ଭୁବନେଶ୍ୱର,୧୭/୦୩: ପୁଲିସ ମାଲଖାନାରୁ ଉଭାନ ହେଉଛି ମାଲ । ଥାନା ଭିତରେ ରହୁଛି ୨୪ ଘଣ୍ଟିଆ ପୁଲିସ୍ ପ୍ରହରା । ସିସିଟିଭି ବି ଅନେଇଛି । ତଥାପି ଉଡ଼ି ଯାଉଛି ଜିନିଷ । କେତେବେଳେ ଜବତ ହୋଇଥିବା ବାଇକ୍ର ଚକା ତ’ ପୁଣି କେବେ କାର୍ର ବ୍ୟାଟେରି । ଓଡ଼ିଶା ସାରା ଅଧିକାଂଶ ଥାନାରେ ଥିବା ମାଲଖାନାର ଅବସ୍ଥା ଏଭଳି । ଜବତ ଗାଡ଼ିକୁ ନେବା ପାଇଁ ମାଲିକ କୋର୍ଟରୁ ଆଦେଶ ଆଣି ପହଞ୍ଚିଲା ବେଳେ ଅନେକ ଯନ୍ତ୍ରାଂଶ ଉଭାନ୍ । କାନ ମୁଣ୍ଡ ଆଉଁସି ଯାହା ମିଳୁଛି ତାକୁ ନେଇ ଫେରୁଛନ୍ତି ।
ଗଞ୍ଜେଇ ଚାଲାଣ ଅଭିଯୋଗରେ ୨୦୧୯ ନଭେମ୍ବରରେ ଯାଁଳା ଫାଣ୍ଡି ଅଞ୍ଚଳରୁ ଏକ କାର୍(ଓଡି୦୨ଡି୩୭୩୭) ଜବତ କରିଥିଲା ଗଞ୍ଜାମ ଜିଲ୍ଲା ରମ୍ଭା ଥାନା ପୁଲିସ୍ । ଜବତ ଗଞ୍ଜେଇ ଓ ଅଭିଯୁକ୍ତଙ୍କୁ ନେଇ ପଳାଇଥିଲା । ତେବେ ଜବତ କାର୍କୁ ସାଙ୍ଗରେ ନ ନେଇ ଜାତୀୟପଥ ନଂ-୧୬ ପାଶ୍ୱର୍ରେ ଥିବା ଯାଁଳା ଫାଣ୍ଡି ପରିସରରେ ରଖିଦେଇ ଯାଇଥିଲା ରମ୍ଭା ପୁଲିସ୍ । ସାଙ୍ଗରେ ଗାଡ଼ି ଚାବି ନେଇ ପଳାଇଥିଲା । ଉକ୍ତ କାର୍ ଥିଲା ଫାଣ୍ଡିର ହେପାଜତରେ ।
୨୦୨୧ ଫେବ୍ରୁଆରୀ ୧୦ ତାରିଖରେ ଭୁବନେଶ୍ୱରରେ ରହୁଥିବା ମାଲିକ ସୁନିଲ୍ କୁମାର ମହାପାତ୍ର ଗାଡ଼ି ରିଲିଜ୍ ପାଇଁ କୋର୍ଟରୁ ସବୁ କାଗଜ ନେଇ ପହଞ୍ଚିଥିଲେ ରମ୍ଭା ଥାନରେ । ସେଠାରୁ ଗାଡ଼ି ଚାବି ଆଣି ଯାଁଳା ଫାଣ୍ଡିକୁ ଆସିଥିଲେ । ଫାଣ୍ଡିରେ ଗାଡ଼ି ଥିଲା ସତ, ହେଲେ ବ୍ୟାଟେରି, ଷ୍ଟେପିନ୍, ମ୍ୟୁଜିକ୍ ସିଷ୍ଟମ୍ ଓ ଅନ୍ୟ କିଛି ଯନ୍ତ୍ରାଂଶ ନଥିଲା । ୨୦୨୦ରେ ନୂଆପଲ୍ଲୀ ଥାନାରେ କାର୍ଯ୍ୟରତ ଜଣେ ଏସ୍ଆଇ ଏକ ପଲ୍ସର ବାଇକ୍ର ପଛ ଚକା ବିକ୍ରି କରିଦେଇଥିଲେ । କଥା ଡିଜିପିଙ୍କ କାନରେ ପଡ଼ିଥିଲା । ଡିଜିପିଙ୍କ ନିର୍ଦ୍ଦେଶମତେ ସଙ୍ଗେ ସଙ୍ଗେ ତାଙ୍କୁ ନିଲମ୍ବିତ କରାଯାଇଥିଲା । ୨୦୨୦ରେ କ୍ୟାପିଟାଲ ଥାନାରେ ଏସ୍ଆଇ ରାକେଶ ସାମଲ ଓ ଅନ୍ୟ କିଛି ପୁଲିସ୍ କର୍ମଚାରୀ ଥାନାର ମାଲଖାନାରୁ ଗୋଟିଏ କାର୍ ଓ ଗୋଟିଏ ବାଇକ୍ ବିକ୍ରି କରି ଦେଇଥିଲେ । ସେ ୨ଟି ଗାଡ଼ିର କେହି ଦାବିଦାର