ନୂଆଦିଲ୍ଲୀ,୧୨।୯: ଉତ୍ତରାଖଣ୍ଡର ମଦ୍ରାସାରେ ପଢାଯିବ ସଂସ୍କୃତ। ଉତ୍ତରାଖଣ୍ଡର ବୋର୍ଡ ଅଧ୍ୟକ୍ଷ ଶାଦାବ ଶମସ୍‌ ଏନେଈ ସୂଚନା ଦେଇଛନ୍ତି।  ସେ କହିଛନ୍ତି, ଉତ୍ତରାଖଣ୍ଡର ମଦ୍ରାସାରେ ଏବେ ସଂସ୍କୃତରେ ଶିକ୍ଷା ଦିଆଯିବ। ମଦ୍ରାସାରେ ଏନ୍‌ସିଇଆରଟିର ପାଠ୍ୟକ୍ରମ ଲାଗୁ ହେବାକୁ ଯାଉଛି। ଏଥିରେ ଅନ୍ୟ ବିଷୟ ସହିତ ସଂସ୍କୃତ ଶିକ୍ଷା ମଧ୍ୟ ଦିଆଯିବ। ବୋର୍ଡ ଅଧ୍ୟକ୍ଷ କହିଛନ୍ତି,ଯଦି ଦେବଭୂମି ଉତ୍ତରାଖଣ୍ଡରେ ସଂସ୍କୃତ ପଢାଯିବନି, ତେବେ କେଉଁଠି ପଢାଯିବ ? ମୁସଲମାନ ସମାଜର ଲୋକ ମଧ୍ୟ ମଦ୍ରାସାରେ ଅପଗ୍ରେଡ ଚାହାନ୍ତି, ସେମାନେ ଏହି ପରିବର୍ତ୍ତନ ଦ୍ବାରା ଖୁବ୍ ଖୁସି ଅଛନ୍ତି।

 ଉଲ୍ଲେଖନୀୟ ଯେ, ଉତ୍ତରାଖଣ୍ଡ ମଦ୍ରାସାରେ ସଂସ୍କୃତି ପଢାଯିବାର ଦାବି ୬ ବର୍ଷ ପୂର୍ବେ ମଦ୍ରସା ଓ୍ବେଲଫେୟାର ସୋସାଇଟି(ଏମ୍‌ଡବ୍ଲୁଏସ୍‌) ଉଠାଇଥିଲା। ଏମ୍‌ଡବ୍ଲୁଏସ୍‌ର ସଦସ୍ୟ ତତ୍କାଳୀନ ମୁଖ୍ୟମନ୍ତ୍ରୀ ତ୍ରିଭେନ୍ଦ୍ର ସିଂହ ରାଓ୍ବତଙ୍କୁ ଚିଠି ଲେଖି ଏହାର ଦାବି କରିଥିଲେ। ସୋସାଇଟିର ପୂର୍ବତନ ମୁଖ୍ୟମନ୍ତ୍ରୀଙ୍କୁ ଚିଠି ଲେଖି ଅପିଲ କରିଥିଲେ ଯେ, ରାଜ୍ୟର ମଦ୍ରାସାରୁ ସଂସ୍କୃତ ଶିକ୍ଷକମାନେ ମଧ୍ୟ ଯାଆନ୍ତୁ, ଯାହାଫଳରେ ସିଲାବସ୍‌ରେ ସଂସ୍କୃତିକୁ ଯୋଡା ଯାଇ ହେବ, କିନ୍ତୁ ଏହାକୁ ଅବ୍ୟବହାରିକ ବୋଲି କହି ତ୍ରିଭେନ୍ଦ୍ର ସିଂହ ରାଓ୍ବତ ମଦ୍ରାସାରେ ସଂସ୍କୃତ ପଢିବାକୁ ମନା କରିଦେଇଥିଲେ।

ଏକ ରିପୋର୍ଟ ଅନୁସାରେ, ୨୦୧୭ରେ ଉତ୍ତରାଖଣ୍ଡର ୨୦୭ ମଦ୍ରାସାରେ ସଂସ୍କୃତ ପଢାଇବାର ଦାବି କରିଥିଲେ। ତେବେ ଉତ୍ତରାଖଣ୍ଡ ଓ୍ବାକଫ୍ ବୋର୍ଡ ଅଧ୍ୟକ୍ଷ ଶାଦାବ ଶମ୍ସ ବର୍ତ୍ତମାନ ମୋଟ ୧୧୭ ମଦ୍ରାସାରେ ସଂସ୍କୃତ ପଢାଯିବାର ଘୋଷଣା କରିଛନ୍ତି। ସେ ସଂସ୍କୃତରେ ପିଏଚ୍‌ଡି କରିସାରିଥିବା ମୁସଲମାନ ଝିଅ ରଜିଆ ସୁଲତାନାଙ୍କ ଉଦାହରଣ ଦେଇଛନ୍ତି। ଏହା ସହିତ କହିଛନ୍ତି ସେ ଏବେ ସଂସ୍କୃତରେ କୋରାନ ଅନୁବାଦ କରୁଛନ୍ତି। ରଜିଆଙ୍କୁ ଓ୍ବାକଫ୍ ବୋର୍ଡର ରାଜ୍ୟ ସ୍ତରୀୟ ଶିକ୍ଷା ସମିତିରେ ସଦସ୍ୟ କରିବା କଥା କୁହାଯାଇଛି।