ନୂଆଦିଲ୍ଲୀ,୧୬/୦୯: ପ୍ରଧାନମନ୍ତ୍ରୀ ନରେନ୍ଦ୍ର ମୋଦି ପୁଣି ଥରେ ବିଶ୍ୱର ସବୁଠୁ ଲୋକପ୍ରିୟ ନେତା ହୋଇଛନ୍ତି । ତାଙ୍କ ଆପ୍ରୁଭାଲ ରେଟିଂ ୭୬% ରହିଛି ଯାହାକି ବିଶ୍ୱରେ ସର୍ବାଧିକ ବୋଲି ମର୍ଣ୍ଣିଂ କନ୍ସଲ୍ଟ ଦ୍ୱାରା ପ୍ରକାଶିତ ‘ଗ୍ଲୋବାଲ ଲିଡର ଆପ୍ରୁଭାଲ’ ସର୍ଭେ ରିପୋର୍ଟରେ ଦର୍ଶାଯାଇଛି ।
ରିପୋର୍ଟରେ ପ୍ରକାଶିତ ତାଲିକାର ଦ୍ୱିତୀୟରେ ଥିବା ସୁଇଜରଲ୍ୟାଣ୍ଡ ରାଷ୍ଟ୍ରପତି ଆଲେନ୍ ବର୍ସେଟଙ୍କଠାରୁ ମୋଦିଙ୍କ ଆପ୍ରୁଭାଲ ରେଟିଂ ୧୨ ପ୍ରତିଶତ ରହିଛି । ଆଲେନଙ୍କ ଆପ୍ରୁଭାଲ ରେଟିଂ ରହିଛି ୬୪% । ଗତ କିଛି ବର୍ଷ ହେଲା ମୋଦି ଏହି ତାଲିକାର ଶୀର୍ଷ ସ୍ଥାନ ଅଧିକାର କରିରହିଛନ୍ତି । ତାଲିକାର ୭ମ ସ୍ଥାନରେ ଆମେରିକା ରାଷ୍ଟ୍ରପତି ଜୋ ବାଇଡେନ୍ ରହିଛନ୍ତି । ତାଙ୍କ ଆପ୍ରୁଭାଲ ରେଟିଂ ୪୦% ରହିଛି ଯାହା କି ଗତ ମାର୍ଚ୍ଚଠାରୁ ସର୍ବାଧିକ ।
୨୦୨୩ ସେପ୍ଟେମ୍ବର ୬ରୁ ୧୨ ପର୍ଯ୍ୟନ୍ତ ସଂଗୃହୀତ ତଥ୍ୟ ଅନୁସାରେ ମୋଦିଙ୍କ ଡିସ୍ଆପ୍ରୁଭାଲ ରେଟିଂ ମଧ୍ୟ ସବୁଠୁ କମ୍ ୧୮% ରହିଛି । ଶୀର୍ଷ ୧୦ ନେତାଙ୍କ ମଧ୍ୟରେ କାନାଡ଼ା ପ୍ରଧାନମନ୍ତ୍ରୀ ଜଷ୍ଟିନ୍ ଟ୍ରୁଡୋଙ୍କ ଡିସ୍ଆପ୍ରୁଭାଲ ରେଟିଂ ସବୁଠୁ ଅଧିକ ୫୮% ରହିଛି । ପଲିଟିକାଲ ଇଣ୍ଟେଲିଜେନ୍ସ ରିସର୍ଚ୍ଚ ଫାର୍ମ ଦ୍ୱାରା ସଂଗୃହୀତ ତଥ୍ୟ ଅନୁସାରେ ୨୨ ବିଶ୍ୱ ନେତାଙ୍କୁ ନେଇ ଏହି ସର୍ଭେ କରାଯାଇଥିଲା । ଏଥିରେ ଦକ୍ଷିଣ କୋରିଆ ରାଷ୍ଟ୍ରପତି ୟୋନ୍ ସୁକ୍ ୟୋଲ୍ ଏବଂ ଚେକ୍ ରିପବ୍ଲିକ୍ ରାଷ୍ଟ୍ରପତି ପେଟ୍ରେ ପାଭେଲଙ୍କ ଆପ୍ରୁଭାଲ ରେଟିଂ ମାତ୍ର ୨୦% ବା ସର୍ବନିମ୍ନ ରହିଛି ।
ଆପ୍ରୁଭାଲ ରେଟିଂ ତାଲିକାର ତୃତୀୟ ସ୍ଥାନରେ ମେକ୍ସିକୋ ରାଷ୍ଟ୍ରପତି ଆଣ୍ଡ୍ରେସ୍ ମାନୁଏଲ ଲୋପେଜ୍ ଓବ୍ରାଡର (୬୧%), ଚତୁର୍ଥରେ ବ୍ରାଜିଲ ରାଷ୍ଟ୍ରପତି ଲୁଇଜ୍ ଡା ସିଲ୍ଭା (୪୯%), ପଞ୍ଚମରେ ଅଷ୍ଟ୍ରେଲିଆ ପ୍ରଧାନମନ୍ତ୍ରୀ ଆନ୍ଥୋନି ଆଲ୍ବାନିଜ୍ (୪୮%), ତାଙ୍କ ତଳକୁ ଇଟାଲୀ ପ୍ରଧାନମନ୍ତ୍ରୀ ଜର୍ଜିଆ ମେଲୋନି (୪୨%) ରହିଛନ୍ତି ।
ସେହିଭଳି ତାଲିକାର ଅଷ୍ଟମରେ ଥିବା ସ୍ପେନ ପ୍ରଧାନମନ୍ତ୍ରୀ ପେଡ୍ରୋ ସାଞ୍ଚେଜଙ୍କ ଆପ୍ରୁଭାଲ ରେଟିଂ ୩୯% ରହିଥିଲା ବେଳେ ନବମରେ ଥିବା ଆୟର୍ଲାଣ୍ଡ ପ୍ରଧାନମନ୍ତ୍ରୀ ଲିଓ ଭରଦକରଙ୍କ ଆପ୍ରୁଭାଲ ରେଟିଂ ୩୮% ଏବଂ ଦଶମରେ ଥିବା କାନାଡ଼ା ପ୍ରଧାନମନ୍ତ୍ରୀ ଜଷ୍ଟିନ ଟ୍ରୁଡୋଙ୍କ ଆପ୍ରୁଭାଲ ରେଟିଂ ୩୭% ରହିଥିବା ଜଣାପଡ଼ିଛି ।
