ପୁରୀ, ୧୨/୦୮ : ବଜ୍ରପାତ ଘଟି ଜଣେ ମୃତ ୭ ଗୁରୁତର। ସୋମବାର ସକାଳେ ପୁରୀ ଜିଲ୍ଲା ବାଲିଘାଇ ସ୍ଥିତ ଛଇତନା ଗହୀରରେ ଏଭଳି ଅଭାବନୀୟ ଘଟଣା ଘଟିଛି। ସମସ୍ତ ଗୁରୁତରଙ୍କୁ ଜିଲ୍ଲା ମୁଖ୍ୟ ଚିକିତ୍ସାଳୟରେ ଭର୍ତ୍ତି କରାଯାଇଛି। ସମସ୍ତ ମୃତାହତ ରାମଚଣ୍ଡୀ ଥାନା ଅଧୀନ ଭୁଆଁ ଗ୍ରାମର ବୋଲି ଜଣାପଡ଼ିଛି। 

ସୂଚନାନୁଯାୟୀ, ସୋମବାର ସକାଳେ ରାମଚଣ୍ଡୀ ଥାନା ଅଧୀନ ଭୁଆଁ ଗ୍ରାମର ୧୫ ଜଣ ଶ୍ରମିକ ଧାନ ତଳି ରୋଇବା ପାଇଁ ବାଲିଘାଇ ସ୍ଥିତ ଛଇତନା ଗହୀରକୁ ଯାଇଥିଲେ। ତଳି ରୋଇବା ସମୟରେ ପ୍ରବଳ ବର୍ଷା ସାଙ୍ଗକୁ ବଜ୍ରପାତ ହୋଇଥିଲା। ବଜ୍ରପାତରେ ୮ଜଣ ନିସ୍ତେଜ ହୋଇପଡ଼ି ଥିଲେ। ଅନ୍ୟମାନେ ସେମାନଙ୍କୁ ଉଦ୍ଧାର କରି ସଦର ମୁଖ୍ୟ ଚିକିତ୍ସାଳୟରେ ଭର୍ତ୍ତି କରିଥିଲେ। ହେଲେ ସେମାନଙ୍କ ମଧ୍ୟରୁ ଜଣେ ମହିଳାଙ୍କୁ ଡାକ୍ତର ମୃତ ଘୋଷଣା କରିଛନ୍ତି। ମୃତକ ଜଣଙ୍କ ହେଉଛନ୍ତି କୁନ୍ତି ଭୋଇ (୪୫ ବର୍ଷ)। ଅନ୍ୟମାନେ ସର୍ଜରୀ ୱାର୍ଡରେ ଚିକିତ୍ସାଧୀନ ଅଛନ୍ତି।