ଛତ୍ରପୁର/ଗଞ୍ଜାମ, ୨୩/୦୩ : ଗଞ୍ଜାମ ଋଷିକୂଲ୍ୟା ପୋଲ ନିକଟରୁ ବାଲି ଚୋରା ଚାଲାଣ ଚଢ଼ାଉ ବେଳେ ଖଣି ବିଭାଗର ଅଧିକାରୀ ଓ କର୍ମଚାରୀଙ୍କୁ ଆକ୍ରମଣ। ଡ୍ରାଇଭର୍‌ଙ୍କୁ ମାଡ଼ ମାରିବା ସହ ପୋଲିସକୁ ଗାଡିରୁ ଓହ୍ଲାଇ ଦେଲେ ମାଫିଆ। ଏନେଇ ଖଣି ଅଧିକାରୀ ଥାନାରେ ଏତଲା ଦେଇଛନ୍ତି। ପୋଲିସ ତଦନ୍ତ ଆରମ୍ଭ କରିଛି।

ସୂଚନାନୁଯାୟୀ, ଗଞ୍ଜାମ ଥାନା ଜାତୀୟ ରାଜପଥ ଋଷିକୁଲ୍ୟା ପୋଲ ନିକଟରୁ ଦୀର୍ଘଦିନ ଧରି ସ୍ପଷ୍ଟ ଦିବାଲୋକରେ ଚୋରା ବାଲି ଚାଲାଣ ଚାଲିଛି। ଖବର ପାଇ ବ୍ରହ୍ମପୁରର ଇସ୍ପାତ ଓ ଖଣି ବିଭାଗର ଅଧିକାରୀ, କର୍ମଚାରୀ ଏବଂ ସଶସ୍ତ୍ର ପୋଲିସ ବାହିନୀ ସକାଳ ୭ଟାରେ ଚଢାଉ କରିଥିଲେ। ଜେସିବି ଓ କିଛି ଟ୍ରାକ୍ଟର ଜବତ କରି ଅଧିକାରୀମାନେ ନେଉଥିବା ବେଳେ ମାଫିଆ ଓ ଗ୍ରାମବାସୀ ଏହାକୁ ବିରୋଧ କରିଥିଲେ। ଜେସିବି ଦ୍ୱାରା ଖଣି ବିଭାଗ ଅଧିକାରୀ ଆଣିଥିବା ଗାଡିକୁ ଆକ୍ରମଣ କରିଥିଲେ। ଯାହାଫଳରେ ଗାଡିଟି ଭାଙ୍ଗି ଯାଇଛି। ମାଫିଆମାନେ ଅଧିକାରୀଙ୍କ ସହ ଯୁକ୍ତିତର୍କ କରିବା ସହ ତାଙ୍କ ଡ୍ରାଇଭରକୁ ମାଡ଼ ମାରିଛନ୍ତି। ଏପରିକି ସେମାନଙ୍କ ସହିତ ଯାଇଥିବା ପୁଲିସ ଫୋର୍ସକୁ ଗାଡ଼ିରୁ ଓହ୍ଲାଇ ଦେଇଥିଲେ। ଏହିପରି କି ଜେସିବି ସହିତ ଟ୍ରାକ୍ଟରଗୁଡିକ ମାଫିଆମାନେ ନେଇଯାଇଥିଲେ। ଧମକ ଚମକ ଦେଇଥିଲେ। ଏହି ଘଟଣାର ଖବର ପାଇ ଗଞ୍ଜାମ ଥାନା ପୁଲିସ ପହଞ୍ଚିଥିବା ବେଳେ ନିରବଦ୍ରଷ୍ଟା ସାଜିଥିଲା। ତେବେ ଖଣି ଅଧିକାରୀ ଥାନାରେ ଏତେଲା ଦେଇଛନ୍ତି। ଏନେଇ ତଦନ୍ତ ଆରମ୍ଭ ହୋଇଛି। ଏହି ଅଞ୍ଚଳରୁ ଦୈନିକ ଶତାଧିକ ଟ୍ରକ, ଟ୍ରାକ୍ଟର ବାଲି ଚୋରା ଚାଲାଣ କରିବାରେ ଲାଗିଛନ୍ତି।