ଭଦ୍ରକ ୨୬/୦୨: ପାଣି ଠୋପେ ଦେଲେ ନାହିଁ । ପେଟକୁ ଖୁନ୍ଦା ମାରିଲେ । କିଛି ସମୟ ପରେ ଆଖିବୁଜିଲେ ଗର୍ଭବତୀ ମହିଳା । ପିଲା ମଧ୍ୟ ପେଟରେ ଅଛି । ଗର୍ଭବତୀଙ୍କ ମୃତ୍ୟୁ ପରେ ଅନେକ ରୋଗୀ ମେଡିକାଲ ଛାଡି ପଳାଇଛନ୍ତି । ଏଭଳି ଅଭାବନୀୟ ଘଟଣା ଭଦ୍ରକ ଜିଲ୍ଲା ମାତୃ ଶିଶୁ ସ୍ୱାସ୍ଥ୍ୟ ଶାଖା ରେ ଘଟିଛି । ମେଡିକାଲରେ ଉତ୍ତେଜନା ପ୍ରକାଶ ପାଇଛି।
ସୂଚନା ମୁତାବିକ, ଆଗରପଡା ଥାନା ଅନ୍ତର୍ଗତ ଅଣିଜ ଗାଁର ଶାନ୍ତିଲତା ଘଡେଇଙ୍କ ଗର୍ଭ ଯନ୍ତ୍ରଣା ହେବାରୁ ପ୍ରଥମେ ଆଗରପଡା ସ୍ୱାସ୍ଥ୍ୟ କେନ୍ଦ୍ରରେ ଭର୍ତ୍ତି କରିଥିଲେ । ସେଠାରୁ ଭଦ୍ରକ ମେଡିକାଲକୁ ସ୍ଥାନାନ୍ତର କରିଥିଲେ । ରାତି ୧୦ ଟାରେ ମେଡିକାଲରେ ଭର୍ତ୍ତି ହୋଇଥିଲେ। ତେବେ ନର୍ମାଲ ଡେଲିଭରି ପାଇଁ ମେଡିକାଲର ନର୍ସ କହିଥିବା ସମ୍ପର୍କୀୟ କହିଛନ୍ତି । ତେବେ କିଛି ସମୟ ପରେ ନର୍ସମାନେ ଗର୍ଭବତୀଙ୍କୁ ପେଟକୁ ଖୁନ୍ଦା ମାରିଥିଲେ ବୋଲି ଅଭିଯୋଗ ହୋଇଛି । ଖୁନ୍ଦା ମାରିବାର କିଛି ସମୟ ପରେ ପେଟରେ ପିଲା ଥାଇ ମା' ମୃତ୍ୟୁ ବରଣ କରିଛନ୍ତି । ଘଟଣାକୁ ନେଇ ପରିବାର ଲୋକେ ଗ୍ରାମାଞ୍ଚଳ ଥାନାରେ ଲିଖିତ ଅଭିଯୋଗ କରିଛନ୍ତି । ମେଡିକାଲରେ ଉତ୍ତେଜନା ଦେଖା ଦେଇଛି । ତେବେ ଡାକ୍ତର ଓ ନର୍ସଙ୍କୁ ଗିରଫ ନକଲେ ମୃତଦେହ ନେବେ ନାହିଁ ବୋଲି ପରିବାର ଲୋକେ ଅଡ଼ି ବସିଛନ୍ତି ।
