ଭବାନୀପାଟଣା,୩୦/୦୯: ଭବାନୀପାଟଣାସ୍ଥିତ ବିନାୟକ ବେସରକାରୀ କଲେଜରୁ ରାଗିଂର ଭୟାନକ ଚିତ୍ର ପଦାକୁ ଆସିଛି । ଯୁକ୍ତ ୨ କଳା ଶେଷ ବର୍ଷର ଜଣେ ଛାତ୍ରଙ୍କୁ କେତେଜଣ ସହପାଠୀ ପ୍ରାୟ ୭ଦିନ ଧରି ଅକଥନୀୟ ନିର୍ଯାତନା ଦେବା ସହ ତିନି ମହଲା ଛାତରୁ ତଳକୁ ଠେଲି ଦେଇଛନ୍ତି । ଗୁରୁତର ଛାତ୍ର ସଦର ଥାନା ଅନ୍ତର୍ଗତ ଗବରା ଗାଁର ଅଙ୍କେଶ ବାଗ୍ (୧୬)ଙ୍କୁ ସହିଦ ରେଣ୍ଡା ମାଝି ମେଡିକାଲ କଲେଜ ତଥା ଜିଲ୍ଲା ମୁଖ୍ୟ ଡାକ୍ତରଖାନାର ସର୍ଜରୀ ୱାର୍ଡରେ ଭର୍ତ୍ତି କରାଯାଇଛି । ଏନେଇ ଛାତ୍ରଙ୍କ ବାପା ଥାନାରେ ଅଭିଯୋଗ କରିବା ପରେ ପୁଲିସ୍ ଘଟଣାର ତଦନ୍ତ ଆରମ୍ଭ କରିଛି ।
ଛାତ୍ରଙ୍କ ପରିବାର ଲୋକଙ୍କ କହିବା କଥା, ଅଙ୍କେଶ ବିନାୟକ ବେସରକାରୀ କଲେଜ ଛାତ୍ରାବାସରେ ରହି ଯୁକ୍ତ ଦୁଇ ଦ୍ୱିତୀୟ ବର୍ଷ କଳାରେ ପାଠ ପଢୁଥିଲେ । ପ୍ରାୟ ସପ୍ତାହେ ହେଲା କଲେଜର ୮-୯ଜଣ ସହପାଠୀ ତାଙ୍କୁ କୌଣସି କାରଣରୁ ରାଗିଂ କରୁଥିଲେ । ନିସ୍ତୁକ ପିଟି ଭିଡିଓ ରେକର୍ଡିଂ କରିଥିଲେ । ତେବେ ଅଙ୍କେଶ କୌଣସି ପ୍ରକାରେ ଉକ୍ତ ଭିଡିଓ ସଂଗ୍ରହ କରିନେଇଥିଲେ । ଏ ନେଇ କଲେଜ କର୍ତ୍ତୃପକ୍ଷଙ୍କୁ ଅବଗତ କରାଇଥିବା ସତ୍ତେ୍ୱ ସୁଫଳ ମିଳି ନ ଥିଲା । ସହପାଠୀଙ୍କ ନିର୍ଯାତନା ବଢ଼ିବାରୁ ସେ ଉକ୍ତ ଭିଡିଓକୁ ଜୟପୁରରେ ରହୁଥିବା ସାନଭାଇଙ୍କ ନିକଟକୁ ପଠାଇଥିଲେ । ସାନ ଭାଇଙ୍କ ଠାରୁ ଘର ଲୋକେ ଏ ସଂକ୍ରାନ୍ତରେ ସୂଚନା ପାଇଥିଲେ ।
ଏହି ଘଟଣା ପ୍ରଘଟ ହେବା ପରେ ରାଗିଂରେ ସମ୍ପୃକ୍ତ ଛାତ୍ରଙ୍କୁ ଘାରିଥିଲା କାର୍ଯ୍ୟାନୁଷ୍ଠାନ ଭୟ । ସେମାନେ ଅଙ୍କେଶଙ୍କୁ ଉକ୍ତ ଭିଡିଓ ଡିଲିଟ୍ କରିବାକୁ ଚାପ ପକାଇଥିଲେ । ରବିବାର ରାତି ପ୍ରାୟ ୯ଟାରେ ସେମାନେ ତାଙ୍କୁ ହଷ୍ଟେଲର ୩ ମହଲା କୋଠା ଉପରକୁ ଟାଣି ନେଇଥିଲେ। ସେଠାରେ ମଧ୍ୟ ଭିଡିଓ ଡିଲିଟ୍ କରିବା କଥା ଦୋହରାଇଥିଲେ । ଏଥିରେ ପ୍ରତିବାଦ କରିବାରୁ ଅଙ୍କେଶଙ୍କୁ ତଳକୁ ଠେଲି ଦେଇଥିଲେ । ସୂଚନା ପାଇ କଲେଜ କର୍ତ୍ତୃପକ୍ଷ ପହଞ୍ଚି ଗୁରୁତର ଅବସ୍ଥାରେ ଛାତ୍ର ଅଙ୍କେଶଙ୍କୁ ଡାକ୍ତରଖାନାକୁ ଆଣିଥିଲେ । ହେଲେ ପୁଲିସ୍ ଭୟରେ କର୍ମଚାରୀମାନେ ଛାତ୍ରଙ୍କୁ ଛାଡ଼ି ପଳାଇଥିଲେ । ସୂଚନା ପାଇ ଘର ଲୋକେ ଡାକ୍ତରଖାନାରେ ପହଞ୍ଚିଛନ୍ତି । ଏହାକୁ ନେଇ ଡାକ୍ତରଖାନାରେ ଚାପା ଉତ୍ତେଜନା ପ୍ରକାଶ ପାଇଥିଲା । କଲେଜ କର୍ତ୍ତୃପକ୍ଷଙ୍କ ନୀରବତାରୁ ପୁଅ ଏଭଳି ନିର୍ଯାତନାର ଶିକାର ହୋଇଥିବା ଅଭିଯୋଗ କରିଛନ୍ତି।
ଅଙ୍କେଶଙ୍କ ଦୁଇ ଗୋଡ଼ରେ ଗୁରୁତର ଆଘାତ ଲାଗିଛି । ସେ ଚାଲିପାରୁନାହାନ୍ତି । ଡାକ୍ତର ତାଙ୍କର ପରୀକ୍ଷା କରୁଛନ୍ତି । ଅନ୍ୟପଟେ ଅଙ୍କେଶଙ୍କ ବାପାଙ୍କଠାରୁ ସୂଚନା ପାଇ ପୁଲିସ୍ ପହଞ୍ଚି ତଦନ୍ତ ଆରମ୍ଭ କରିଛି । ଖବର ଲେଖାଯିବା ସୁଦ୍ଧା କଲେଜ କର୍ତ୍ତୃପକ୍ଷ ମଧ୍ୟ ଡାକ୍ତରଖାନାରେ ପହଞ୍ଚିଥିବା ଜଣାପଡ଼ିଛି ।
