ମୁମ୍ବାଇ,୩୦/୦୩: ୨୦୦୦ ଟଙ୍କିଆ ନୋଟ୍‌ ବଦଳ ସଂକ୍ରାନ୍ତରେ ଭାରତୀୟ ରିଜର୍ଭ ବ୍ୟାଙ୍କ(ଆର୍‌ବିଆଇ) ଏକ ଗୁରୁତ୍ୱପୂର୍ଣ୍ଣ ଘୋଷଣା କରିଛି । ଆର୍‌ବିଆଇ ପ୍ରକାଶ କରିଛି  ଯେ, ଆସନ୍ତା ସପ୍ତାହରେ ଦିନକ ପାଇଁ ନୋଟ୍‌ ବଦଳ ସୁବିଧା  ଉପଲବ୍ଧ ହେବନି । ଆର୍ଥିକବର୍ଷ ୨୦୨୪-୨୫ର ପ୍ରଥମ ଦିନ ଅର୍ଥାତ୍‌ ଏପ୍ରିଲ ୧ରେ ଲୋକେ ୨୦୦୦ ଟଙ୍କିଆ ନୋଟ୍‌  ବଦଳ କିମ୍ବା ଜମା କରିପାରିବେ ନାହିଁ । 

କେନ୍ଦ୍ରୀୟ ବ୍ୟାଙ୍କ  ପ୍ରକାଶ କରିଛି ଯେ, ଖାତାର ବାର୍ଷିକ  କ୍ଲୋଜିଂ ସହ ଜଡ଼ିତ  କାର୍ଯ୍ୟଗୁଡ଼ିକ ମଧ୍ୟରେ  ଆର୍‌ବିଆଇର ୧୯  ପ୍ରାଧୀକୃତ ଶାଖାରେ  ଏପ୍ରିଲ ୧ରେ ନୋଟ୍‌  ବଦଳ ସୁବିଧା ଉପଲବ୍ଧ ହେବ ନାହିଁ । ଏହା ଏପ୍ରିଲ ୨ରୁ ପୁଣି  ଥରେ ଆରମ୍ଭ ହେବ । ସୂଚନାଯୋଗ୍ୟ, ଗତ ବର୍ଷ ମେ’ ୧୯ରେ  ଆର୍‌ବିଆଇ ୨,୦୦୦ ଟଙ୍କିଆ ନୋଟ୍‌କୁ ପ୍ରତ୍ୟାହାର କରିଥିଲା ।  ଏହି ଘୋଷଣା ସହିତ ବଡ଼ ନୋଟ୍‌କୁ ସର୍କୁଲେଶନ୍‌ରୁ ହଟାଇ  ଦେବା ଲାଗି ନିଷ୍ପତ୍ତି ହୋଇଥିଲା । ବ୍ୟାଙ୍କ ଶାଖାଗୁଡ଼ିକରେ  ବଦଳ ଡେଡ୍‌ଲାଇନ୍‌ ଶେଷ ହୋଇଯାଇଥିବାବେଳେ  ଆର୍‌ବିଆଇର ପ୍ରାଧୀକୃତ ଶାଖାରେ ଏହା ଜାରି ରହିଛି ।