ନୂଆଦିଲ୍ଲୀ: ପଞ୍ଜାବର ମୁକ୍ତସର ଠାରେ ମଙ୍ଗଳବାର ଅପରାହ୍ନରେ ଏକ ବଡ଼ ଦୁର୍ଘଟଣା ଘଟିଛି । ଭାରସାମ୍ୟ ହରାଇ ଏକ ଘରୋଇ ଯାତ୍ରୀବାହୀ ବସ୍ କେନାଲ ଭିତରକୁ ଖସି ପଡିବା କାରଣରୁ ୮ ଜଣଙ୍କର ମୃତ୍ୟୁ ଘଟିଛି । କିଛି ଯାତ୍ରୀ ନିଖୋଜ ରହିଥିବା ମଧ୍ୟ ଆଶଙ୍କା କରାଯାଉଛି । ବସ୍ରେ ୬୦ ରୁ ୬୫ ଜଣ ଯାତ୍ରୀ ଥିଲେ । ସେଥିମଧ୍ୟରୁ ୪୦ ଜଣଙ୍କୁ ଉଦ୍ଧାର କରାଯାଇଛି । ୧୧ ଜଣ ଯାତ୍ରୀ ଆହତ ହୋଇ ଡାକ୍ତରଖାନାରେ ଚିକିତ୍ସିତ ହେଉଛନ୍ତି । ଏହି ଦୁର୍ଘଟଣାରେ ମୁଖ୍ୟମନ୍ତ୍ରୀ ଭଗବଂତ ମାନ ଦୁଃଖ ପ୍ରକାଶ କରି ଆହତମାନଙ୍କୁ ଉପଯୁକ୍ତ ଚିକିତ୍ସା ପାଇଁ ନିର୍ଦ୍ଦେଶ ଦେଇଛନ୍ତି ।
ସୂଚନାଥାଉକି, ଯେ ଏହି ଦୁର୍ଘଟଣା କୋଟକପୁରା ରାସ୍ତାର ଝାବେଲୱାଲି ଗ୍ରାମ ନିକଟରେ ହୋଇଛି । ଏକ ଘରୋଇ କମ୍ପାନୀର ବସ୍ ହଠାତ୍ ସିରହିଣ୍ଡ କେନାଲରେ ଖସିପଡିଥିଲା। ଯାତ୍ରୀମାନଙ୍କ ଚିତ୍କାର ଶୁଣି ଲୋକମାନେ ପୋଲିସ ପ୍ରଶାସନକୁ ସୂଚନା ଦେଇ ଉଦ୍ଧାର କାର୍ଯ୍ୟ ଆରମ୍ଭ କରିଥିଲେ । ପରେ ପୋଲିସ ଏବଂ ଏନଡିଆରଏଫ ଘଟଣାସ୍ତଳରେ ପହଞ୍ଚି ଉଦ୍ଧାରକାର୍ଯ୍ୟ ଆରମ୍ଭ କରିଥିଲା । କୁହାଯାଉଛି ଯେ ଦୁର୍ଘଟଣା ସମୟରେ ବସର ବେଗ ଅଧିକ ଥିଲା । ବସଟି କେନାଲର ଲୁହା ଗ୍ରିଲକୁ ଭାଙ୍ଗି କେନାଲରେ ପଡ଼ିଯାଇଥିଲା ।
