ଇସଲାମାବାଦ,୧୦/୦୯: ପାକିସ୍ତାନର ପୂର୍ବତନ ପ୍ରଧାନମନ୍ତ୍ରୀ ଇମ୍ରାନ୍ ଖାନ୍ଙ୍କୁ ଜେଲରୁ ମୁକ୍ତ କରିବା ଦାବିରେ ତାଙ୍କର ହଜାର ହଜାର ସମର୍ଥକ ରାସ୍ତାକୁ ଓହ୍ଲାଇ ଆନ୍ଦୋଳନ ଆରମ୍ଭ କରିଛନ୍ତି । ରବିବାର ବିଳମ୍ବିତ ରାତିରେ ସେମାନେ ଜୋରଦାର ହଙ୍ଗାମା କରିଥିଲେ । ଇସଲାମାବାଦର ମୱେସି ମଇଦାନରେ ସଭା କରିବା ପାଇଁ ଯାଉଥିବା ବେଳେ ପୁଲିସ ସହ ସେମାନଙ୍କର ସଂଘର୍ଷ ହୋଇଥିଲା । ପୁଲିସ ସେମାନଙ୍କୁ ରୋକିଥିଲା । ଏହାପରେ ସେମାନେ ପୁଲିସ ଉପରେ ପଥର ମାଡ଼ କରିଥିଲେ । ଏହାଯୋଗୁ ଇସଲାମାବାଦର ଏଏସ୍ପି ଶୋଏବ ଖାନ୍ଙ୍କ ସମେତ ଦୁଇ ଡଜନେରୁ ଅଧିକ ପୁଲିସ କର୍ମୀ ଗୁରୁତର ଆହତ ହୋଇଛନ୍ତି ।
ଇମ୍ରାନ୍ଙ୍କ ସମର୍ଥକଙ୍କ ମଧ୍ୟରେ ପାକିସ୍ତାନ ତେହରିକ୍-ଏ-ଇନସାଫ (ପିଟିଆଇ) ଦଳର କାର୍ଯ୍ୟକର୍ତ୍ତାମାନେ ମଧ୍ୟ ସାମିଲ ଥିଲେ । ସେମାନେ ଶାହବାଜ ସରକାରଙ୍କୁ ୨ ସପ୍ତାହ ମହଲତ ଦେଇ ଇମ୍ରାନ୍ଙ୍କୁ ଜେଲରୁ ମୁକ୍ତ କରିବାକୁ କହିଛନ୍ତି । ଅନ୍ୟଥା ସେମାନେ ନିଜେ ଜେଲ ଭାଙ୍ଗି ଇମ୍ରାନ୍ଙ୍କୁ ମୁକ୍ତ କରିବେ ବୋଲି ଚେତାବନୀ ଦେଇଛନ୍ତି । ଆନ୍ଦୋଳନ ବେଳେ ଇମ୍ରାନ୍ଙ୍କ ସମର୍ଥକମାନେ ବିଭିନ୍ନ ସ୍ଥାନରେ ପୁଲିସ ବ୍ୟାରିକେଡ୍ ଭାଙ୍ଗିଛନ୍ତି । ବଡ଼ ବଡ଼ କଣ୍ଟେନରକୁ ବି ଓଲଟାଇ ଦେଇଛନ୍ତି ।
ଖାଇବର ପଖତୁନଖ୍ୱା ପ୍ରଦେଶର ମୁଖ୍ୟମନ୍ତ୍ରୀ ଅଲ୍ଲୀ ଅମୀନ କହିଛନ୍ତି, ଯଦି ଇମ୍ରାନ୍ଙ୍କୁ ୨ ସପ୍ତାହ ମଧ୍ୟରେ ଜେଲରୁ ମୁକ୍ତ କରା ନ ଯାଏ, ତେବେ ଆମେ ନିଜେ ତାଙ୍କୁ ମୁକୁଳାଇବୁ । ସେ ନିଜେ ଏହାର ନେତୃତ୍ୱ ନେବେ ଏବଂ ପ୍ରଥମ ଗୁଳି ଖାଇବାକୁ ବି ପଛାଇବେ ନାହିଁ ବୋଲି କହିଛନ୍ତି । ପାକିସ୍ତାନରେ ଫେବ୍ରୁଆରୀ ୮ରେ ନିର୍ବାଚନ ଫଳ ପ୍ରକାଶ ପାଇବା ପରଠାରୁ ଏହା ଇମ୍ରାନ୍ ଖାନ୍ଙ୍କ ଦଳର ପ୍ରଥମ ରାଲି ବୋଲି ଜଣାପଡ଼ିଛି ।
