ନୂଆଦିଲ୍ଲୀ,୨୯/୦୫: ଦେଶର ବିଭିନ୍ନ ସ୍ଥାନରେ ଅସହ୍ୟ ଗୀଷ୍ମ ପ୍ରବାହ ଲାଗି ରହିଥିବା ବେଳେ ଭାରତୀୟ ପାଣିପାଭ ବିଭାଗ (ଆଇଏମ୍ଡି) କହିଛି ଯେ, ଚଳିତବର୍ଷ ଜୁନ୍ ମାସରେ ସ୍ବାଭାବିକ ଠାରୁ ଅଧିକ ମାତ୍ରାରେ ବର୍ଷା ହେବ। ଆଇଏମ୍ଡିର କହିବା କଥା ହେଲା, ଜୁନ୍ରେ ପୂର୍ବୋତ୍ତର ଭାରତରେ ବର୍ଷାର ପ୍ରଭାବ କମ୍ ଦେଖିବାକୁ ମିଳିବ।
ଆଇଏମ୍ଡି ମହାନିର୍ଦ୍ଦେଶକ ମୃତ୍ୟୁଞ୍ଜୟ ମହାପାତ୍ର କହିଛନ୍ତି ଯେ, ଜୁନ୍ରୁ ସେପ୍ଟେମ୍ବର ମଧ୍ୟରେ ୧୦୬ ପ୍ରତିଶତ ବର୍ଷା ସମ୍ଭାବନା ରହିଛି। ସେ କହିଛନ୍ତି ଯେ, ଦିଲ୍ଲୀ,ହରିୟାଣା, ରାଜସ୍ଥାନ, ପଞ୍ଜାବ ଓ ଉତ୍ତରପ୍ରଦେଶରେ ସାମାନ୍ୟ ବର୍ଷା ହେବାର ସମ୍ଭାବନା ରହିଛି। ଏହିସବୁ ସ୍ଥାନରେ ୯୨ ପ୍ରତିଶତ ବର୍ଷା ହେବାର ସମ୍ଭାବନା ରହିଛି। ତେବେ ଜମ୍ମୁ-କଶ୍ମୀର,ଲଦାଖ, ଉତ୍ତରାଖଣ୍ଡ ଏବଂ ହିମାଚଳର କିଛିଅଞ୍ଚଳରେ ହାଲୁକାରୁ ମଧ୍ୟମ ଧରଣର ବର୍ଷା ହେବାର ସମ୍ଭାବନା ରହିଛି।
ଆଇଏମ୍ଡି ନିର୍ଦ୍ଦେଶକଙ୍କ ମୁତାବକ, ଓଡ଼ିଶା ଏବଂ ପଡ଼ୋଶୀ ପଶ୍ଚିମବଙ୍ଗ ଓ ଛତିଶଗଡ଼ ରାଜ୍ୟର ଅନେକ ସ୍ଥାନରେ କମ୍ ବର୍ଷା ହେବାର ସମ୍ଭାବନା ରହିଛି। ତେବେ ଚାଷବାସ ପାଇଁ ଚଳିତ ବର୍ଷର ମୌସୁମୀ ଅନୁକୁଳ ରହିବ ବୋଲି କହିଛନ୍ତି ଶ୍ରୀ ମହାପାତ୍ର।
