଆଜି ଏହିଭଳି ସ୍ଥିତି ଉପୁଜିଛି । ଆଳୁ, ପିଆଜ, ଅଣ୍ଡା ଓ ମାଛ ପାଇଁ ଆମେ ଅନ୍ୟ ରାଜ୍ୟ ଉପରେ ନିର୍ଭର କରୁଛୁ । ଖୁବ୍ ଶୀଘ୍ର ନୂଆ ଫସଲ ଆସିଲେ ସ୍ଥିତି ସୁଧୁରିବ । ପିଆଜ ଆମେ ଆମଦାନୀ କରି ୩୫ ଟଙ୍କାରେ ବିକ୍ରି କରୁଛୁ । ଏହା ସହ ରାଜ୍ୟରେ ଶୀତଳ ଭଣ୍ଡାରକୁ ନେଇ ପ୍ରତିକ୍ରିୟା ରଖି ମନ୍ତ୍ରୀ କହିଛନ୍ତି, ରାଜ୍ୟର ୫୮ଟି ସବ୍ଡିଭିଜନରେ ଶୀତଳ ଭଣ୍ଡାର ନିର୍ମାଣ କରାଯିବ । ଯାହା ଆଗକୁ ଏହିଭଳି ସ୍ଥିତିର ମୁକାବିଲା କରିବାରେ ସହାୟକ ହେବ । ସେହିପରି ଗହମ ଯୋଗାଣ ଲାଗି କେନ୍ଦ୍ର ମନ୍ତ୍ରୀ ନିର୍ଦ୍ଦେଶ ଦେଇଛନ୍ତି ବୋଲି ମନ୍ତ୍ରୀ ଗଣମାଧ୍ୟମରେ ପ୍ରକାଶ କରିଛନ୍ତି । ଆସନ୍ତା ଅକ୍ଟୋବରରୁ ଗହମ ମିଳିବ ।
ଏହି ଅବସରରେ ଭାରତୀୟ ଗାହକ ପଞ୍ଚାୟତର କେନ୍ଦ୍ରୀୟ ସମ୍ପାଦକ ଅରୁଣ ଦେଶପାଣ୍ଡେ, ପଞ୍ଚାୟତର ଯୁଗ୍ମସମ୍ପାଦକ ସୁବାସ ଚନ୍ଦ୍ର ବେହୁରା, ସୌମେନ୍ଦ୍ର ଜେନା, ବଦ୍ରିନାରାୟଣ ମହାରଣା, ଜୟଶ୍ରୀବାଳା ମଲ୍ଲିକ, ଦୀପକ ମହାନ୍ତି, ଦୀନବନ୍ଧୁ ମହାରଣା, କୌସ୍ତୁଭ ଚୌଧୁରୀ ପ୍ରମୁଖ ଉପସ୍ଥିତ ଥିଲେ ।
