ଭୁବନେଶ୍ୱର, ୨୫।୯: ଆଉ ଦିନ କେଇଟା ପରେ ଦଶହରା । ରାଜଧାନୀବାସୀ ଲୁଗାପଟାଠାରୁ ଆରମ୍ଭ କରି ସୁନାଗହଣା ଆଦି କିଣିବା ପାଇଁ ବିଭିନ୍ନ ମାର୍କେଟ, ମଲ ଓ ଜୁଏଲାରୀ ଦୋକାନରେ ଭିଡ଼ ଜମାଇଲେଣି । ତେବେ ଏହାର ଫାଇଦା ନେବା ପାଇଁ ରାଜଧାନୀରେ ଡେରା ପକାଇଲେଣି ରାଜ୍ୟ ବାହାର ମହିଳା ଲୁଟେରା ଗ୍ୟାଙ୍ଗ୍‌ । ବିଶେଷକରି ‘ପେଟିକୋଟ୍‌’ ଗ୍ୟାଙ୍ଗ୍‌ ଆସି ବିଭିନ୍ନ ବସ୍ତି, ରେଳ ଷ୍ଟେସନ, ବସ୍‌ଷ୍ଟାଣ୍ଡ୍‌ ଓ ରାଜପଥ କଡ଼ ଫ୍ଲାଏ ଓଭର ତଳେ ଡେରା ପକାଇବା ସହ ହାତ ସଫେଇ ଆରମ୍ଭ କରିଦେଲେଣି । ସୋମବାର ପେଟିକୋଟ ଗ୍ୟାଙ୍ଗ୍‌ ରାଜଧାନୀର ଏକ ମଲ୍‌ରୁ କିଛି କସ୍‌ମେଟିକ୍‌ ସାମଗ୍ରୀ ଲୁଟିଥିବା ଜଣାପଡ଼ିଛି । ଅଭିଯୋଗ ପାଇ କମିଶନରେଟ୍‌ ପୁଲିସ ଏହି ଗ୍ୟାଙ୍ଗକୁ ଧରିବାକୁ ତନାଘନା ଆରମ୍ଭ କରିଦେଇଛି । ତେଣୁ ଏହି ଲେଡି ଲୁଟେରାଙ୍କ ପ୍ରତି ସାବଧାନ ନ ରହିଲେ, କେତେବେଳେ ଲୁଟ୍‌ର ଶିକାର ହେବେ କହି ହେଉନାହିଁ । 

କମିଶନରେଟ୍‌ ପୁଲିସର ଜଣେ ବରିଷ୍ଠ ପୁଲିସ ଅଧିକାରୀଙ୍କ କହିବା ଅନୁଯାୟୀ, ପାର୍ବଣ ସମୟରେ ବିଶେଷକରି ପଶ୍ଚିମବଙ୍ଗ, ବିହାର, ଝାଡ଼ଖଣ୍ଡ, ତାମିଲନାଡ଼ୁ, ଆନ୍ଧ୍ରପ୍ରଦେଶ ଓ ରାଜସ୍ଥାନରୁ ଲେଡି ଲୁଟେରାମାନେ ଦଳ ଦଳ ହୋଇ ଓଡ଼ିଶାକୁ ଆସିଥାନ୍ତି । ସେମାନେ ରାଜଧାନୀ ସମେତ କଟକ ରେଳ ଷ୍ଟେସନ, ବସ୍‌ଷ୍ଟାଣ୍ଡ ପାଖ ଅଞ୍ଚଳ ଓ ଜାତୀୟ ରାଜପଥର ଓଭରବ୍ରିଜ ତଳମାନଙ୍କରେ ବଞ୍ଜାରାଙ୍କ ପରି ଡ଼େରା ପକାଇଥାନ୍ତି । ସେହିପରି ଅନ୍ୟ କେତେକ ଲେଡି ଲୁଟେରା ଷ୍ଟେସନ ନିକଟରେ କମ୍‌ ମୂଲ୍ୟରେ ମିଳୁଥିବା ଛୋଟ ହୋଟେଲ୍‌, ବିଭିନ୍ନ ବସ୍ତିରେ ଘର ଭଡ଼ା ନେଇ ମଧ୍ୟ ରହିଥାନ୍ତି । 

ସବୁଠାରୁ ବଡ଼କଥା ହେଉଛି, ବସ୍ତିମାନଙ୍କରେ ବିଭିନ୍ନ ଲୋକେ ପାର୍ବଣ ସମୟରେ ଘର ଖାଲି କରି ରଖିଥାନ୍ତି । କିଛିଦିନ ପାଇଁ ସେମାନେ ଏହି ଲେଡି ଲୁଟେରାଙ୍କ ଠାରୁ ଚଢ଼ା ଦରରେ ଘରଭଡ଼ା ଆଦାୟ କରନ୍ତି । ସୁରକ୍ଷିତ ଥିବାରୁ ଲେଡି ଲୁଟେରାମାନେ ଅଧିକ ଟଙ୍କା ପଡ଼ୁ ପଛେ ସହଜରେ ଏପରି ଘର ମିଳୁଥିବାରୁ ସେମାନେ ବେଶିମାତ୍ରାରେ ବସ୍ତିରେ ରହିବାକୁ ପସନ୍ଦ କରିଥାନ୍ତି । ବିଶେଷ କରି ସାଲିଆସାହିର ବିଭିନ୍ନ ବସ୍ତି, ପଟିଆ ଷ୍ଟେସନ ନିକଟ ବସ୍ତି, ୟୁନିଟ୍‌-୩ ଓ ୟୁନିଟ୍‌-୪ ଅଞ୍ଚଳରେ ଥିବା ବିଭିନ୍ନ ବସ୍ତି, ପୁରୁଣା ଷ୍ଟେସନ ବଜାର ନିକଟ ବସ୍ତି, କଦଳୀ ଗୋଦାମ ଓ ଗୌତମନଗର ବସ୍ତି, ବାପୁଜୀନଗର କେଦାରପଲ୍ଲୀ ଅଞ୍ଚଳରେ ଏମାନଙ୍କୁ ସହଜରେ ଘର ଭଡ଼ା ମିଳି ଯାଇଥାଏ । ଏମାନେ ପାର୍ବଣ ଋତୁରେ ଲୁଟ୍‌ପାଟ କରିଥାନ୍ତି । ପାର୍ବଣ ଋତୁ ସରିବାପରେ ପୁଣି ନିଜ ରାଜ୍ୟକୁ ଫେରି ଯାଆନ୍ତି ।