ନୂଆଦିଲ୍ଲୀ,୨୦/୦୮: ଲୋକସଭାରେ ବିରୋଧୀ ଦଳ ନେତା ତଥା କଂଗ୍ରେସ ସାଂସଦ ରାହୁଲ ଗାନ୍ଧୀ ସୋମବାର ରାଜଧାନୀ ଦିଲ୍ଲୀରେ ନିଜ ଗାଡ଼ିରୁ ଓହ୍ଲାଇ ଉବର୍ କ୍ୟାବ୍ରେ ଯାତ୍ରା କରିଛନ୍ତି । ସେ ନିଜ ମୋବାଇଲ୍ ଫୋନ୍ରୁ ୧୦ ଜନପଥ ମାର୍ଗ ଯିବା ପାଇଁ କ୍ୟାବ୍ ବୁକ୍ କରିଥିଲେ। କ୍ୟାବ୍ ପହଞ୍ଚିବା ପରେ ରାହୁଲ ସେଥିରେ ଯାତ୍ରା କରିଥିଲେ । ଏଥିଲାଗି ସେ ଚାଳକଙ୍କୁ ୪୩୮ ଟଙ୍କା ଭଡ଼ା ବାବଦରେ ପ୍ରଦାନ କରିଥିଲେ । ଉବର୍ କ୍ୟାବ୍ରେ ରାହୁଲ ଚାଳକଙ୍କ ପାଖ ସିଟ୍ରେ ବସିଥିଲେ । ଯାତ୍ରା ସମୟରେ ସେ ତାଙ୍କ ସହ ବିଭିନ୍ନ ପ୍ରସଙ୍ଗରେ ଆଲୋଚନା କରିଥିଲେ। ଏ ନେଇ ରାହୁଲ ପ୍ରାୟ ୧୨ ମିନିଟ୍ର ଏକ ଭିଡିଓ ସୋସିଆଲ୍ ମିଡିଆରେ ପୋଷ୍ଟ କରିଛନ୍ତି ।
କ୍ୟାବ୍ରେ ବସିବା କ୍ଷଣି ରାହୁଲ ଚାଳକଙ୍କୁ ତାଙ୍କ ନାମ ପଚାରିଥିଲେ। ଜବାବରେ ଚାଳକ ଜଣକ ନିଜ ନାମ ସୁନୀଲ ଉପାଧ୍ୟାୟ ଏବଂ ଘର ୟୁପିରେ ବୋଲି କହିଥିଲେ । ଏହାପରେ ରାହୁଲଙ୍କ ପ୍ରଶ୍ନର ଉତ୍ତର ଦେଇ ସୁନୀଲ ନିଜ ପାଠପଢ଼ା, ପରିବାର, ଗାଡ଼ି ଚାଳନା ଅଭିଜ୍ଞତା ଆଦି ସଂକ୍ରାନ୍ତରେ କହିଥିଲେ ।
ସୁନୀଲ ଆହୁରି କହିଥିଲେ, ସ୍ୱପ୍ନରେ ବି ଭାବି ନ ଥିଲି ଆପଣ ମୋ ଗାଡ଼ିରେ ବସିବେ । ଆପଣଙ୍କୁ କେବଳ ଟିଭିରେ ଦେଖିଥିଲି । ମୁଁ ନିଜ ଜୀବନର ପ୍ରଥମ ଭୋଟ୍ କଂଗ୍ରେସକୁ ଦେଇଥିଲି । ୬୦ ବର୍ଷ ଧରି କଂଗ୍ରେସ ସରକାର ଚାଲିଥିଲା । ଆରମ୍ଭରେ କିଛି ବି ନ ଥିଲା । ସବୁ କିଛି କଂଗ୍ରେସ ହିଁ ବନାଇଥିଲା । ଦିଲ୍ଲୀରେ ସମସ୍ତ ଫ୍ଲାଏ ଓଭର ଶିଲା ଦୀକ୍ଷିତ ବନାଇଥିଲେ । ଜବାବରେ ଠିକ୍ କହିଛ ବୋଲି ରାହୁଲ କହିଥିଲେ । ଯାତ୍ରା ପରେ ସୁନୀଲଙ୍କୁ ରାହୁଲ କିଛି ଉପହାର ଥିବା ବ୍ୟାଗ୍ ପ୍ରଦାନ କରିଥିଲେ । ଏହାପରେ ତାଙ୍କ ପରିବାର ଲୋକଙ୍କୁ ଭେଟି ସେମାନଙ୍କ ସହ ରେସ୍ତୋରାଁରେ ଜଳଖିଆ କରିଥିଲେ । ଜଳଖିଆରେ ଛୋଲେ ବଟୁରେ, ପାପଡ଼ି ଚାଟ୍, ଆଳୁ ଟିକ୍କି ଏବଂ ଗୁପ୍ଚୁପ୍ ଖାଇଥିଲେ । ରାହୁଲ ଡ୍ରାଇଭରଙ୍କ ପତ୍ନୀ ଓ ପିଲାଙ୍କ ସହ ବି କଥା ହୋଇଥିଲେ।
