ଭୁବନେଶ୍ୱର,୨୫/୦୩: ସମ୍ମାନଜନକ ଆସନରେ ହେଭିୱେଟ୍ ଲଢ଼େଇ । ସମ୍ବଲପୁର ଲୋକସଭା ଆସନରେ ମୁହାଁମୁହିଁ ହେବେ କେନ୍ଦ୍ରମନ୍ତ୍ରୀ ଧର୍ମେନ୍ଦ୍ର ପ୍ରଧାନ ଓ ବିଜେଡି ସାଂଗଠନିକ ସଂପାଦକ ପ୍ରଣବ ପ୍ରକାଶ ଦାସ । ଦୁଇ ଦଳର ଟାଣୁଆ ନେତା ଏଠାରୁ ଲଢ଼ିବା ଏକରକମ ନିଶ୍ଚିତ ହୋଇଥିବାରୁ ସାରା ରାଜ୍ୟର ନଜର ଏହା ଉପରେ ରହିବ । କିଏ ବାଜିମାତ୍ କରିବ? ଦୁଇ ଦଳ ପାଇଁ ଏହା ହେବ ବେଶ୍ ସମ୍ମାନର ପ୍ରଶ୍ନ ।
ବିଜେପି ଧର୍ମେନ୍ଦ୍ରଙ୍କୁ ସମ୍ବଲପୁରରୁ ପ୍ରାର୍ଥୀ କରିବାକୁ ଘୋଷଣା କରିଛି । ପଟେ ବିଜେଡି ମଧ୍ୟ ପ୍ରଣବଙ୍କ ନାଁକୁ ଚୂଡ଼ାନ୍ତ କରିସାରିଛି । ପ୍ରାୟ ବର୍ଷେ ହେବ ସୋସିଆଲ ମିଡିଆରେ ଲଢୁଥିବା ଦୁଇ ନେତା ଭୋଟ ମଇଦାନରେ ସମ୍ମୁଖ ଲଢ଼େଇକୁ ଓହ୍ଲାଇବେ ।
କେନ୍ଦ୍ରମନ୍ତ୍ରୀ ଶ୍ରୀ ପ୍ରଧାନ ସମ୍ବଲପୁରକୁ ଗତ ୬ ମାସ ହେବ ଫୋକସ୍ କରି ଆସୁଛନ୍ତି । ସେ ବାରମ୍ବାର ସମ୍ବଲପୁର ଗସ୍ତ କରିବା ସହ ତୃଣମୂଳସ୍ତରରେ ସଂଗଠନକୁ ମଧ୍ୟ ମଜଭୂତ କରିବାରେ ଲାଗିଛନ୍ତି । ସମ୍ବଲପୁର ଲୋକସଭା ଅନ୍ତର୍ଗତ ବିଧାନସଭା ଆସନ ଅଞ୍ଚଳରେ ତାଙ୍କର ରାଜନୈତିକ କାର୍ଯ୍ୟକ୍ରମ ମଧ୍ୟ ଜୋର୍ ଧରିଛି । ଶ୍ରୀ ପ୍ରଧାନ ସମ୍ବଲପୁରରୁ ସାଂସଦ ପ୍ରାର୍ଥୀ ହେବା ନେଇ ଇସାରା ମିଳୁଥିଲା । ଆଜି ସନ୍ଧ୍ୟାରେ ବିଜେପି ପକ୍ଷରୁ ବିଧିବଦ୍ଧ ଭାବେ ଧର୍ମେନ୍ଦ୍ରଙ୍କ ନାଁ ଘୋଷଣା କରାଯାଇଛି ।
