ସୁକିନ୍ଦା, ୮/୧୧, ସୁକିନ୍ଦା ହାଟରେ ବ୍ୟବସାୟ କରୁଥିବା ଜଣେ ବ୍ୟବସାୟୀଙ୍କ ଠାରୁ ୫୦ହଜାରରୁ ଊର୍ଦ୍ଧ୍ବ ଟଙ୍କା ଲୁଟ ଘଟଣାରେ ପୋଲିସ ସଞ୍ଜୟ ଶବର (୧୯)ନାମକ ଯୁବକକୁ ଗିରଫ କରି କୋର୍ଟ ଚାଲାଣ  କରିଛି।  ଗିରଫ ବ୍ୟକ୍ତି ଜଣକ ହେଲେ ସଞ୍ଜୟ ଶବର । ତାର ପ୍ରକୃତ ଘର ସୋସୋ ଥାନା ଅନ୍ତର୍ଗତ ହଦଗଡ଼ ଅଞ୍ଚଳରେ।  ଗତ କିଛି ଦିନ ହେବ ସେ ସୁକିନ୍ଦା ରଙ୍ଗିଟାଙ୍ଗର ଅଞ୍ଚଳରେ ରହୁଥିବା ପୋଲିସ ଜାଣିବାକୁ ପାଇଛି। 

ସୁକିନ୍ଦା ଥାନା ଅନ୍ତର୍ଗତ ହାତିବାରୀ ଗ୍ରାମ ଭାସ୍କର ସାହୁଙ୍କ ପୁଅ ଶ୍ରୀବତ୍ସ କୁମାର ସାହୁ ପ୍ରତି ରବିବାର ଦିନ ସୁକିନ୍ଦା ସାପ୍ତାହିକ ହାଟରେ ତେଜେରାତି ଦୋକାନ କରି ପରିବାର ପ୍ରତିପୋଷଣ କରନ୍ତି। ଗତ ରବିବାର ଦିନ ଶ୍ରୀବତ୍ସ ହାଟ ବ୍ୟବସାୟ ସାରି ସନ୍ଧ୍ୟାରେ ଘରକୁ ଯିବାକୁ ପ୍ରସ୍ତୁତ ହେଉଥିବା ସମୟରେ ଦୁଇ ଜଣ ଅଚିହ୍ନା ଯୁବକ ଶ୍ରୀବତ୍ସ ଠାରୁ ଟଙ୍କା ଥିବା ବ୍ୟାଗ ଲୁଟି ଘଟଣାସ୍ଥଳରୁ ଫେରାର ହୋଇଯାଇଥିବା ଥାନାରେ ଅଭିଯୋଗ ହୋଇଥିଲା। ।ଶ୍ରୀବତ୍ସ ତୁରନ୍ତ ସୁକିନ୍ଦା ଥାନାରେ ପହଞ୍ଚି ପୋଲିସକୁ ସୂଚନା ଦେବାପରେ ପୋଲିସ ୨୬୭/୨୦୨୩ରେ ଏକ ମାମଲା ରୁଜୁ କରି ଜାରୀ ରଖିଥିଲା।ଏହି ଲୁଟ୍ ଘଟଣାରେ ପୋଲିସ ବୁଧବାର ସଞ୍ଜୟ ଶବର ନାମକ ଯୁବକକୁ ଗିରଫ କରି କୋର୍ଟ ଚାଲାଣ କରିଥିବା ଜଣାପଡିଛି।