ସମ୍ବଲପୁର, ୨୧।୦୩ : ଭିସୁଟ୍ କୁଳପତିଙ୍କ କଡ଼ା ନୋଟିସ୍। ବସନ୍ତ ଉତ୍ସବ ବେଳେ ଛାତ୍ରଛାତ୍ରୀ ଆଧୁନିକ କିମ୍ବା ଛୋଟ ପୋଷାକ ପିନ୍ଧିବା ମନା। ଏକ ନୋଟିସ ଜରିଆରେ ଏହା ଜଣାଇଛନ୍ତି ଭିସୁଟ୍ କୁଳପତି।
ସୂଚନାନୁଯାୟୀ, ଆଗକୁ ଭିସୁଟରେ ବସନ୍ତ ଉତ୍ସବ ସହିତ ବିଭିନ୍ନ ସାଂସ୍କୃତିକ କାର୍ଯ୍ୟକ୍ରମ ହେବ। ଏହାପୂର୍ବରୁ କଡ଼ା ନୋଟିସ ଜାରି କରିଛନ୍ତି ଭିସୁଟ୍ କୁଳପତି। ବସନ୍ତ ଉତ୍ସବରେ କୌଣସି ଛାତ୍ରଛାତ୍ରୀ ଆଧୁନିକ ଡ୍ରେସ କିମ୍ବା ଛୋଟ ଡ୍ରେସ୍ ପିନ୍ଧି ଆସିପାରିବେ ନାହିଁ। ଯଦି କୌଣସି ଛାତ୍ରଛାତ୍ରୀ ଏହି ଏହି ନିୟମ ନମାନି ଭିସୁଟକୁ ଆସନ୍ତି, ତେବେ ସେମାନଙ୍କ ବିରୋଧରେ କଡ଼ା କାର୍ଯ୍ୟାନୁଷ୍ଠାନ ନିଆଯିବ। ଏପିରିକି ତାଙ୍କୁ ବିଶ୍ୱବିଦ୍ୟାଳୟ ଗେଟ୍ ବାହାର ରଖାଯିବ। କ୍ୟାମ୍ପସ ଭିତରକୁ ପ୍ରବେଶ ପାଇଁ ଅନୁମତି ଦିଆଯିବ ନାହିଁ।
ସୂଚନା ଥାଉକି, ଗତବର୍ଷ ଅନୁଷ୍ଠିତ ବସନ୍ତ ଉତ୍ସବରେ ଛୋଟ ଡ୍ରେସ୍ ପିନ୍ଧାକୁ ନେଇ କୌଣସି ଅଘଟଣ ଘଟିଥିବାର ସୂଚନା ରହିଛି। ଯାହାପରେ ଏପରି କଠୋର ନିଷ୍ପତ୍ତି ନେବାକୁ ବାଧ୍ୟ ହୋଇଛନ୍ତି କର୍ତ୍ତୃପକ୍ଷ । ତେବେ କୁଳପତିଙ୍କ ଏହି ନୋଟିସ୍ ପରେ ଛାତ୍ରଛାତ୍ରୀଙ୍କ ମଧ୍ୟରେ ଅସନ୍ତୋଷ ଦେଖିବାକୁ ମିଳିଛି।