ନୂଆଦିଲ୍ଲୀ: ଶୁକ୍ରବାର ଅପରାହ୍ନରେ ବେଙ୍ଗାଲୁରୁର ହ୍ବାଇଟ୍ ଫିଳ୍ଡ୍ ଅଞ୍ଚଳର ଏକ ଲୋକପ୍ରିୟ ରେଷ୍ଟୁରାଣ୍ଟରେ ଏକ ତୀବ୍ର ବିସ୍ଫୋରଣରେ ଅତି କମରେ ୧୦ ଜଣ ଆହତ ହୋଇଛନ୍ତି। ରାମେଶ୍ବରମ୍ କାଫେ ନାମକ ଏହି ରେଷ୍ଟୁରାଣ୍ଟର ଡାଇନିଂ ଏରିଆରେ ଏହି ବିସ୍ଫୋରଣ ହୋଇଛି । ଏହି ସମୟରେ ଅନେକ ଆଇଟି କମ୍ପାନୀର କର୍ମଚାରୀ ମାନେ ମଧ୍ୟାହ୍ନ ଭୋଜନ କରୁଥିଲେ ।  

 ବିସ୍ଫୋରଣ ସ୍ଥଳ ପରିଦର୍ଶନ କରିଥିବା କର୍ଣ୍ଣାଟକର ଡିଜିପି ଆଲୋକ ମୋହନ କହିଛନ୍ତି ଯେ, ଫରେନସିକ୍ ସାଇନ୍ସ ଲାବୋରେଟୋରୀର ରିପୋର୍ଟ ବିନା ବିସ୍ଫୋରଣର କାରଣ ବିଷୟରେ କହିବା ଠିକ୍ ହେବ ନାହିଁ । ଏଭଳି ସମୟରେ ମୁଖ୍ୟମନ୍ତ୍ରୀ ସିଦ୍ଧରମୈୟା କିନ୍ତୁ ସୂଚାଇ ଦେଇଛନ୍ତି ଯେ ଏହି ବିସ୍ଫୋରଣ IED ଦ୍ୱାରା ହୋଇଛି । “ମୁଁ ଗୃହମନ୍ତ୍ରୀ ଏବଂ ବରିଷ୍ଠ ପୋଲିସ ଅଧିକାରୀଙ୍କ ସହ କଥା ହୋଇଛି । ସେମାନେ ମୋତେ ଯାହା ଜଣାଇଲେ ତାହା ହେଲା, ଜଣେ ଅଜ୍ଞାତ ବ୍ୟକ୍ତି ରେଷ୍ଟୁରାଣ୍ଟକୁ ଏକ ବ୍ୟାଗ୍ ନେଇ ଯାଇଥିଲେ । ସେ ଏକ ଟୋକନ୍ କିଣି ଖାଦ୍ୟ ଖାଇଥିଲେ । ପରେ ସେ ବୋମା ନେଇଥିବା ବ୍ୟାଗ ଛାଡିଥିଲେ । ପୋଲିସ ସିସିଟିଭି ଫୁଟେଜ ଯାଞ୍ଚ କରୁଛି ବୋଲି ସିଦ୍ଧରମୈୟା ଗଣମାଧ୍ୟମକୁ କହିଛନ୍ତି । ତେବେ ଏହା ଆତଙ୍କବାଦୀ ଆକ୍ରମଣ କି ବୋଲି ପଚରାଯିବାରୁ ତଦନ୍ତ ଚାଲିଛି ବୋଲି ମୁଖ୍ୟମନ୍ତ୍ରୀ କହିଛନ୍ତି ।