ନଥିବାରୁ ଏସ୍ଆଇ ଏମିତି କରିଥିଲେ । ଘଟଣା ପଦାକୁ ଆସିବା ପରେ ତାଙ୍କୁ ପ୍ରଥମେ ବଦଳି ଓ ପରେ ନିଲମ୍ବନ କରାଯାଇଥିଲା । ଏହି ୩ଟି ଘଟଣା ନୁହେଁ କମିଶନରେଟ୍ ପୁଲିସ୍ର ସବୁ ଥାନାରେ ଏମିତି ଅନେକ ଘଟଣା ରହିଛି । କିଛି ପଦାକୁ ଆସିଛି । କିଛି ଚାପି ଦେଇଛନ୍ତି ।
କୌଣସି ମାମଲାରେ ଗାଡ଼ି ଜବତ ହେଲେ ତାହା କୋର୍ଟର ସମ୍ପତ୍ତି ହୋଇଯାଏ । ହେଲେ ଗାଡ଼ିର ତଦାରଖ ଦାୟିତ୍ୱ ଥାନାର ମାଲଖାନା ଇନ୍ଚାର୍ଜ ଓ ଥାନା ଅଧିକାରୀ ନେଇଥାନ୍ତି । ଜବତ ଗାଡ଼ିରେ ଯଦି କିଛି ଏପାଖସେପାଖ ହୁଏ ତା’ହେଲେ ଏହି ୨ ଜଣ ଦାୟୀ ରହିବେ । ଗାଡ଼ି ଜବତ କରିବା ପରେ ପୁଲିସ୍ ଥାନା କ୍ୟାମ୍ପସ୍ ବାହାରେ ଓ ଭିତରେ ରଖିଦେଇ କାମ ସାରିଦିଅନ୍ତି । ସେ ଗାଡ଼ିରୁ ଯଦି ଯନ୍ତ୍ରାଂଶ ଚୋରି ହୁଏ ତାକୁ ଦେଖିବାକୁ କେହି ନଥାନ୍ତି । କାହାର ନୂଆ ଗାଡ଼ି ଜବତ ହେଲେ ସେ ଗାଡ଼ି ଥାନାରୁ ରିଲିଜ୍ ହେଲାବେଳକୁ ସେଥିରୁ ଅନେକ ଯନ୍ତ୍ରାଂଶ ଗାଏବ ହୋଇ ଯାଇଥାଏ । ଏହା ପଛରେ ଥାନାର କିଛି କର୍ମଚାରୀଙ୍କ ହାତ ଥାଏ । ଥାନା କର୍ମଚାରୀଙ୍କ ବିନା ସହଯୋଗରେ ଏମିତି ଚୋରି କରିବା କାଠିକର ପାଠ ।
ନିୟମଦୃଷ୍ଟିରୁ ଥାନାର ମାଲାଖାନାରେ ଯଦି ଗାଡ଼ି ରଖିବାକୁ ଜାଗା ନଥାଏ ତା’ହେଲେ ଥାନା ଅଧିକାରୀ କିମ୍ବା ମାଲଖାନା ଇନ୍ଚାର୍ଜ ଏ ବିଷୟରେ ଡିସିପି/ଏସ୍ପିଙ୍କୁ ଜଣାଇବେ । ହେଲେ ସେମିତି କିଛି କରୁନାହନ୍ତି ।
ଜବତ କରିବା ପରେ ଗାଡ଼ି ସେମିତି ଫୋପାଡ଼ି ଦେଉଛନ୍ତି । ବର୍ତ୍ତମାନ ସୁଦ୍ଧା କମିଶନରେଟ୍ ପୁଲିସ୍ର ବିଭିନ୍ନ ଥାନାରେ ୧୨ ହଜାରରୁ ଅଧିକ ଗାଡ଼ି ପଡ଼ିରହିଛି । ସର୍ବାଧିକ ଗାଡ଼ି ଖରାବର୍ଷାରେ ଖତ ଖାଉଛି । ଜବତ ହୋଇଥିବା ଗାଡିକୁ ରିଲିଜ କରିବାକୁ ଆସିବାବେଳେ ଯନ୍ତ୍ରାଂଶ ନଥିଲେ ବି ପୁଲିସ୍କୁ ଡରି ସେମିତି ଗାଡ଼ି ନେଇପଳାନ୍ତି । ହେଲେ ଆଉ କିଛି ଥାନ୍ତି ଯେଉଁମାନଙ୍କ ଗାଡ଼ିରୁ ଯଦି କିଛି ଯନ୍ତ୍ରାଂଶ ଚୋରି ହୋଇଥାଏ ସେମାନେ ପୁଲିସ୍କୁ କୋର୍ଟର ଭୟ ଦେଖାନ୍ତି । ଫଳରେ ମାଲଖାନା ଇନ୍ଚାର୍ଜ ତାଙ୍କୁ କ୍ଷତିପୂରଣ ଦେଇ ବିଦା କରନ୍ତି ।