ନୂଆଦିଲ୍ଲୀ,୨୩/୦୮: ଭାରତୀୟ ମନୋରଞ୍ଜନ ଦୁନିଆର ସବୁଠାରୁୁ ବଡ଼ ଡିଲ୍ କୁହାଯାଉଥିବା ଡିଜ୍ନୀ ଓ ରିଲାଏନ୍ସ ମଧ୍ୟରେ ୮.୫ ଅରବ ଡଲାରର ବିଲୟରେ ବାଧକ ସାଜିଛି ଭାରତୀୟ ପ୍ରତିସ୍ପର୍ଦ୍ଧା ଆୟୋଗ (ସିସିଆଇ)। ସିସିଆଇ କ୍ରିକେଟ ପ୍ରସାରଣ ଅଧିକାର ସମେତ ଅନେକ ମାମଲାକୁ ନେଇ ଚିନ୍ତାପ୍ରକଟ କରିଛନ୍ତି। ଏବେ ଯେଉଁ ସୂଚନା ମିଳିଛି ସେଥିରେ କୁହାଯାଉଛି ଯେ, ରିଲାଏନ୍ସ ଓ ଡିଜ୍ନୀ କ୍ରିକେଟ ଅଧିକାର ବ୍ୟତିତ ମୁଖ୍ୟତଃ ପ୍ରତ୍ୟେକ ପ୍ରସଙ୍ଗରେ ସିସିଆଇକୁ ସହମତି ଦେଇସାରିଛନ୍ତି। ଏବେ ରିଲାଏନ୍ସ ଓ ଡିଜ୍ନୀକୁ ବିଲୟ ହେବା ପାଇଁ ମଞ୍ଜୁରି ଦେବେ କି ନାହିଁ, ତାହା ସିସିଆଇ ହାତରେ।
ବିଜ୍ଞାପନ ହାରକୁ ତୀବ୍ର ବୃଦ୍ଧି ନକରିବାକୁ ପ୍ରସ୍ତୁତ:
ରିଲାଏନ୍ସ ଏବଂ ଡିଜ୍ନୀର ବିଲୟରେ ହେବାକୁ ଥିବା ବିଶାଳ କମ୍ପାନୀ ସିଧାସଳଖ ସୋନୀ, ନେଟ୍ଫ୍ଳିକ୍ସ ଏବଂ ଆମାଜନ ପ୍ରାଇମ୍କୁ ଟକ୍କର ଦେବ। ନିକଟରେ ଆସିଥିବା ରଏଟର୍ସର ଏକ ରିପୋର୍ଟରେ ଦାବି କରାଯାଇଥିଲା ଯେ,' ସିସିଆଇ ଭାବୁଛି ଯେ, ଏହି ଉଭୟ କମ୍ପାନୀ ମଧ୍ୟରେ ବିଲୟ ହେଲେ ଭାରତରେ କ୍ରିକେଟକୁ ରାଇଟ୍ ଅର୍ଥାତ୍ ଅଧିକାରକୁ ନେଇ ପ୍ରତିଯୋଗିତା ଦୁର୍ବଳ ହୋଇପଡ଼ିବ। ତମାମ ସୂୂତ୍ରକୁ ନେଇ ବିଜନେସ ଷ୍ଟାଣ୍ଡାର୍ଡର ରିପୋର୍ଟରେ ଦାବି କରାଯାଇଛି ଯେ, ରିଲାଏନ୍ସ ଓ ଡିଜ୍ନୀ ଉଭୟ କ୍ରିକେଟ ପ୍ରସାରଣ ଅଧିକାରକୁ ନେଇ ଅଡ଼ି ବସିଛନ୍ତି। ଅବଶ୍ୟ ଉଭୟେ ବିଜ୍ଞାପନ ହାରକୁ ତୀବ୍ର ବୃଦ୍ଧି ନକରିବାକୁ ପ୍ରସ୍ତୁତ ହୋଇଛନ୍ତି। ଏଥିସହିତ ଉଭୟ ସିସିଆଇକୁ ଆଶ୍ବାସନା ଦେଇଛନ୍ତି ଯେ, ବିଜ୍ଞାପନ ହାର ଅଯୌକ୍ତିକ ରଖାଯିବ ନାହିଁ।
୧୦ ଟି ଚ୍ୟାନେଲ୍ ବନ୍ଦ କରିବାକୁ ଊଭୟ କମ୍ପାନୀ ରାଜି:
