ନୂଆଦିଲ୍ଲୀ: ଭାରତୀୟ ହକି ଟିମ୍ ପ୍ୟାରିସ୍ ଅଲିମ୍ପିକ୍ସରେ ସ୍ପେନ୍କୁ ହରାଇ ବ୍ରୋଞ୍ଜ ମେଡାଲ ଜିଣିଛି । ଅଲିମ୍ପିକ୍ସ ଇତିହାସରେ ଭାରତୀୟ ପୁରୁଷ ହକି ଟିମ୍ର ଏହା ୧୩ ତମ ମେଡାଲ । ଏହି ବିଜୟ ସହ ଅନୁଭବୀ ଗୋଲକିପର ପିଆର ଶ୍ରୀଜେଶ ଅନ୍ତର୍ଜାତୀୟ ହକିରୁ ବିଦାୟ ନେଇଛନ୍ତି । ପ୍ୟାରିସ ଅଲିମ୍ପିକ ଆରମ୍ଭ ହେବା ପୂର୍ବରୁ ସେ ନିଜର ଅବସର ନେଇ ଘୋଷଣା କରିଥିଲେ । ଶେଷରେ ଦଳକୁ ବ୍ରୋଞ୍ଜ ମେଡାଲ ମିଳିବା ପରେ ନିଜର ଯାତ୍ରା ଶେଷ କରିଛନ୍ତି ଶ୍ରୀଜେଶ । ହେଲେ ତାଙ୍କୁ ହକି ଇଣ୍ଡିଆ ବଡ଼ ଦାୟିତ୍ବ ଦେଇଛି ।
ଅବସର ନେଇଥିଲେ ବି ସେ ଭାରତୀୟ ହକି ଟିମ୍ ସହ ରହିବେ । ପିଆର ଶ୍ରୀଜେଶଙ୍କ ଅନୁଭବ ଏବଂ ତାଙ୍କର ଯୋଗଦାନକୁ ଦେଖି ହକି ଇଣ୍ଡିଆ ତାଙ୍କୁ ଜୁନିୟର ପୁରୁଷ ହକି ଟିମ୍ର ମୁଖ୍ୟ କୋଚ୍ ନିଯୁକ୍ତ କରିଛି । ଏନେଇ ହକି ଇଣ୍ଡିଆ ପକ୍ଷରୁ ଇନଷ୍ଟାଗ୍ରାମରେ ସୂଚନା ଦିଆଯାଇଛି । ପିଆର ଶ୍ରୀଜେଶଙ୍କ ଏକ ଫଟୋ ସହ ହକି ଇଣ୍ଡିଆ ଏକ ପୋଷ୍ଟରେ ଲେଖିଛି ଯେ, ‘ଜୁନିୟର ପୁରୁଷ ହକି ଟିମ୍ର ହେଡ କୋଚ୍ ଭାବରେ ଦାୟିତ୍ବ ସମ୍ଭାଳିବେ ପିଆର ଶ୍ରୀଜେଶ । ସବୁ ଯୁବ ଖେଳାଳିଙ୍କୁ ଆପଣ ପ୍ରେରଣା ଦିଅନ୍ତୁ । ଆପଣଙ୍କ ପ୍ରଶିକ୍ଷଣ ପାଇଁ ଆମେ ଅପେକ୍ଷା କରିଥିଲୁ ।’
୨୦୦୬ରେ ଭାରତୀୟ ସିନିୟର ହକି ଟିମରେ ଖେଳିବାର ସୁଯୋଗ ପାଇଥିଲେ ପିଆର ଶ୍ରୀଜେଶ । ନିଜର ୧୯ ବର୍ଷର କ୍ୟାରିୟରରେ ଶ୍ରୀଜେଶ ୪ ଥର ଅଲିମ୍ପିକ ଖେଳିଥିବା ବେଳେ ଦୁଇଟି ମେଡାଲ ଜିତିବାରେ ସଫଳ ହୋଇଛନ୍ତି । ଏହା ବ୍ୟତୀତ ସେ ଭାରତୀୟ ହକି ଟିମ୍ର ଅଧିନାୟକ ହୋଇଥିଲେ । ହକିରେ ଶ୍ରୀଜେଶଙ୍କ ଯୋଗଦାନ ଲାଗି ଭାରତ ସରକାର ତାଙ୍କୁ ୨୦୨୧ରେ ମେଜର ଧ୍ୟାନଚାନ୍ଦ ଖେଳ ରତ୍ନ ପରୁସ୍କାରରେ ସମ୍ମାନିତ କରିଥିଲେ ।
