କିଭ୍: ୟୁକ୍ରେନ ରାଷ୍ଟ୍ରପତି ଭୋଲଡିମିର ଜେଲେନସ୍କି ନିଜର ସମସ୍ତ ବିଦେଶ ଗସ୍ତ ବାତିଲ କରିଦେଇଛନ୍ତି । ଉତ୍ତର ଖାରକିଭ୍ରେ ଋଷିଆ ଆକ୍ରମଣ ଜୋରଦାର କରୁଥିବା ବେଳେ ହଠାତ ଭୋଲଡିମିର ଜେଲେନସ୍କିଙ୍କ ବିଦେଶ ଗସ୍ତ ବାତିଲ ହେବାକୁ ନେଇ ବିଶ୍ବରେ ଚର୍ଚ୍ଚା ଆରମ୍ଭ ହୋଇଯାଇଛି । ସମସ୍ତ ବିଦେଶ କାର୍ଯ୍ୟକ୍ରମ ଲାଗି ନୂଆ ତାରିଖ ଠିକ୍ କରିବାକୁ ୟୁକ୍ରେନ ରାଷ୍ଟ୍ରପତି କହିଛନ୍ତି ବୋଲି ପ୍ରେସ୍ ସଚିବ ସର୍ଜି ନିକିଫୋରୋଭ ଫେସବୁକରେ ସୂଚନା ଦେଇଛନ୍ତି ।
ଦୁଇ ବର୍ଷରୁ ଅଧିକ ସମୟ ଧରି ଋଷ-ୟୁକ୍ରେନ୍ ଯୁଦ୍ଧ ଜାରି ରହିଛି । କେତେବେଳେ ଯୁଦ୍ଧର ତୀବ୍ରତା କମୁଛି ତ ପୁଣି କେତେବେଳେ ଆକ୍ରମଣାତ୍ମକ ଢ଼ଙ୍ଗରେ ୟୁକ୍ରେନର ବିଭିନ୍ନ ସହରକୁ ଟାର୍ଗେଟ କରୁଛି ଋଷୀୟ ସେନା । ଏବେ ଖାରକିଭରେ ଋଷିଆ ସେନା ଆକ୍ରମଣକୁ ଜୋରଦାର କରିବା ପରେ ୟୁକ୍ରେନ ପାଇଁ ନୂଆ ଆହ୍ବାନ ସୃଷ୍ଟି ହୋଇଛି । ସେଠାରେ ଗୋଟିଏ ଗାଁକୁ କବଜା କରିନେବା ସହ ୟୁକ୍ରେନର ସୈନ୍ୟ ଠିକଣା ଉପରେ ରକେଟ ମାଡ କରିଛି ଋଷିଆ ।
କେବଳ ସେତିକି ନୁହେଁ, ଋଷ ସେନା ୟୁକ୍ରେନ୍ର ଅନେକ ଡ୍ରୋନ୍କୁ ଧ୍ବଂସ କରିଛି । ଆର୍ମି ଟାକ୍ଟିକାଲ୍ ମିସାଇଲ ଏବଂ ଏରିୟଲ୍ ବୋମା ନଷ୍ଟ କରିପକାଇଛି ଋଷ । ୟୁକ୍ରେନ ସେନାର ଜେନେରାଲ୍ ଷ୍ଟାଫ୍ କହିଛନ୍ତି ଯେ, ଖାରକିଭ୍ରେ ଋଷିଆ ଜୋରଦାର ଆକ୍ରମଣ ଜାରି ରଖିଥିବା ବେଳେ ୟୁକ୍ରେନୀୟ ସେନା ମଧ୍ୟ ଏହାର ଜବାବ ଦେଉଛି । କିନ୍ତୁ ପରିସ୍ଥିତି ଅଣାୟତ୍ତ ହେବାରେ ଲାଗିଛି ବୋଲି ସେ କହିଛନ୍ତି ।
