ନୂଆଦିଲ୍ଲୀ: ପାକିସ୍ତାନର ପଞ୍ଜାବ ପ୍ରଦେଶରେ ଆଜି (ଶନିବାର) ଏକ ଭୟାନକ ଦୁର୍ଘଟଣା ଘଟିଛି । ଭାରସାମ୍ୟ ହରାଇ ଏକ ମିନି ଟ୍ରକ ରାସ୍ତାକଡ ଖାଇକୁ ଖସି ପଡିଛି । ଏହି ସମୟରେ ଏଥିରେ ଯାତ୍ରା କରୁଥିବା ପାଞ୍ଚ ଜଣ ପିଲାଙ୍କ ସମେତ ୧୩ ଜଣଙ୍କ ମୃତ୍ୟୁ ଘଟିଛି । ସମସ୍ତ ମୃତକ ଗୋଟିଏ ପରିବାରର ବୋଲି କୁହାଯାଉଛି । ଏହି ଦୁଃଖଦ ଦୁର୍ଘଟଣାରେ ଅନ୍ୟ ୯ ଜଣ ଆହତ ହୋଇଛନ୍ତି । ଉଦ୍ଧାର କାର୍ଯ୍ୟରେ ସମ୍ପୃକ୍ତ ଅଧିକାରୀମାନେ ଦୁର୍ଘଟଣା ସମ୍ପର୍କରେ ସୂଚନା ଦେଇଛନ୍ତି । ଦୁର୍ଘଟଣା ପରେ ଘଟଣାସ୍ଥଳରେ ସ୍ଥାନୀୟ ଲୋକଙ୍କ ଭିଡ ଜମିଥିଲା । ଦୁର୍ଘଟଣା ପରେ ସ୍ଥାନୀୟ ଲୋକମାନେ ମଧ୍ୟ ଉଦ୍ଧାର କାର୍ଯ୍ୟରେ ସାହାଯ୍ୟ କରିଥିଲେ ।

'ରେସକ୍ୟୁ -1122' ଅନୁଯାୟୀ, ଏହି ମିନି ଟ୍ରକ୍ ଖୈବର ପଖତୁନଖୱା ପ୍ରଦେଶର ବନୁ ଜିଲ୍ଲାରୁ ପଞ୍ଜାବର ଖୁଶାବ ଜିଲ୍ଲା ଆଡକୁ ଆସୁଥିଲା । ଲାହୋର ଠାରୁ ପ୍ରାୟ ୨୫୦ କିଲୋମିଟର ଦୂରରେ ଥିବା ଖୁଶାବର ପେଞ୍ଚ ପିର ଅଞ୍ଚଳରେ ଏହି ଦୁର୍ଘଟଣା ଘଟିଛି। ସୂଚନାନୁସାରେ, ମିନି ଟ୍ରକ୍ ରାସ୍ତାରୁ ଖସି ଏକ ଖାଇକୁ ଖସିପଡିବା କାରଣରୁ ଏହି ଦୁର୍ଘଟଣା ଘଟିଛି । 

ଜଣେ ଅଧିକାରୀ କହିଛନ୍ତି ଯେ “ପାଞ୍ଚ ପିଲାଙ୍କ ସମେତ ୧୩ ଜଣଙ୍କର ଘଟଣାସ୍ଥଳରେ ମୃତ୍ୟୁ ଘଟିଛି । ନଅ ଜଣ ଆହତଙ୍କୁ ଡାକ୍ତରଖାନା ନିଆଯାଇଛି । ସେଠାରେ ସେମାନଙ୍କ ଅବସ୍ଥା ଗୁରୁତର ଥିବା କୁହାଯାଉଛି। '' କିଛି ପ୍ରତ୍ୟକ୍ଷଦର୍ଶୀଙ୍କ ଅନୁଯାୟୀ ମିନି ଟ୍ରକର ଡ୍ରାଇଭର ଦ୍ରୁତ ଗତିରେ ଆସୁଥିଲେ । ଆଉ ନିୟନ୍ତ୍ରଣ ହରାଇବାରୁ ଦୁର୍ଘଟଣା ଘଟିଥିଲା।

ଏହି ଦୁର୍ଘଟଣାରେ ମୃତ୍ୟୁକୁ ନେଇ ପଞ୍ଜାବର ମୁଖ୍ୟମନ୍ତ୍ରୀ ମରିୟମ ନୱାଜ ଦୁଃଖ ପ୍ରକାଶ କରିଛନ୍ତି। ଦୁର୍ଘଟଣାରେ ଆହତ ହୋଇଥିବା ଲୋକଙ୍କୁ ଉନ୍ନତ ଚିକିତ୍ସା ସୁବିଧା ଯୋଗାଇ ଦିଆଯିବା ଉଚିତ ବୋଲି ନୱାଜ ଅଧିକାରୀମାନଙ୍କୁ ନିର୍ଦ୍ଦେଶ ଦେଇଛନ୍ତି।