ଆଜମେର,୨୯।୧୧: ହେଲିକପ୍ଟରରେ ଆସିଲା ବର,ଆଉ ବିବାହ କରି ଘରକୁ ନେଇଗଲେ ନିଜର ଜୀବନସାଥୀକୁ। ଯୌତୁକରେ ନେଲେ ମାତ୍ର ଏକ ଟଙ୍କା। ଏଭଳି ଏକ ନିଆରା ବିବାହ ରାଜସ୍ଥାନରେ ହୋଇଛି, ଯାହାକୁ ଲୋକେ ଖୁବ୍ ପ୍ରଶଂସା କରିଛନ୍ତି। ଚିତୋଡଗଡ ଜିଲ୍ଲାର ଅକୋଲା ଗାଁରୁ ବରଯାତ୍ରୀ ନେଇ କିଶନଗଢ(ଆଜମେର) ପହଁଞ୍ଚିଥିଲା ବର। ବହୁ ଦୂରରୁ ଲୋକମାନେ ହେଲିକପ୍ଟର ଦେଖିବାକୁ କିଶନଗଢ ପହଞ୍ଚିଥିଲେ। ଏହି ବିବାହ ଏବେ ଚର୍ଚ୍ଚାର ବିଷୟ ପାଲଟିଛି। ଖବର ଅନୁସାରେ, ଆଜାଦ ସମାଜ ପାର୍ଟିର ଜିଲ୍ଲା ଅଧ୍ୟକ୍ଷ ସୁନୀଲ ଧ୍ବଜାଙ୍କ ପୁଅ ବରଯାତ୍ରୀ ନେଇ କିଶନଗଢ ପହଁଞ୍ଚିଥିଲେ। ଯୌତୁକରେ କନ୍ୟା ପିତା ଯେତେବେଳେ ତାଙ୍କୁ ନଗଦ ଟଙ୍କା ଦେଇଥିଲେ, ସେ ମନା କରିଥିଲେ। ଏହାପରେ କନ୍ୟା ପିତାଠାରୁ ମାତ୍ର ଏକ ଟଙ୍କା ଓ ନଡିଆ ନେଇ ବିବାହ ରୀତିନୀତି ପାଳନ କରିଥିଲେ।
ଚିତୋଡଗଡର ଅକୋଲା ଗାଁରୁ ମୁକେଶଙ୍କ ବାହାଘର କିଶନଗଡରେ ରହୁଥିବା ସ୍ନେହାଙ୍କ ସହିତ ମଙ୍ଗଳବାର ହୋଇଥିଲା। ଏହାପରେ ମଙ୍ଗଳବାର ସନ୍ଧ୍ୟାରେ କିଶନଗଡରୁ ମୁକେଶଙ୍କ ସହିତ ସ୍ନେହାଙ୍କୁ ପରିବାର ଲୋକ ବିଦା କରିଥିଲେ। ସ୍ନେହାଙ୍କ ବାପା କହିଛନ୍ତି, ସବୁ ଝିଅଙ୍କୁ ତାଙ୍କ ବାପା ପାଠ ପଢାଇ ବଡ କରନ୍ତି। ହେଲେ ବାହାଘରରେ ଯୌତୁକକୁ ନେଇ ଚିନ୍ତା ରହିଥାଏ। ଜଣେ ବାପା ନିଜ ଝିଅକୁ ଦେଉଛି ତା ଠାରୁ ବଡ ଆଉ କ’ଣ ହୋଇପାରେ। ଆମେ ତ ଯୌତୁକର କଡା ବିରୋଧି। ତେଣୁ ଆମେ ବିନା ଯୌତୁକରେ ଝିଅର ବାହାଘର କରି ସମାଜକୁ ବାର୍ତ୍ତା ଦେଇଛୁ। ମୁଁ ବହୁତ ଖୁସି ଅଛି। ’
କିଶନଗଡରେ ସ୍ନେହାଙ୍କୁ ବିଦାୟ ଦେବା ବେଳେ ପୁରା ଗାଁ ଏକାଠି ହୋଇଯାଇଥିଲେ। ସେଭଳି ଯେତେବେଳେ ସ୍ନେହା ଶାଶୁଘର ଚିତୋଡଗଡର ଅକୋଲା ଗାଁରେ ପହଞ୍ଚିଥିଲେ ସେଠାରେ ବହୁ ସଂଖ୍ୟାରେ ଗାଁ ଲୋକ ପହଞ୍ଚି ଯାଇଥିଲେ। ହେଲିକପ୍ଟରକୁ ପ୍ରଶାସନିକ ଅନୁମତି ବିବାହ ସମାରୋହରେ ପାଇଁ ଦିଆଯାଇଥିବା କାରଣରୁ ପୋଲିସ ମଧ୍ୟ ସୁରକ୍ଷା ବ୍ୟବସ୍ଥାରେ ମୁତୟନ କରାଯାଇଥିଲା।