ଭୁବନେଶ୍ୱର,୧୮/୦୫: ଓଡ଼ିଶାକୁ ପୁଣି ଆସିବେ କଂଗ୍ରେସର ବରିଷ୍ଠ ନେତା ରାହୁଲ ଗାନ୍ଧି । ଭଦ୍ରକର ବିଶାଳ ସମାବେଶରେ ଯୋଗ ଦେବେ। ଭଦ୍ରକରେ ଅସିତ୍ ପଟ୍ଟନାୟକ ଓ ଭଣ୍ଡାରିପୋଖରୀରେ ପୂର୍ବତନ ପିସିସି ସଭାପତି ନିରଞ୍ଜନ ପଟ୍ଟନାୟକ ପ୍ରାର୍ଥୀ ହୋଇଛନ୍ତି । ଦୁଇ ଜଣ କଡ଼ା ଟକ୍କର ଦେଉଛନ୍ତି । ତେଣୁ ଏହି ୨ ନିର୍ବାଚନମଣ୍ଡଳୀର କୌଣସି ଏକ ସ୍ଥାନରେ ଆସନ୍ତା ସପ୍ତାହରେ ରାହୁଲଙ୍କ ବିଶାଳ ସମାବେଶ ହେବ ବୋଲି ବରିଷ୍ଠ କଂଗ୍ରେସ ନେତା ସୂଚନା ଦେଇଛନ୍ତି ।
ସେହିପରି ଏଆଇସିସି ସାଧାରଣ ସମ୍ପାଦକ, ଛତିଶଗଡ଼ ପ୍ରଭାରୀ ତଥା ପୂର୍ବତନ କେନ୍ଦ୍ରମନ୍ତ୍ରୀ ସଚିନ ପାଇଲଟ ଶନିବାର ଓଡ଼ିଶା ଆସିବେ । ବାଲେଶ୍ୱର ସହରର ପୁଲିସ୍ ଲାଇନ୍ ପଡ଼ିଆରେ ଅନୁଷ୍ଠିତ ହେବାକୁ ଥିବା ବିଶାଳ ସମାବେଶରେ ଯୋଗ ଦେବେ । ସେଠାରେ କଂଗ୍ରେସର ଲୋକସଭା ପ୍ରାର୍ଥୀ ଶ୍ରୀକାନ୍ତ ଜେନାଙ୍କ ପାଇଁ ପ୍ରଚାର କରିବେ । ସେଠାରୁ ଭୋଗରାଇ ନିର୍ବାଚନମଣ୍ଡଳୀ ଯିବେ । ଥାନା ଛକରେ ଅପରାହ୍ଣ ୨ଟା ୪୫ରେ ଅନୁଷ୍ଠିତ ସାଧାରଣ ସଭାରେ ବକ୍ତବ୍ୟ ରଖିବେ । ବିଧାୟକ ପ୍ରାର୍ଥୀ ସତ୍ୟଶିବ ଦାସଙ୍କ ପାଇଁ ଭୋଟ୍ ମାଗିବେ । ବାଲେଶ୍ୱରରୁ ଫେରି ଭୁବନେଶ୍ୱର କଂଗ୍ରେସ ଭବନରେ ସନ୍ଧ୍ୟା୬ଟାରେ ହେବାକୁ ଥିବା ସାମ୍ୱାଦିକ ସମ୍ମିଳନୀରେ ଯୋଗ ଦେବେ ବୋଲି ପିସିସି ଗଣମାଧ୍ୟମ ଓ ଯୋଗାଯୋଗ ଅଧ୍ୟକ୍ଷ ବିଶ୍ୱରଞ୍ଜନ ମହାନ୍ତି ସୂଚନା ଦେଇଛନ୍ତି ।
ଆସନ୍ତା ୨୪ ତାରିଖରେ ଓଡ଼ିଶା ଆସିବେ ଏଆଇସିସି ଗଣମାଧ୍ୟମ ଓ ଯୋଗାଯୋଗ ବିଭାଗ ଅଧ୍ୟକ୍ଷ ପବନ ଖେରା । ସେ ବାଲେଶ୍ୱର ଓ ଭଦ୍ରକ ଜିଲ୍ଲାର ବିଭିନ୍ନ କାର୍ଯ୍ୟକ୍ରମରେ ଯୋଗ ଦେବେ । ସେହିପରି ଚଳିତ ମାସ ଶେଷ ସପ୍ତାହରେ ଓଡ଼ିଶା ଆସିବେ ଏଆଇସିସି ସଂଖ୍ୟାଲଘୁ ସେଲ୍ ରାଷ୍ଟ୍ରୀୟ ଅଧ୍ୟକ୍ଷ ତଥା ରାଜ୍ୟସଭା ସାଂସଦ ଇମ୍ରାନ ପ୍ରତାପ ଗଡ଼ି । ବିଶେଷ କରି ଭଦ୍ରକ ଓ ବାଲେଶ୍ୱରର ବିଭିନ୍ନ ଆସନରେ ସଂଖ୍ୟାଲଘୁ ଭୋଟରଙ୍କ ସଂଖ୍ୟା ଅଧିକ ଥିବାରୁ କଂଗ୍ରେସ ସେହି ଭୋଟ୍ ବ୍ୟାଙ୍କକୁ ନିଜ ଆଡ଼କୁ ଟାଣିବା ପାଇଁ ଇମ୍ରାନଙ୍କ କାର୍ଯ୍ୟକ୍ରମ ରଖିଛି । ଥିରୁବନ୍ତପୁରମର ସାଂସଦ ତଥା ବରିଷ୍ଠ କଂଗ୍ରେସ ନେତା ଶଶି ଥରୁର୍ ମଧ୍ୟ ପ୍ରଚାର ପାଇଁ ଓଡ଼ିଶା ଆସିବେ ବୋଲି ବରିଷ୍ଠ କଂଗ୍ରେସ ନେତା ସୂଚନା ଦେଇଛନ୍ତି ।
