ଭୁବନେଶ୍ୱର,୨୨/୦୩: ଶୁକ୍ରବାର ଦିନ ୧୧ଟାରୁ ସାଢେ ୧୧ଟା ମଧ୍ୟରେ ଋକୁଣା ରଥ ନିର୍ମାଣ ନିମନ୍ତେ କାଠ ଅନୁକୂଳ କରାଯିବ ବୋଲି ଶ୍ରୀଲିଙ୍ଗରାଜ ମନ୍ଦିର ଜ୍ୟୋତିଷ ନାରାୟଣ ଆଚାର୍ଯ୍ୟ ସମୟ ନିର୍ଦ୍ଧାରଣ କରିଛନ୍ତି । କାଠ ଅନୁକୂଳ ଉତ୍ସବରେ ପାଳିଆ ସେବାୟତଙ୍କ ସମେତ ମନ୍ଦିର କର୍ମଚାରୀମାନେ ଉପସ୍ଥିତ ରହିବେ ବୋଲି ଗୁରୁବାର ମନ୍ଦିର କାର୍ଯ୍ୟାଳୟ ପରିସରରେ କାର୍ଯ୍ୟନିର୍ବାହୀ ଅଧିକାରୀ  ତଥା ଅତିରିକ୍ତ ଜିଲ୍ଲାପାଳ ରୂଦ୍ର ନାରାୟଣ ମହାନ୍ତିଙ୍କ  ଅଧ୍ୟକ୍ଷତାରେ ଅନୁଷ୍ଠିତ ବୈଠକରେ ଚୂଡାନ୍ତ  ହୋଇଛି । ବୈଠକେରେ ନିଆଯାଇଥିବା ଅନ୍ୟ ଏକ ଗୁରୁତ୍ୱପୂର୍ଣ୍ଣ ନିଷ୍ପତ୍ତି ହେଲା ରଥ ହସ୍ତାନ୍ତର ସମୟ ।  

କାରଣ ଗତ ୧୮ ତାରିଖ ଋକୁଣା ରଥ ଯାତ୍ରାର ନୀତି ନିର୍ଘଣ୍ଟ ପ୍ରସ୍ତୁତି ନିମନ୍ତେ ସେବାୟତଙ୍କ ଠାରୁ  ମତାମତ ଆହ୍ୱାନ କରାଯିବା ସମୟରେ ତିନି ପ୍ରମୁଖ  ନିଯୋଗ (ବଡୁ,ପୂଜାପଣ୍ଡା ଓ ବ୍ରାହ୍ମଣ)ପ୍ରତିନିଧି  ମାନେ ସଅଳ ରଥ ହସ୍ତାନ୍ତର କରିବାକୁ ଗୁରୁତ୍ୱ  ଦେଇଥିଲେ । ତେଣୁ ଏହି ବୈଠକରେ ମହାରଣା  ଓ ଅନ୍ୟ ସେବାୟତଙ୍କ ମତାମତ ପରେ ନୀତି  ନିର୍ଘଣ୍ଟ ପ୍ରସ୍ତୁତି ପାଇଁ ଚୁଡାନ୍ତ ହୋଇଥିଲା । ଏହି  ପରିପ୍ରେକ୍ଷୀରେ ମହାରଣା,କମାର,ଦରଜୀ  ଆଦି ସେବାୟତଙ୍କୁ କାର୍ଯ୍ୟନିର୍ବାହୀ ଅଧିକାରୀ  ରଥ ୧୪ ତାରିଖ ସନ୍ଧ୍ୟାରେ ହସ୍ତାନ୍ତର କରିବାକୁ ପରାମର୍ଶ ଦେଇଥିଲେ । ଜବାବରେ ସେବାୟତ ମାନେ  କହିଥିଲେ ଯେ, ଠିକଣା ସମୟରେ କାଠ ଯୋଗାଇ ଦେଲେ ସମୟ ପୂର୍ବରୁ ରଥ ହସ୍ତାନ୍ତର କରାଯିବ । ଏହିପରି ଭାବେ ସମସ୍ତେ ସବୁକିଛି ସମୟ ପୂର୍ବରୁ  ଦାୟିତ୍ୱ ତୁଲାଇବେ ବୋଲି ରାଜି ହୋଇଥିଲେ ।  

ବୈଠକରେ ଥାନା ଅଧିକାରୀ ପୂର୍ଣ୍ଣଚନ୍ଦ୍ର  ପ୍ରଧାନ,ମହେଶ ମହାରଣା,ବଟକୃଷ୍ଣ  ମହାରଣା,ସୋମନାଥ ମହାରଣା,କେଦାରନାଥ ମହାରଣା,ବାସୁଦେବ ମହାରଣା,ବ୍ରାହ୍ମଣ  ନିଯୋଗ ସମ୍ପାଦକ ବିରଞ୍ଚି ନାରାୟଣ  ପତି,ମନ୍ଦିର ଚର୍ଚ୍ଚେଇତ,ସୁପରଭାଇଜର ଓ  ଅନ୍ୟ କର୍ମଚାରୀ ଉପସ୍ଥିତ ଥିଲେ ।