ନୂଆଦିଲ୍ଲୀ,୨୪/୦୫: ଭାରତର ଷ୍ଟାର୍ ବ୍ୟାଡ଼ମିଣ୍ଟନ ଖେଳାଳି ପିଭି ସିନ୍ଧୁ ଏବଂ ଲକ୍ଷ୍ୟ ସେନ୍ ଆଗାମୀ ପ୍ୟାରିସ୍ ଅଲିମ୍ପିକ୍ସ ପାଇଁ ବିଦେଶରେ ପ୍ରଶିକ୍ଷଣ ନେବେ। କେନ୍ଦ୍ର କ୍ରୀଡ଼ା ମନ୍ତ୍ରଣାଳୟର ମିଶନ ଅଲିମ୍ପିକ୍ ସେଲ୍ (ଏମ୍ଓସି) ଉଭୟଙ୍କ ପ୍ରଶିକ୍ଷଣ ପାଇଁ ସମସ୍ତ ଖର୍ଚ୍ଚ ବହନ କରିବ । ପ୍ୟାରିସ୍ ଯାତ୍ରା କରିବା ପୂର୍ବରୁ ସିନ୍ଧୁ ଜର୍ମାନୀ ଠାରେ ମାସେରୁ ଊଦ୍ଧ୍ୱର୍ ସମୟ ରହି ପ୍ରଶିକ୍ଷଣ ନେବେ । ତାଙ୍କ ସହ କୋଚ୍ ଏବଂ ସହକାରୀ ସଦସ୍ୟମାନେ ମଧ୍ୟ ଯୋଗ ଦେବେ । ସେହିପରି ଲକ୍ଷ୍ୟ ଫ୍ରାନ୍ସର ମର୍ସେଲି ଠାରେ ୧୨ ଦିନ (ଜୁଲାଇ ୮ରୁ ୨୧ ତାରିଖ) ଧରି ପ୍ରଶିକ୍ଷଣ ନେବେ। ଅଲିମ୍ପିକ୍ କ୍ରୀଡ଼ାର ପୁରୁଷ ସିଙ୍ଗଲ୍ସ ଇଭେଣ୍ଟ ଏଠାରେ ଖେଳାଯିବ ।
ସିନ୍ଧୁ ଓ ଲକ୍ଷ୍ୟଙ୍କ ବ୍ୟତୀତ ଟେବୁଲ ଟେନିସ୍ ଖେଳାଳି ଶ୍ରୀଜା ଆକୁଲା, ତୀରନ୍ଦାଜ ଟିଶା ପୁନିଆ, ଗଲ୍ଫର ଅଦିତି ଅଶୋକ, ସନ୍ତରକ ଆର୍ଯ୍ୟନ ନେହରାଙ୍କୁ ମଧ୍ୟ ସହାୟତା କରିବା ପାଇଁ ଏମ୍ଓସି ବୈଠକରେ ନିଷ୍ପତ୍ତି ନିଆଯାଇଛି । ସେହିପରି ଟିଟି ଖେଳାଳି ହରମିତ ଦେଶାଇ, ମହିଳା ୪ଗୁଣା ୪୦୦ମିଟର ରିଲେ ଦଳ, ରେସଲର ନିଶା (୬୮କିଲୋ), ଋତିକା (୭୬କିଲୋ)ଙ୍କୁ ଟିଓପି ଯୋଜନାରେ ସାମିଲ କରାଯାଇଛି ।
