ଢାକା/ କୋଲକାତା – ବାତ୍ୟା ରେମାଲ କରିଛି ଲ୍ୟାଣ୍ଡଫଲ୍। ପଶ୍ଚିମବଙ୍ଗ ଓ ବାଂଲାଦେଶର ତଟୀୟ ଅଞ୍ଚଳରେ ବାତ୍ୟା ଆରମ୍ଭ କରି ଦେଇଛି ତାର ତାଣ୍ଡବ। ବାତ୍ୟାର କେନ୍ଦ୍ର ସମୁଦ୍ର ତଟ ଠାରୁ ୨୦ କିଲୋମିଟର ଦୂରରେ ରହିଛି। ଆଗାମୀ ୩ଘଣ୍ଟା ଯାଏ ଲ୍ୟାଣ୍ଡଫଲ ଜାରି ରହିବ।
ସେପଟେ ବାତ୍ୟାରୁ ବର୍ତ୍ତିବା ପାଇଁ ପଶ୍ଚିମବଙ୍ଗରେ ଏନଡିଆରଏଫ୍ର ମୋଟ ୧୪ଟି ଟିମ୍କୁ ମୁତୟନ କରାଯାଇଛି। ବାତ୍ୟାର ବେଗ ୧୧୦-୧୨୦ କି.ମି ପ୍ରତି ଘଣ୍ଟାରୁ ନେଇ ୧୩୫ କିମି ପ୍ରତି ଘଣ୍ଟା ହେବାର ସମ୍ଭାବନା ରହିଛି। ବାତ୍ୟାକୁ ନେଇ ପଶ୍ଚିମବଙ୍ଗର ରାଜ୍ୟପାଳ ଲୋକଙ୍କୁ ସତର୍କ ରହିବାକୁ ପରାମର୍ଶ ଦେଇଛନ୍ତି। ଏହାସହ ଏସଓପିର ପାଳନ କରିବାକୁ ଅନୁରୋଧ କରିଛନ୍ତି।
ରାଜ୍ୟପାଳ ଡ. ସିଭି ଆନନ୍ଦ ବୋଷ କହିଛନ୍ତି , ସେ ସ୍ଥିତି ଉପରେ ନଜର ରଖିଛନ୍ତି। ଏଥ୍ରରୁ ବର୍ତ୍ତିବା ପାଇଁ ରାଜ୍ୟ ଓ କେନ୍ଦ୍ରୀୟ ବିଶେଷଜ୍ଞଙ୍କ ସହ ଲଗାତାର ସଂପର୍କରେ ରହିଛନ୍ତି। ସେପଟେ ଦିଲ୍ଲୀରେ ପ୍ରଧାନମନ୍ତ୍ରୀ ମୋଦି ଏହି ବାତ୍ୟାର ପ୍ରସ୍ତୁତି ନେଇ ସମୀକ୍ଷା ବୈଠକ କରିଛନ୍ତି।