ଭୁବନେଶ୍ୱର,୨୯/୦୯: ଶାରଦୀୟ  ମହୋତ୍ସବକୁ ଆଉ ଦିନ କେଇଟା ରହିଲା ।  ସେଥିପାଇଁ ଚଳଚଞ୍ଚଳ ହୋଇଗଲାଣି ରାଜଧାନୀରେ  ଥିବା ବିଭିନ୍ନ ଦୁର୍ଗାପୂଜା ସମିତି । ଏହାରି ଭିତରେ  ସହିଦନଗର ଦୁର୍ଗାପୂଜା ସମିତି ପକ୍ଷରୁ ମଧ୍ୟ ମା’ଙ୍କ  ପୂଜା ପାଇଁ ଚାଲିଛି ଜୋରଦାର ପ୍ରସ୍ତୁତି । ଚଳିତ ବର୍ଷ  ପରିବେଶ ଅନୁକୂଳ ସାମଗ୍ରୀକୁ ବ୍ୟବହାର କରି ଏହି  ଅନୁଷ୍ଠାନ ପକ୍ଷରୁ ତୋରଣ ପ୍ରସ୍ତୁତ ହେଉଛି । ଯାହା  କାଳ୍ପନିକ ବାର୍ବିଡଲମାନେ ରହୁଥିବା ପ୍ୟାଲେସ ସଦୃଶ  ହେବ । ବିଶେଷକରି ବିଭିନ୍ନ ଅଳଙ୍କାରରେ ସୁସଜ୍ଜିତ  ଚାନ୍ଦିମେଢ଼ ମଣ୍ଡିତ ମା’ଙ୍କୁ ଦର୍ଶନ କରିବେ ଶ୍ରଦ୍ଧାଳୁ ।  

ଚଳିତ ବର୍ଷ ଏହି ଅନୁଷ୍ଠାନ ୪୭ ବର୍ଷରେ  ପଦର୍ପଣ କରୁଛି । ଏଭଳି କାଳ୍ପନିକ ଏବଂ ନିଆରା  ଢଙ୍ଗର ତୋରଣ ପ୍ରସ୍ତୁତ କରିବା ପାଇଁ ପଶ୍ଚିମବଙ୍ଗର  ୮୦ରୁ ଊଦ୍ଧ୍ୱର୍ କାରିଗର କାମରେ ଲାଗିଛନ୍ତି ।  ତୋରଣର ଉଚ୍ଚତା ୧୦୫ ଫୁଟ ହୋଇଥିବା ବେଳେ  ଚଉଡ଼ା ୧୨୦ ଫୁଟ ରହିବ । ମା’ ଙ୍କୁ ସୁନା ଓ ରୁପାର  ଅଳଙ୍କାରରେ ସଜାଇ ଦିଆଯିବ । ମା’ ଦୁର୍ଗାଙ୍କର  କେତେକ ଅସ୍ତ୍ର ମଧ୍ୟ ରୁପାରେ ଶୋଭା ପାଇବ ।  ପୂଜାର ମୁଖ୍ୟ ଆକର୍ଷଣ ହେଉଛି ଚାନ୍ଦି ମେଢ଼ରେ  ମା’ ଭକ୍ତମାନଙ୍କୁ ଦର୍ଶନ ଦେବେ । କଟକର  କାରିଗରମାନେ ମା’ ଙ୍କ ମୂର୍ତ୍ତି ପ୍ରସ୍ତୁତିରେ ଲାଗିଛନ୍ତି । ୧୯୭୮ରେ ଯେମିତି ରୀତିନୀତିର ସହିତ ମା’ଙ୍କୁ  ଆବାହନ କରାଯାଉଥିଲା, ଏବେ ବି ସେହି ନିୟମରେ  ପୂଜା କରାଯାଉଛି । ଗୁଡ଼ିଆ ଘରେ ଦୁର୍ଗାଙ୍କ ପାଖରେ  ଭୋଗଲାଗୁଥିବା ଗଜା, ଲଡ଼ୁ , କାକରା, ଖଜା ଭଳି ୮  ରୁ ୧୦ ପ୍ରକାର ମିଠା ଓ ପିଠା ପ୍ରସ୍ତୁତ ହୋଇଥାଏ ।  ସପ୍ତମୀ ଦିନ ଚୁଡ଼ା ଘଷା, ଅଷ୍ଟମୀ ଦିନ ମଣ୍ଡାପିଠା,  ନବମୀରେ ସେଓ ବୁନ୍ଦି, ଦଶମୀରେ ଫଳ ଭୋଗ ଓ  ଚରୁ ଅର୍ଣ୍ଣ ମା’ ଙ୍କ ପାଖେ ଭୋଗ ଲାଗି କରାଯିବ ।  ପ୍ରତିଦିନ ଭକ୍ତମାନଙ୍କ ପାଇଁ ଅନୁଷ୍ଠାନ ପକ୍ଷରୁ ପ୍ରସାଦ  ସେବନର ବ୍ୟବସ୍ଥା ମଧ୍ୟ କରାଯିବ ।  

Durga Puja 2024: Get all updated News, Videos and Photos of Durga Puja

ଏଥିସହିତ ପ୍ରତିଦିନ ଭଜନ ସମାରୋହକୁ  ଭକ୍ତମାନେ ଉପଭୋଗ କରିପାରିବେ ।  ଜନସମାଗମକୁ ଲକ୍ଷ୍ୟରଖି ସମିତି ପକ୍ଷରୁ ଶୃଙ୍ଖଳିତ  ଦର୍ଶନ ଓ ସୁରକ୍ଷା ବ୍ୟବସ୍ଥାକୁ ଗୁରୁତ୍ୱ ଦିଆଯାଇଛି ।  ସେଥିପାଇଁ ୧୦୦ ଊଦ୍ଧ୍ୱର୍ ସ୍ୱେଚ୍ଛାସେବୀ ନିୟୋଜିତ  ରହିବେ ବୋଲି ଅନୁଷ୍ଠାନର କର୍ମକର୍ତ୍ତାମାନେ  ସାମ୍ବାଦିକ ସମ୍ମିଳନୀରେ ସୂଚନା ଦେଇଛନ୍ତି । ଏଥିରେ  ଅନୁଷ୍ଠାନର ଉପଦେଷ୍ଟା ସୁଧୀର କୁମାର ଶତପଥୀ,  ଉପସଭାପତି ଚନ୍ଦନ କୁମାର ପାଲିତ, ଅଚ୍ୟୁତ  ପ୍ରସାଦ ବେହେରା, କର୍ପୋରେଟର ରାଜକିଶୋର  ଦାସ, ଯୁଗ୍ମସମ୍ପାଦକ ବିଶ୍ୱ ପ୍ରସାଦ ମହାନ୍ତି, ମହେନ୍ଦ୍ର  କୁମାର ତ୍ରିପାଠୀ ଓ କର୍ମକର୍ତ୍ତାମାନେ ଉପସ୍ଥିତ ଥିଲେ।