ପୁରୀ,୦୭/୦୫: ଶ୍ରୀମନ୍ଦିର ରତ୍ନଭଣ୍ଡାରରେ ଥିବା ମୂଲ୍ୟବାନ ବସ୍ତୁ ଓ ଅଳଙ୍କାର ଗଣତିମଣତି (ତାଲିକା ପ୍ରସ୍ତୁତି ତଦାରଖ) ନେଇ ସରକାର ଗଠନ କରିଥିବା କମିଟିର ଦ୍ୱିତୀୟ ବୈଠକ ଆସନ୍ତା ୯ ତାରିଖରେ ଶ୍ରୀମନ୍ଦିର କାର୍ଯ୍ୟାଳୟରେ ଅନୁଷ୍ଠିତ ହେବ । କମିଟି ଅଧ୍ୟକ୍ଷ ତଥା ସୁପ୍ରିମକୋର୍ଟର ପୂର୍ବତନ ବିଚାରପତି ଜଷ୍ଟିସ୍‌ ଅରିଜିତ୍‌ ପଶାୟତଙ୍କ ଅଧ୍ୟକ୍ଷତାରେ ଏହି ବୈଠକ ହେବ । ଏଥିରେ ୧୨ ଜଣ ସଦସ୍ୟ ଯୋଗ ଦେବେ । ଶ୍ରୀମନ୍ଦିର ପରିଚାଳନା କମିଟି ବୈଠକରେ ରଥଯାତ୍ରା ବେଳେ ରତ୍ନଭଣ୍ଡାର ଖୋଲି ଯାଞ୍ଚ ନେଇ ନିଷ୍ପତ୍ତି ହୋଇସାରିଛି । ତେଣୁ ଜଷ୍ଟିସ୍‌ ପଶାୟତଙ୍କ ଅଧ୍ୟକ୍ଷତାରେ ବସିବାକୁ ଥିବା ଦ୍ୱିତୀୟ ବୈଠକରେ ପରବର୍ତ୍ତୀ ନିଷ୍ପତ୍ତି କ’ଣ ନିଆଯାଉଛି ତାହା ଉପରେ ସମସ୍ତଙ୍କ ନଜର ରହିଛି । 

ସୂଚନାଥାଉକି, ୧୯୨୬ ମସିହାରେ ରତ୍ନଭଣ୍ଡାର ଅଳଙ୍କାର ଗଣତିମଣତି ରେକର୍ଡ ପ୍ରସ୍ତୁତ ହୋଇଥିଲା । ପରେ ୧୯୭୮ରେ ଗଣତିମଣତି ହୋଇଥିଲା । ପରେ ୧୯୮୨ ଓ ୧୯୮୫ରେ ଦୁଇଥର ଆଂଶିକ ଗଣତିମଣତି ହୋଇଥିଲା । ଏହା ପରେ ରତ୍ନଭଣ୍ଡାର ରତ୍ନ ଗଣତିମଣତି ଆଦୌ ହୋଇନି । ପ୍ରଥମ ବୈଠକ ପରେ ଜଷ୍ଟିସ୍‌ ପଶାୟତ କହିଥିଲେ, ୧୯୭୮ରେ ହୋଇଥିବା ଗଣତି ରିପୋର୍ଟ ପାଇବା ପରେ ଆଲୋଚନା ହେବ । ୧୯୭୮ ପରବର୍ତ୍ତୀ ସମୟରେ ରତ୍ନଭଣ୍ଡାରରେ ଆଉ କ’ଣ ରତ୍ନ ରଖାଯାଇଛି ଓ କ’ଣ ନାହିଁ (ଥିଲା କିନ୍ତୁ ମିଳୁନି) ସେନେଇ ଆଲୋଚନା ହେବ ବୋଲି ସେ କହିଥିଲେ । 

ପ୍ରତି ୩ ବର୍ଷରେ ଥରେ ରତ୍ନଭଣ୍ଡାର ଖୋଲି ରତ୍ନ ଯାଞ୍ଚ ନିମନ୍ତେ ରହିଥିବା ଶ୍ରୀମନ୍ଦିର ଆଇନକୁ ପାଳନ କରିବାକୁ ଲୋକେ ବାରମ୍ବାର ଦାବି କରୁଥିଲେ ହେଁ ସରକାର ଏହା ଉପରେ ଦୃଷ୍ଟି ଦେଉନାହାନ୍ତି । ସେହିପରି ରତ୍ନଭଣ୍ଡାର ଭିତର ଭାଙ୍ଗିରୁଜି ପଡ଼ିଥିଲେ ହେଁ ଏହାର ରକ୍ଷଣାବେକ୍ଷଣ ନିମନ୍ତେ ମଧ୍ୟ ପଦକ୍ଷେପ ନିଆ ନଯିବା ସରକାରୀ ଦାୟିତ୍ୱହୀନତା ଉପରେ ପ୍ରଶ୍ନବାଚୀ ସୃଷ୍ଟି କରିଛି । ବିଜେପି ପକ୍ଷରୁ ରତ୍ନଭଣ୍ଡାର ଖୋଲି ରତ୍ନମଣତି କରିବା ଓ ରତ୍ନଭଣ୍ଡାର ସୁରକ୍ଷା ନେଇ ସଂକଳ୍ପପତ୍ରରେ ଘୋଷଣା କରିବା ପରେ ଏହା ଏବେ ରାଜନୈତିକ ପ୍ରମୁଖ ପ୍ରସଙ୍ଗ ହୋଇଯାଇଛି ।