ନୂଆଦିଲ୍ଲୀ: ଆସୁଛି ପାର୍ବଣ ଋତୁ । ଦଶହରା ଓ ଦୀପାବଳି ପାଇଁ ଚଳଚଞ୍ଚଳ ସାରା ଦେଶ । ଏହି ସମୟରେ ଟ୍ରେନ୍ ଯାତ୍ରୀଙ୍କ ସଂଖ୍ୟା ଆଶାତୀତ ବୃଦ୍ଧି ପାଇବ । ଏହାକୁ ନଜରରେ ରଖି ଭାରତୀୟ ରେଳ ପକ୍ଷରୁ ବିଶେଷ ଆୟୋଜନ ହୋଇଛି । ଏଥର ପାର୍ବଣରେ ପ୍ରାୟ ୬୦୦୦ ସ୍ବତନ୍ତ୍ର ଟ୍ରେନ୍ ଦୌଡ଼ିବ ବୋଲି କେନ୍ଦ୍ର ରେଳମନ୍ତ୍ରୀ ଅଶ୍ବିନୀ ବୈଷ୍ଣବ ସୂଚନା ଦେଇଛନ୍ତି । ସେପଟେ ୧୦୮ଟି ଟ୍ରେନ୍ରେ ଅତିରିକ୍ତ ବଗି ଲଗାଇଯାଇଛି । ଏହା ବ୍ୟତୀତ ପାର୍ବଣରେ ଭିଡ଼କୁ ଦେଖି ଆଉ ୧୨,୫୦୦ ବଗି ପ୍ରସ୍ତୁତ ରଖାଯାଇଛି ।
ବିଭିନ୍ନ ରେଳ ରୁଟ ବିଶେଷ କରି ବିହାର, ଉତ୍ତର ପ୍ରଦେଶ ଏବଂ ପଶ୍ଚିମବଙ୍ଗ ପାଇଁ ରେଳବାଇ ପକ୍ଷରୁ ବିଶେଷ ଧ୍ୟାନ ଦିଆଯାଉଛି । ଦୁର୍ଗା ପୂଜା, ଦୀପାବଳି ଏବଂ ଛଟ୍ ପୂଜା ଲାଗି ଏହି ୩ ରାଜ୍ୟକୁ ଲୋକଙ୍କ ସମାଗମ ଅଧିକ ହେବ । ଚଳିତ ବର୍ଷ ପାର୍ବଣ ଋତୁରେ ମୋଟ ୫,୯୭୫ଟି ସ୍ବତନ୍ତ୍ର ଟ୍ରେନ୍ର ବବ୍ୟସ୍ଥା କରାଯାଇଛି ବୋଲି ରେଳ ମନ୍ତ୍ରୀ କହିଛନ୍ତି । ଗତବର୍ଷ ଏହି ସମୟରେ ମୋଟ ୪,୪୨୯ଟି ସ୍ବତନ୍ତ୍ର ଟ୍ରେନ୍ର ବ୍ୟବସ୍ଥା ହୋଇଥିଲା ।
ଏହି ବର୍ଷ ସ୍ବତନ୍ତ୍ର ଟ୍ରେନ୍ ଦ୍ବାରା ଏକ କୋଟିରୁ ଅଧିକ ଯାତ୍ରୀଙ୍କୁ ସୁବିଧା ମିଳିବ ବୋଲି ଅଶ୍ବିନୀ ବୈଷ୍ଣବ ଏକ ସାମ୍ବାଦିକ ସମ୍ମିଳନୀରେ କହିଛନ୍ତି । ତେବେ ଚଳିତବର୍ଷ ଦୁର୍ଗା ପୂଜା ଅକ୍ଟୋବର ୯ରେ ଆରମ୍ଭ ହେବାକୁ ଥିବା ବେଳେ ଦୀପାବଳି ଅକ୍ଟୋବର ୩୧ରେ ପାଳନ ହେବ । ସେହିଭଳି ଛଟ୍ ପୂଜା ନଭେମ୍ବର ୭ ଓ ୮ ତାରିଖରେ ପାଳନ ହେବ ।
