ମାୟାମୀ,୦୧/୦୪: ଭାରତର ଭେଟେରାନ ଖେଳାଳି ରୋହନ ବୋପାନ୍ନା ଚଳିତ ମାୟାମୀ ଓପନର ପୁରୁଷ ଡବଲ୍ସ ଚାମ୍ପିଅନ୍ ହୋଇ ଇତିହାସ ରଚିଛନ୍ତି । ସେ ବେୟୋଜ୍ୟେଷ୍ଠ ଖେଳାଳି ଭାବେ ଏଟିପି ୧୦୦୦ ଟାଇଟଲ୍ ଜିତି ନିଜ ନାମରେ ଥିବା ପୂର୍ବ ରେକର୍ଡ଼ ଭଙ୍ଗ କରିଛନ୍ତି । ବୋପାନ୍ନାଙ୍କୁ ଏବେ ୪୪ ବର୍ଷ ବୟସ । ସେ ଗତ ଇଣ୍ଡିଆନ୍ ୱେଲ୍ସରେ ୪୩ବର୍ଷ ବୟସରେ ଡବଲ୍ସ ଚାମ୍ପିଅନ୍ ହୋଇଥିଲେ ।
ପୁରୁଷ ଡବଲ୍ସ ଫାଇନାଲ୍ରେ ବୋପାନ୍ନା ଓ ତାଙ୍କ ଅଷ୍ଟ୍ରେଲୀୟ ସାଥୀ ମାଥ୍ୟୁ ଏବଡେନ ଯୋଡ଼ି ୬-୩ (୩-୭), ୬-୩, ୧୦-୬ ସେଟ୍ରେ କ୍ରୋଏସିଆର ଇଭାନ ଡୋଡିଗ୍ ଓ ଆମେରିକାର ଅଷ୍ଟିନ କ୍ରାଜିସେକ୍ ଯୋଡ଼ିଙ୍କୁ ପରାସ୍ତ କରିଥିଲେ । ଏହି ମ୍ୟାଚ୍ ଜିତିବା ପାଇଁ ଟପ୍ ସିଡ ଯୋଡ଼ିଙ୍କୁ ୧ଘଣ୍ଟା ୪୪ମିନିଟ୍ ଲାଗିଥିଲା । ଟାଇଟଲ୍ ସଫଳତା ସହ ବୋପାନ୍ନାଏବଡେନ ଯୋଡ଼ି ଏଟିପି ମାନ୍ୟତା ତାଲିକାରେ ଶୀର୍ଷ ସ୍ଥାନ ଦଖଲ କରିଛନ୍ତି ।
ବୋପାନ୍ନା କ୍ୟାରିୟରରେ ଷଷ୍ଠ ଏଟିପି ମାଷ୍ଟର୍ସ ୧୦୦୦ ଟାଇଟଲ ଜିତିଛନ୍ତି । ଚଳିତ ସିଜନରେ ଏହା ତାଙ୍କର ଦ୍ୱିତୀୟ ଏଟିପି ମାଷ୍ଟର୍ସ ୧୦୦୦ ଟାଇଟଲ ରହିଥିଲା । ପୂର୍ବରୁ ସେ ଇଣ୍ଡିଆନ୍ ୱେଲ୍ସ ଟାଇଟଲ୍ ହାସଲ କରିଥିଲେ । ବୋପାନ୍ନା ଚତୁର୍ଥ ଭାରତୀୟ ଭାବେ ମାୟାମୀ ଓପନ ଚାମ୍ପିଅନ୍ ହୋଇଛନ୍ତି । ପୂର୍ବରୁ ଲିଆଣ୍ଡର ପେସ୍ (୨୦୧୦, ୨୦୧୧, ୨୦୧୨), ମହେଶ ଭୂପତି (୨୦୧୧) ଏବଂ ସାନିଆ ମିର୍ଜା (୨୦୧୫) ଏହି ସଫଳତା ଲାଭ କରିଥିଲେ । କଲିନ୍ସ ମହିଳା ସିଙ୍ଗଲ୍ସ ଚାମ୍ପିଅନ୍: ମହିଳା ବର୍ଗରେ ଆମେରିକାର ଡାନିଏଲ କଲିନ୍ସ ଚାମ୍ପିଅନ୍ ହୋଇଛନ୍ତି । ଫାଇନାଲ୍ରେ ସେ ସିଧାସଳଖ ୭-୫, ୬-୩ ସେଟ୍ରେ ଚତୁର୍ଥ ସିଡ୍ କାଜାଖସ୍ତାନର ଏଲେନା ରିବାକିନାଙ୍କୁ ହରାଇ କ୍ୟାରିୟରରେ ପ୍ରଥମ ଡବ୍ଲ୍ୟୁଟିଏ ମାଷ୍ଟର୍ସ ୧୦୦୦ ଟାଇଟଲ୍ ହାସଲ କରିଛନ୍ତି ।