ଜଳେଶ୍ୱର, ୨୫।୩: ଘରର ମାଟି କାନ୍ଥ ପଡ଼ି ଜଣଙ୍କର ମୃତ୍ୟୁ ହୋଇଥିବା ବେଳେ ୨ ଜଣ ଗୁରୁତର ଆହତ ହୋଇଛନ୍ତି । ମୃତକ ଜଣକ ହେଲେ ଶେଖ ଆରିଫ । ଗୁରୁତରମାନଙ୍କୁ ମୁଖ୍ୟ ଡାକ୍ତରଖାନାକୁ ସ୍ଥାନାନ୍ତରିତ କରାଯାଇଛି । ସୂଚନା ଅନୁଯାୟୀ ରବିବାର ସକାଳେ ବାଲେଶ୍ୱର ଜିଲ୍ଲା ଜଳେଶ୍ୱର ଥାନା ପଶ୍ଚିମବାଡ଼ ଗ୍ରାମର ଶମୀରୁଦ୍ଦିନ ତାଙ୍କ ସ୍ତ୍ରୀ ଆଶୁନା ବିବି ଓ ତାଙ୍କର ପୁଅ ଆରିଫ ନିଜ ଘର କାମ ପାଇଁ ତାଙ୍କ ସମ୍ପର୍କୀୟ ପୁତୁରା ଆଇରୁଦ୍ଦିନଙ୍କ ମାଟି ଘର ପାଖରେ ଚିପ୍ସ ଗୋଟାଉଥିଲେ । ଠିକ୍ ଏତିକି ବେଳେ ହଠାତ୍ ମାଟି ଘରର କାନ୍ଥ ଓଲଟି ପଡ଼ିଥିଲା । ଫଳରେ କାନ୍ଥ ତଳେ ସମସ୍ତେ ଚାପି ହୋଇଯାଇଥିଲେ ।
ସ୍ଥାନୀୟ ଲୋକେ ସେମାନଙ୍କୁ ଉଦ୍ଧାର କରି ଜଳେଶ୍ୱର ଜିକେ ଭଟ୍ଟର ହସ୍ପିଟାଲକୁ ନେଇ ଯାଇଥିଲେ । ଡାକ୍ତର ସେଠାରେ ଶେଖ୍ ଆରିଫକୁ ମୃତ ଘୋଷଣା କରିଥିବା ବେଳେ ଗୁରୁତର ଦୁହେଁ ଥିବା ସ୍ୱାମୀ ସ୍ତ୍ରୀଙ୍କୁ ବାଲେଶ୍ୱର ମୁଖ୍ୟ ଡାକ୍ତରଖାନାକୁ ସ୍ଥାନାନ୍ତରିତ କରିଛନ୍ତି । ଆରିଫର ମୃତ୍ୟୁ ଖବର ଶୁଣି ଗାଁରେ ଶୋକାକୁଳ ପରିବେଶ ସୃଷ୍ଟି ହୋଇଛି ।