ବ୍ରହ୍ମପୁର, ୦୭/୧୧: ମୁଖ୍ୟ ବିଚାର ବିଭାଗୀୟ ମାଜିଷ୍ଟ୍ରେଟ ସନ୍ଦୀପ ମହାନ୍ତିଙ୍କ କୋର୍ଟରେ ଚେକ୍‌ ବାଉନ୍ସ ମାମଲାର ଅଭିଯୁକ୍ତଙ୍କ ତରଫରୁ ସଫେଇ ସାକ୍ଷୀ ପାଇଁ ଦିନ ଧାର୍ଯ୍ୟ ହୋଇଥିଲା । ଏହି ମାମଲାରେ ଜଡିତ ଥିବା ସି-ସୋର ଚିଟ୍‌ଫଣ୍ଡ  ସଂସ୍ଥାର ମାଲିକ ପ୍ରଶାନ୍ତ ଦାଶଙ୍କୁ ସୋମବାର କଡ଼ା ସୁରକ୍ଷାରେ ଅଣାଯାଇ କୋର୍ଟରେ ହାଜର କରାଯାଇଥିଲା । ସେ ନିଜ ସଫେଇରେ ଏନେଇ କିଛି ଜାଣିନଥିବା ସଫେଇ ଦେଇଛନ୍ତି । 

ମାମଲାର  ବିବରଣୀରୁ ପ୍ରକାଶ ଯେ, ସି-ସୋର ଚିଟ୍‌ଫଣ୍ଡ୍‌  ସଂସ୍ଥା ଗଞ୍ଜାମର ବିଭିନ୍ନ ସ୍ଥାନରେ ତାର ଶାଖା  ଖୋଲିଥିବା ବେଳେ ବ୍ରହ୍ମପୁରରେ ମଧ୍ୟ ଶାଖା  ଖୋଲିଥିଲା । ୨୦୧୧-୧୨ ମସିହାରେ ସଂସ୍ଥା  ପକ୍ଷରୁ ଜମାକାରୀଙ୍କୁ କମ ସମୟରେ ମୂଳ ଟଙ୍କାର  ଦୁଇଗୁଣା ଟଙ୍କାର ଏକ ପ୍ଲଟ ଭୁବନେଶ୍ୱରରେ  ଦିଆଯିବ ବୋଲି ପ୍ରତିଶ୍ରୁତି ଦିଆଯାଇଥିଲା । ଅନେଇ ଜମାକାରୀ ଉକ୍ତ ଚିଟ୍‌ଫଣ୍ଡ୍‌ କମ୍ପାନୀରେ ଟଙ୍କା ଜମା କରିଥିଲେ। ଗୋଷଣୀନୂଆଗାଁର  ଶୁଭାସିନୀ ସାହୁ ମଧ୍ୟ ଉକ୍ତ ସଂସ୍ଥାରେ ଟଙ୍କା ଜମା କରିଥିଲେ । ନିର୍ଦ୍ଧାରିତ ସମୟରେ ସେ ଟଙ୍କା ଫେରସ୍ତ ପାଇ ପାରିନଥିଲେ କି ପ୍ଲଟ୍‌ ପାଇ  ପାରିନଥିଲେ । ବାରମ୍ବାର କାର୍ଯ୍ୟାଳୟକୁ ଦୌଡ଼ିବା ପରେ ୫ଲକ୍ଷ ଟଙ୍କାର ଦୁଇଟି ଚେକ ସଂସ୍ଥା ପକ୍ଷରୁ  ତାଙ୍କୁ ପ୍ରଦାନ କରାଯାଇଥିଲା । ସେ ଉକ୍ତ ଚେକ ଦୁଇଟି ବ୍ୟାଙ୍କରେ ଜମା କରିବା ପରେ ତାହା  ବାଉନ୍ସ ହୋଇଯାଇଥିଲା । ସେ କୋର୍ଟରେ ୨୦୧୨- ୧୩ ମସିହାରେ ଉକ୍ତ ସଂସ୍ଥାର ମୁଖିଆ ପ୍ରଶାନ୍ତ  ଦାସଙ୍କ ବିରୋଧରେ ମାମଲା ରୁଜୁ କରିଥିଲେ ।