ଧର୍ମେନ୍ଦ୍ରଙ୍କ ବିରୋଧରେ ବିଜୁ ଜନତା ଦଳ ପ୍ରଣବ ପ୍ରକାଶଙ୍କୁ ଅବତୀର୍ଣ୍ଣ କରାଇବ ବୋଲି ଗତ ୩ ମାସ ହେବ ଚର୍ଚ୍ଚା ହେଉଥିଲା । ସମ୍ବଲପୁର ଜିଲ୍ଲା ପର୍ଯ୍ୟବେକ୍ଷକ ଦାୟିତ୍ୱରେ ଥିବା ପ୍ରଣବ ଗତ କିଛି ମାସ ହେବ ସମ୍ବଲପୁର ଅଞ୍ଚଳରେ ସକ୍ରିୟ ଭାବେ ବୁଲାବୁଲି ଆରମ୍ଭ କରି ଦେଇଥିଲେ । ଏପରିକି ସମ୍ବଲପୁର ସଂସଦୀୟ କ୍ଷେତ୍ର ଅନ୍ତର୍ଗତ ସମସ୍ତ ବିଧାନସଭା ଅଞ୍ଚଳକୁ ଗସ୍ତ କରି ବୈଠକ ମଧ୍ୟ କରିଛନ୍ତି । ଦଳୀୟ ନେତାଙ୍କୁ ଧରି ଘନଘନ ମନ୍ତ୍ରଣା ମଧ୍ୟ କରୁଛନ୍ତି । ରବିବାର ନବୀନ ନିବାସରେ ସମ୍ବଲପୁର ଲୋକସଭା ଆସନ ନେଇ ସମୀକ୍ଷା ବୈଠକ ବସିଥିଲା । ପ୍ରଣବଙ୍କୁ ସାଂସଦ ପ୍ରାର୍ଥୀ କରିବା ପ୍ରସ୍ତାବରେ ନବୀନ ମୋହର ମାରିଥିବା ସୂଚନା ମିଳିଛି । ଏପରିକି ପ୍ରଣବଙ୍କ ବିଜୟ ପାଇଁ ଏ ଲୋକସଭାର ଦଳୀୟ ନେତାମାନେ କଠିନ ପରିଶ୍ରମ କରିବାକୁ ବିଜେଡି ସୁପ୍ରିମୋ ନିର୍ଦ୍ଦେଶ ଦେଇଛନ୍ତି ।
୨୦୧୯ ନିର୍ବାଚନରେ ଏହି ଆସନ ବିଜେପି ଖାତାକୁ ଯାଇଥିଲା । ବିଜେପିର ନୀତେଶ ଗଙ୍ଗଦେବ ୪ ଲକ୍ଷ ୭୩ ହଜାର ୭୭୦ ଭୋଟ ପାଇ ସାଂସଦ ଭାବେ ପାର୍ଲାମେଣ୍ଟକୁ ଯାଇଥିଲେ । ବିଜେଡି ପ୍ରାର୍ଥୀ ନଳିନୀକାନ୍ତ ପ୍ରଧାନ ପ୍ରାୟ ୯ ହଜାର ଭୋଟ ବ୍ୟବଧାନ(୪ ଲକ୍ଷ ୬୪ ହଜାର, ୬୦୮ ଭୋଟ)ରେ ପରାଜୟ ବରଣ କରିଥିଲେ । କଂଗ୍ରେସ ପ୍ରାର୍ଥୀ ତଥା ଏବେର ପିସିସି ସଭାପତି ଶରତ ପଟ୍ଟନାୟକଙ୍କ ସପକ୍ଷରେ ପଡ଼ିଥିଲା ୧ ଲକ୍ଷ ୩୫ ହଜାର ଭୋଟ । ସମ୍ବଲପୁର ଜିଲ୍ଲାର ରେଢ଼ାଖୋଲ, କୁଚିଣ୍ଡା ସହ ଅନୁଗୁଳ ଜିଲ୍ଲାର ଛେଣ୍ଡିପଦା ଓ ଆଠମଲ୍ଲିକ ବିଧାନସଭା ସିଟ୍ ବିଜେଡି ଦଖଲକୁ ଆସିଥିଲା । ସମ୍ବଲପୁର, ରେଙ୍ଗାଳି ଓ ଦେବଗଡ଼ ବିଧାନସଭା ବିଜେପି ନିଜ ଅକ୍ତିଆରକୁ ନେବାରେ ସକ୍ଷମ ହୋଇଥିଲା ।
