କୋଲକାତା,୩୧।୧: କଂଗ୍ରେସରେ ପୂର୍ବତନ ଅଧ୍ୟକ୍ଷ ରାହୁଲ ଗାନ୍ଧୀଙ୍କ କାରକେଡ୍ ଉପରକୁ ଆକ୍ରମଣ ଖବର। ବୁଧବାର ରାହୁଲଙ୍କ ଏସୟୁଭିର ଉପରକୁ ପଥର ମାଡ କରିବା ଯୋଗୁଁ କାରର ପଛ ପଟ ଗ୍ଲାସ ସମ୍ପୂର୍ଣ୍ଣ ଭାଙ୍ଗି ଯାଇଥିବାର ଖବର ମିଳିଛି। କଂଗ୍ରେସ ନେତା ଅଧିର ରଞ୍ଜନ ଚୌଧୁରୀ ଆକ୍ରମଣ ହୋଇଥିବା କଥା କହିଥିଲେ। ତେବେ କଂଗ୍ରେସର ଏହି ଅଭିଯୋଗକୁ ଟିଏମ୍ସି ଖଣ୍ଡନ କରିବା ସହ କହିଥିଲା, ପଶ୍ଚିମବଙ୍ଗ ନୁହେଁ ବିହାରରେ ରାହୁଲଙ୍କ କାର ଉପରେ ଆକ୍ରମଣ ହୋଇଥିଲା। ମିଛରେ କଂଗ୍ରେସ ପଶ୍ଚିମବଙ୍ଗକୁ ବଦନାମ କରିବାକୁ ଚାହୁଁଛି। ରାହୁଲଙ୍କ କାର ଉପରେ ଆକ୍ରମଣ ବାବଦରେ ଏବେ କଂଗ୍ରେସ ସ୍ପଷ୍ଟୀକରଣ ଦେଇଛି। କଂଗ୍ରେସ କହିଛି ଏହା ଆକ୍ରମଣ ନୁହେଁ ଲୋକଙ୍କ ଭିଡ କାରଣରୁ ହୋଇଛି।
ସୋସିଆଲ ମିଡ଼ିଆ ପ୍ଲାଟଫର୍ମ ଏକ୍ସରେ କଂଗ୍ରେସ ପକ୍ଷରୁ ଲେଖାଯାଇଛି, ଭୁଲ ଖବରକୁ ନେଇ ସ୍ପଷ୍ଟିକରଣ… ପଶ୍ଚିମବଙ୍ଗ ମାଲଦାରେ ରାହୁଲଙ୍କୁ ଭେଟିବାକୁ ବିଶାଳ ଜନ ସମାଗମ ହୋଇଥିଲା। ଏହି ଭିଡ ଭିତରେ ଜଣେ ମହିଳା ରାହୁଲଙ୍କୁ ଭେଟିବାକୁ ତାଙ୍କ କାର ଆଗକୁ ଚାଲିଆସିଥିଲେ। ଏହି କାରଣରୁ ହଠାତ ବ୍ରେକ୍ ଲଗାଇବାକୁ ପଡିଥିଲା। ସେତେବେଳେ ସୁରକ୍ଷା ଘେରାରେ ବ୍ୟବହାର କରାଯାଇଥିବା ରସିରେ କାରର କାଚ ଭାଙ୍ଗି ଯାଇଥିଲା। ଜନନାୟକ ରାହୁଲ ଗାନ୍ଧୀଙ୍କ ଜନତାଙ୍କ ଉପରେ ହେଉଥିବା ଅନ୍ୟାୟ ବିରୋଧରେ ନ୍ୟାୟର ଯୁଦ୍ଧ ଲଢୁଛନ୍ତି। ଜନତା ତାଙ୍କ ସହିତ ରହିଛି, ଜନତା ସୁରକ୍ଷିତ ରଖିଛନ୍ତି।’
ଏହା ପୂର୍ବରୁ ଇଂରାଜୀ ଇଣ୍ଡିଆନ ଏକ୍ସପ୍ରେସ୍ର ରିପୋର୍ଟରେ କୁହାଯାଇଥିଲା ମାଲଦା ଜିଲ୍ଲାର ଲଭା ବ୍ରିଜ୍ ପାଖରେ ନ୍ୟାୟ ଯାତ୍ରା ଦେଖିବା ପାଇଁ ହଜାର ହଜାର ଭିଡ ଦେଖିବାକୁ ମିଳିଥିଲା। ଘଟଣା ସେତେବେଳେ ଘଟିଥିଲା, ଯେତେବେଳେ ରାହୁଲ ଯାତ୍ରା ବେଳେ ଏକ ବସ୍ରେ ଥିଲେ। ତାଙ୍କ କାରକେଡ୍ ଉପରେ ହୋଇଥିବା ଆକ୍ରମଣରେ କଳା ରଙ୍ଗର ଏସ୍ୟୁଭିର ପଛପଟେ ଥିବା ପୁରା କାଚ ଭାଙ୍ଗି ଯାଇଥିଲା।