ନୂଆଦିଲ୍ଲୀ,୩୦।୫: ପୁନେ ପୋର୍ସେ କାର ଦୁର୍ଘଟଣା ମାମଲାରେ ବଡ଼ ଖୁଲାସା। ଅଭିଯୁକ୍ତ ନାବାଳକ ଓ ତା’ର ପରିବାର ବିଷୟରେ ଦିନକୁ ଦିନ ହେବାରେ ଲାଗିଛି ନୂଆ ଖୁଲାସା। ଏବେ ଜଣାପଡିଛି ଯେ, ନାବାଳକ ଅଭିଯୁକ୍ତର ବ୍ଲଡ ସାମ୍ପଲ ତା’ ମା’ଙ୍କ ସହିତ ବଦଳା ଯାଇଛି। ନାବାଳକର ମା' ଶିବାନୀ ଅଗ୍ରୱାଲ ନିଜକୁ ପୁଅକୁ ବଞ୍ଚାଇବା ପାଇଁ ପୁନେର ସେସନ୍ ଜେନେରାଲ୍ ହସ୍ପିଟାଲରେ ତାଙ୍କ ରକ୍ତ ନମୁନା ଦେଇଥିଲେ। ଏହି ନମୁନାକୁ ତାଙ୍କ ପୁଅର ରକ୍ତ ନମୁନା ସହ ବଦଳାଇ ଦିଆଯାଇଥିଲା। ଏଥିପାଇଁ ହୋଇଥିଲା ୩ ଲକ୍ଷ ଟଙ୍କାର ଡିଲ୍।
ସୁତ୍ରରୁ ମିଳିଥିବା ସୂଚନା ଅନୁସାରେ, ବ୍ଲଡ ସାମ୍ପଲ ଡାକ୍ତର ଶ୍ରୀହରି ହଲନୋର ନେଇଥିଲେ। ହଲନୋର ମଧ୍ୟ ଡାକ୍ତର ଅଜୟ ତାବଡେ ଓ କର୍ମଚାରୀ ଅତୁଲ ଘାଟକାମ୍ବଲେଙ୍କ ସହିତ ଗିରଫ ହୋଇଛନ୍ତି। ସୋମବାର ପୋଲିସ ପ୍ରମାଣ ନଷ୍ଟ କରିବା ଓ ରକ୍ତ ନମୁନା ବଦଳା ଯିବା ଅଭିଯୋଗରେ ତାଙ୍କୁ ଗିରଫ କରିଥିଲା। ଡାକ୍ତରଙ୍କ ଗିରଫ ପରେ ଅଭିଯୁକ୍ତର ମା’ ଶିବାନୀ ଅଗ୍ରଓ୍ବାଲ ଫେରାର ହୋଇଯାଇଛନ୍ତି।
ଉଲ୍ଲେଖନୀୟ ଯେ, ମେ' ୧୯ ତାରିଖରେ ପୁଣେର ଅଭିଯୁକ୍ତ ନାବାଳକ ରେଷ୍ଟୁରାଣ୍ଟ ଓ କ୍ଲବରେ ସାଙ୍ଗମାନଙ୍କ ସହ ମିଶି ଖୁବ୍ ମଦ ପିଇଥିଲା। ଏହାପରେ ନିଶାଶକ୍ତ ଅବସ୍ଥାରେ ପୁନେର କଲ୍ୟାଣ ନଗର ଅଞ୍ଚଳରେ ଦ୍ରୁତ ଗତିରେ ପୋର୍ସ କାର୍ ଚଳାଇ ଏକ ବାଇକ୍କୁ ଧକ୍କା ଦେଇଥିଲେ। ଏଥିରେ ଦୁଇ ଆଇଟି ପ୍ରଫେସନାଲଙ୍କ ମୃତ୍ୟୁ ହୋଇଥିଲା। ଏହି ମାମଲାରେ ପୁଲିସ ନାବାଳକ ଅଭିଯୁକ୍ତର ବିଲ୍ଡର ବାପା, ଜେଜେ ବାପାଙ୍କ ସହ ୧୦ରୁ ୧୨ଜଣଙ୍କୁ ଗିରିଫ କରିସାରିଲାଣି। ସେହିପରି ଅଭିଯୁକ୍ତକୁ ଏବେ ବାଳସୁଧାର ଗୃହକୁ ପଠାଇ ଦିଆଯାଇଛି।
