ନୂଆଦିଲ୍ଲୀ ୦୯/୦୬: ଉତ୍ତରପ୍ରଦେଶର ମୁରାଦାବାଦରେ ସମାଜବାଦୀ ପାର୍ଟିର ପୂର୍ବତନ ସଭାପତିଙ୍କ ମୃତ୍ୟୁ। ଘରର ଷ୍ଟୋର ରୁମରୁ ତାଙ୍କର ମୃତଦେହ ଉଦ୍ଧାର କରାଯାଇଛି। ତେବେ ୫୫ବର୍ଷୀୟ ଡିପି ଯାଦବ ଶନିବାର ମଝୋଲା ଅଞ୍ଚଳରେ ବସବାସ କରୁଥିବା ବେଳେ ଘରର ଷ୍ଟୋର ରୁମରେ ପଶି ନିଜକୁ ଗୁଳି କରି ଜୀବନ ହାରିଛନ୍ତି। ସେପଟେ ପରିବାରଲୋକେ ତାଙ୍କୁ ଖୋଜିଖୋଜି ଷ୍ଟୋର ରୁମରେ ପହଞ୍ଚିବା ପରେ ସେଠାରେ ତାଙ୍କ ମୃତଦେହ ପଡିଥିବା ଦେଖି ପୋଲିସକୁ ସୂଚନା ଦେଇଥିଲେ। ଏନେଇ ପୋଲିସ ଘଟଣାସ୍ଥଳକୁ ଆସି ମୃତଦେହ ଉଦ୍ଧାର କରିଛି ।
ଏହି ଘଟଣାକୁ ନେଇ ବରିଷ୍ଠ ପୋଲିସ ଅଧିକାରୀ ହେମରାଜ କହିଛନ୍ତି ଯେ , ମୃତକ ଅନେକ ଦିନ ହେବ ଚିନ୍ତାରେ ରହୁଥିଲେ। ଏହି କାରଣରୁ ସେ କାହା ସହିତ ବେଶୀ କଥା ହେଉ ନଥିଲେ କି କେଉଁଆଡେ ଯାଉ ନଥିଲେ। ହେଲେ ଗତ ଶନିବାର ସମସ୍ତେ ଖାଇପିଇ ନିଜନିଜ କୋଠରିକୁ ଯାଇଥିଲେ। ଏହାପରେ ଯାଦବ ଷ୍ଟୋର ରୁମକୁ ଯାଇ ବନ୍ଧୁକରୁ ଗୁଳି ଫୁଟାଇ ଆତ୍ମହତ୍ୟା କରିଛନ୍ତି । ଘଟଣାସ୍ଥଳରେ ପହଞ୍ଚି ପୋଲିସ ମୃତଦେହକୁ ଜବତ କରି ବ୍ୟବଚ୍ଛେଦ ପାଇଁ ପଠାଇ ଯାଞ୍ଚ ଆରମ୍ଭ କରି ଦେଇଛି। କୁହାଯାଉଛି କି ମୁରାଦାବାଦରେ ସମାଜବାଦୀ ପାର୍ଟି ସାଂସଦ ଏସଟି ହସନଙ୍କ ଟିକେଟ କାଟି ରୁଚି ବୀରାଙ୍କୁ ଦିଆଯାଇଥିଲା। ଟିକେଟ କଟା ଯିବାକୁ ନେଇ ଯାଦବ ଦୁଃଖୀ ଥିବାରୁ ଆତ୍ମହତ୍ୟା କରିଛନ୍ତି ।