ରାୟଗଡ଼ା, ୧୯/୦୯ : ବାଘ ଛାଲ ଚାଲାଣ ଅଭିଯୋଗରେ ଦୁଇ ଅଭିଯୁକ୍ତଙ୍କୁ ୩ ବର୍ଷର ଜେଲ ଦଣ୍ଡାଦେଶ। ରାୟଗଡ଼ା ଜିଲ୍ଲା ଚନ୍ଦ୍ରପୁର ଥାନା ଅଞ୍ଚଳର ଅଭିଯୁକ୍ତ ବିକ୍ରମ ମାଝୀ ଏବଂ ରାଜା ମାଝୀ ଦୋଷୀ ସାବ୍ୟସ୍ତ ହୋଇଛନ୍ତି। ଦୁଇ ଅଭିଯୁକ୍ତଙ୍କୁ ୩ ବର୍ଷର ଜେଲ ଦଣ୍ଡାଦେଶ ସହ କୋର୍ଟ ୧୦ ହଜାର ଟଙ୍କାର ଜରିମାନା ନିର୍ଦ୍ଦେଶ ଦେଇଛନ୍ତି। ଜରିମାନା ରାଶି ଅନାଦେୟ ହେଲେ ଅତିରିକ୍ତ ୬ ମାସର ଜେଲ ଦଣ୍ଡାଦେଶ ଦେଇଛନ୍ତି କୋର୍ଟ।

ସୂଚନାନୁଯାୟୀ, ଗତବର୍ଷ ନଭେମ୍ଵର ୭ ତାରିଖ ସନ୍ଧ୍ୟା ୬ଟାରେ ରାୟଗଡ଼ା-ବିଷମକଟକ ରୋଡ ତାମ୍ପରାବିଡୁନି ଛକ ନିକଟରେ ୨ ଅଭିଯୁକ୍ତ ଗ୍ରାହକଙ୍କୁ ଅପେକ୍ଷା କରିଥିବା ବେଳେ ଭୁବନେଶ୍ଵର ଏସଟିଏଫ୍ ଚଢାଉ କରିଥିଲା। ସେମାନଙ୍କ ନିକଟରୁ ୨ଟି ବାଘ ଛାଲ ଜବତ କରିବା ସହ ବିକ୍ରମ ମାଝୀ ଏବଂ ରାଜା ମାଝୀକୁ ଗିରଫ କରିଥିଲା। ତଦନ୍ତ ପରେ ଏସଟିଏଫ୍ ଅଭିଯୁକ୍ତଙ୍କ ବିରୋଧରେ ଚାର୍ଜସିଟ୍ ଦାଖଲ କରିଥିଲା। ଏହା ସହ ଜବତ ହୋଇଥିବା ବାଘ ଛାଲର ବାୟୋକେମିକାଲ୍ ପରୀକ୍ଷା ପାଇଁ ଡେରାଡୁନ୍ ପଠାଯାଇଥିଲା।