ହରିଆଣା ୦୩/୧୧: ହରିଆଣାରେ ବୟସ୍କ ବୃକ୍ଷଗୁଡ଼ିକୁ ଭତ୍ତା ମିଳୁଛି । ଗୁରୁଗ୍ରାମରେ ୭୫ ବର୍ଷରୁ ଅଧିକ ବୟସର ୮୦ ବୃକ୍ଷ ପାଇଁ ପ୍ରଥମ ଥର ଭତ୍ତା ଲାଗୁ କରାଯାଇଛି । ବୃକ୍ଷ ମାଲିକଙ୍କୁ ସରକାରଙ୍କ ତରଫରୁ ୨,୭୫୦ ଟଙ୍କା ପେନ୍ସନ୍ ରାଶି ଦିଆଯାଇଛି । ଏହି ପେନ୍ସନ ପ୍ରତି ବର୍ଷ ମିଳିବ । ହରିଆଣା ସରକାର ପରିବେଶ ସଂରକ୍ଷଣ ପାଇଁ ୨୦୨୧ ମସିହାରେ ପ୍ରାଣ ବାୟୁ ଦେବତା ପେନ୍ସନ ଯୋଜନା ଆରମ୍ଭ କରିଥିଲେ । ଏହି ଯୋଜନା ଅନ୍ତର୍ଗତ ଜିଲ୍ଲାରେ ପେନ୍ସନ ପାଇବାଯୋଗ୍ୟ ବୃକ୍ଷ ଚୟନ କରାଗଲା । ଗୁରୁଗ୍ରାମରେ ୮୦ ବୃକ୍ଷ ଚୟନ କରାଗଲା।
ଏହି ଯୋଜନା ଅନ୍ତର୍ଗତ, ବୃକ୍ଷମାନଙ୍କର ସଂରକ୍ଷଣ ଲାଗି ବାର୍ଷିକ ୨୫୦୦ ଟଙ୍କା ପେନ୍ସନ ପ୍ରଦାନ କରିବାକୁ ପ୍ରଥମେ ସରକାର ଘୋଷଣା କରିଥିଲେ । କିନ୍ତୁ ଏବେ ୨୫୦ ଟଙ୍କା ବଢ଼ାଇ ୨,୭୫୦ ଟଙ୍କା କରାଯାଇଛି । ଗତ ଅକ୍ଟୋବର ୨୬ ତାରିଖରେ ସରକାର ଏହି ପେନ୍ସନ ଲାଗୁ କରିଛନ୍ତି । ବୃକ୍ଷମାନଙ୍କର ଜୀବନକାଳ ଥିବା ଯାଏ ଏହି ଯୋଜନା ଜାରି ରହିବ । ହରିଆଣାରେ ଏହି ଯୋଜନାରେ ଚୟନ କରାଯାଇଥିବା ବୃକ୍ଷ ମଧ୍ୟରେ ୯୦ ପ୍ରତିଶତ ଅଶ୍ୱତ୍ଥ ଗଛ ରହିଛି । କାରଣ ଏହା ଅଧିକ ମାତ୍ରାରେ ଅମ୍ଳଜାନ ପ୍ରଦାନ କରେ । ତେଣୁ ବହୁ ପୂର୍ବରୁ ଏହାର ସଂରକ୍ଷଣ ଆବଶ୍ୟକତା ରହିଥିଲା ।
ଏହି ଯୋଜନାର ଲାଭ ଉଠାଇବା ପାଇଁ ଲୋକେ ସମ୍ପୃକ୍ତ ଜିଲ୍ଲାର ବନ ବିଭାଗ କାର୍ଯ୍ୟାଳୟରେ ଆବେଦନ କରିପାରିବେ । ତେବେ ବୃକ୍ଷର ବୟସ ୭୫ ବର୍ଷରୁ ଅଧିକ ହେବା ଆବଶ୍ୟକ । ଏହି ପେନ୍ସନ ରାଶିକୁ ଲୋକେ ବୃକ୍ଷର ରକ୍ଷଣାବେକ୍ଷଣରେ ଖର୍ଚ୍ଚ କରିବେ ।