କ୍ରିକେଟ୍ ପ୍ରସାରଣ ଅଧିକାର ବ୍ୟତୀତ ରିଲାଏନ୍ସ ଏବଂ ଡିଜ୍ନିର ମିଶ୍ରଣ ଅର୍ଥାତ ବିଲୟ ଦ୍ୱାରା ଗଠିତ ମିଡିଆ କମ୍ପାନୀରେ ପ୍ରାୟ ୧୨୦ ଚ୍ୟାନେଲ ଏବଂ ୨ ଷ୍ଟ୍ରିମିଂ ପ୍ଲାଟଫର୍ମ ମଧ୍ୟ ରହିବ। ଏଥିମଧ୍ୟରୁ ପ୍ରାୟ ୧୦ ଟି ଚ୍ୟାନେଲ କମ୍ପାନୀ ବନ୍ଦ କରିବାକୁ ପ୍ରସ୍ତୁତ ଅଛନ୍ତି। ସିସିଆଇ ଏହି କମ୍ପାନୀଗୁଡ଼ିକୁ କହିଥିଲା ଯେ, ସେମାନେ ଏହାର କିଛି କ୍ରିକେଟ୍ ପ୍ରସାରଣ ଅଧିକାରକୁ ବିକ୍ରୟ କରନ୍ତୁ। ଉଭୟ କମ୍ପାନୀ ଏଥିପାଇଁ ପ୍ରସ୍ତୁତ ନୁହଁନ୍ତି ବୋଲି ବିଶେଷ ସୂତ୍ରରୁ ପ୍ରକାଶ। ଏ ବାବଦରେ ସିସିଆଇ, ରିଲାଏନ୍ସ କିମ୍ବା ଡିଜନିରୁ ଏପର୍ଯ୍ୟନ୍ତ କୌଣସି ଅଫିସିଆଲ୍ ବିବୃତ୍ତି ଆସିନାହିଁ। କମ୍ପାନୀଗୁଡିକ କେବଳ କହିଛନ୍ତି ଯେ କ୍ରିକେଟ୍ ମ୍ୟାଚ୍ ସମୟରେ ସେମାନେ ବିଜ୍ଞାପନ ହାରକୁ ତୀବ୍ର ବୃଦ୍ଧି କରିବେ ନାହିଁ। ତଥାପି, ସେମାନେ ବର୍ତ୍ତମାନ କୌଣସି ପ୍ରାଇସ୍ କ୍ୟାପ୍ ଲଗାଇବାକୁ ପ୍ରସ୍ତୁତ ନୁହଁନ୍ତି।
କ୍ରିକେଟ୍ ମ୍ୟାଚ୍ ମାଗଣାରେ ପ୍ରସାରଣ କରୁଛନ୍ତି ଉଭୟ କମ୍ପାନୀ :
କ୍ରିକେଟ୍ ହେଉଛି ଭାରତର ସବୁଠାରୁ ଲୋକପ୍ରିୟ ଖେଳ। ଏହାର ପ୍ରସାରଣ ଅଧିକାର ହାସଲ କରିବାକୁ ଏହି କମ୍ପାନୀଗୁଡିକ ପ୍ରାୟ ୯.୫ ବିଲିୟନ ଡଲାର ଖର୍ଚ୍ଚ କରିଛନ୍ତି। ସୂତ୍ରରୁ ପ୍ରକାଶ ଯେ ବର୍ତ୍ତମାନ କମ୍ପାନୀର ପ୍ରତିକ୍ରିୟା ଗୁଡ଼ିକୁ ସିସିଆଇ ଦ୍ୱାରା ବିଶ୍ଳେଷଣ କରାଯିବ। ଆହୁରି ମଧ୍ୟ, ସିସିଆଇ ଏହାର ସମସ୍ୟାର ସମାଧାନ ପାଇଁ ଅଧିକ ଅନୁସନ୍ଧାନ କରିପାରିବ। ନିକଟ ଅତୀତରେ ଉଭୟ କମ୍ପାନୀ କ୍ରିକେଟ୍ ମ୍ୟାଚ୍ ମାଗଣାରେ ପ୍ରସାରଣ କରିଥିଲେ। ସେ ଆଶା କରିଥିଲେ ଯେ ମ୍ୟାଚ୍ ଦେଖିବା ସହିତ ଲୋକମାନେ ତାଙ୍କ ସବସ୍କ୍ରିପସନ୍ ମଧ୍ୟ କିଣିବେ। ଜେଫ୍ରିଜ ନିକଟରେ କହିଥିଲେ ଯେ ଡିଜ୍ନି ଏବଂ ରିଲାଏନ୍ସର ମିଶ୍ରଣ ଦ୍ୱାରା ଗଠିତ କମ୍ପାନୀ ଟିଭି ଏବଂ ଷ୍ଟ୍ରିମିଂ ସେଗମେଣ୍ଟରେ ବିଜ୍ଞାପନରେ ପ୍ରାୟ ୪୦ ପ୍ରତିଶତ ଅଂଶଧନ ପାଇବ।