୭ଟି ବିଧାନସଭା କ୍ଷେତ୍ରରୁ ୪ଟିରେ ନୀତେଶ ବିଜେଡିଠାରୁ ଅଧିକ ଭୋଟ୍ ପାଇଥିଲେ । ସମ୍ବଲପୁରରେ ୩୫,୧୫୮ ଭୋଟ୍, ରେଙ୍ଗାଳିରେ ୧୭,୬୨୯, ଦେବଗଡ଼ରେ ୧୫,୯୨୨ ଓ କୁଚିଣ୍ଡାରେ ୮,୮୩୬ ଅଧିକ ଭୋଟ୍ ହାସଲ କରି ବିଜୟୀ ହୋଇଥିଲେ । କିନ୍ତୁ ଆଠମଲ୍ଲିକରେ ୫୧,୬୪୪ ଭୋଟ୍, ଛେଣ୍ଡିପଦାରେ ୧୪,୫୪୯ ଓ ରେଢ଼ାଖୋଲରେ ୪୦୩୩ ଭୋଟ୍ ବ୍ୟବଧାନରେ ବିଜେଡିଠାରୁ ପଛେଇ ଯାଇଥିଲେ । ପ୍ରଧାନମନ୍ତ୍ରୀ ନରେନ୍ଦ୍ର ମୋଦି ଫେବ୍ରୁଆରୀ ପ୍ରଥମ ସପ୍ତାହରେ ସମ୍ବଲପୁର ଗସ୍ତରେ ଆସି ଆଇଆଇଏମର ସ୍ଥାୟୀ କ୍ୟାମ୍ପସ୍ ଲୋକାର୍ପଣ କରିବା ସହ ଏ ଅଞ୍ଚଳ ପାଇଁ ୬୮ ହଜାର କୋଟି ଟଙ୍କାର ପ୍ରକଳ୍ପ ଭେଟି ଦେଇଥିଲେ । ଏକ ଦଳୀୟ ସମାବେଶରେ ସାମିଲ ହୋଇ ପ୍ରଧାନମନ୍ତ୍ରୀ ବିଜେପି ବିକାଶ ପାଇଁ ନେଇଥିବା ଯୋଜନା ଓ କାର୍ଯ୍ୟକ୍ରମର ଟିକିନିଖି ହିସାବ ଦେଇଥିଲେ । ମୋଦିଙ୍କ ସମ୍ବଲପୁର ଗସ୍ତର ସପ୍ତାହକ ପୂର୍ବରୁ ମୁଖ୍ୟମନ୍ତ୍ରୀ ନବୀନ ପଟ୍ଟନାୟକ ବହୁ ପ୍ରତିକ୍ଷୀତ ସମଲେଇ ପ୍ରକଳ୍ପର ଲୋକାର୍ପଣ କରିଥିଲେ । ଚଳିତ ମାସ ପ୍ରଥମ ସପ୍ତାହରେ ସମ୍ବଲପୁର ଓ ବରଗଡ଼ ଜିଲ୍ଲା ପାଇଁ ମୁଖ୍ୟମନ୍ତ୍ରୀ ୬୩୦ କୋଟି ଟଙ୍କାର ପ୍ରକଳ୍ପକୁ ମଧ୍ୟ ଅନୁମୋଦନ କରିଛନ୍ତି ।
ପଶ୍ଚିମ ଓଡ଼ିଶାର ସମ୍ବଲପୁର ହେଉଛି ଏକ ସମ୍ମାନଜନକ ଆସନ । ବିଜେଡି ଓ ବିଜେପି ଏଠାରେ କେହି କାହାକୁ ବାଟ ଛାଡ଼ିବେନି । ଏ ଆସନରେ ବିଜୟ ବାନା ଉଡ଼ାଇବାକୁ ଏଠାରେ ଧର୍ମେନ୍ଦ୍ର ଓ ପ୍ରଣବଙ୍କ ମଧ୍ୟରେ ହେବ କଡ଼ା ଟକ୍କର । ଏହି ହାଇ ଭୋଲଟେଜ୍ ଲଢ଼େଇ ଉପରେ କେନ୍ଦ୍ରୀଭୂତ ହେବ ସାରା ରାଜ୍ୟର ନଜର ।