ନୂଆଦିଲ୍ଲୀ: ପୂର୍ବତନ ଟେନିସ୍ ଷ୍ଟାର ସେରେନା ଓ୍ବିଲିୟମ୍ସ ପୁଣି ଥରେ ଚର୍ଚ୍ଚାକୁ ଆସିଛନ୍ତି । ଚଳିତ ପ୍ୟାରିସ୍ ଅଲିମ୍ପିକ୍ସର ଉଦଘାଟନୀ ସମାରୋରରେ ମଶାଲ ଧରିଥିବା (ଟର୍ଚ୍ଚ ବିଏରର) ସେରେନା ଓ୍ବିଲିୟମ୍ସ ଏକ ରେଷ୍ଟୁରାଣ୍ଟ ଉପରେ ଖୁବ ବର୍ଷିଛନ୍ତି । ପ୍ୟାରିସର ଏକ ରେଷ୍ଟୁରାଣ୍ଟ ତାଙ୍କୁ ଏବଂ ତାଙ୍କ ପିଲାଙ୍କୁ ଛାତରେ ଟେବୁଲ ଦେବାକୁ ମନା କରିଦେଇଥିଲା । ସେରେନା ଓ୍ବିଲିୟମ୍ସ ଏକ୍ସରେ ଲେଖିଛନ୍ତି ଯେ, ‘ପ୍ୟାରିସ୍ର ପେନିନସୁଲା ହୋଟେଲ ମୋତେ ଓ ମୋର ଦୁଇ ପିଲା ଆଲେକ୍ସିଜ୍ ଅଲିମ୍ପିୟା ଜୁନିୟର (୬ ବର୍ଷ) ଏବଂ ଆଣ୍ଡିରା ରିଭର(୧୧ ମାସ)ଙ୍କୁ ‘ରୁଫଟପ୍’ ଟେବୁଲ ଦେବାକୁ ମନା କଲା ।’
ସେରେନା ଓ୍ବିଲିୟମ୍ସଙ୍କ ଏହି ଟ୍ବିଟରେ ପେନିନ୍ସୁଲା ହୋଟେଲ ତୁରନ୍ତ ପ୍ରତିକ୍ରିୟା ଦେଇଛି । ଅଲିମ୍ପିକରେ ୪ ଥର ସ୍ବର୍ଣ୍ଣ ପଦକ ବିଜେତା ୪୨ ବର୍ଷୀୟା ସେରେନା ଓ୍ବିଲିୟମ୍ସଙ୍କୁ କ୍ଷମା ମାଗିଛନ୍ତି ହୋଟେଲ କର୍ତ୍ତୃପକ୍ଷ । ହୋଟେଲ ପକ୍ଷରୁ କୁହାଯାଇଛି ଯେ, ‘ଆପଣ ଗତକାଲି ରାତିରେ ଆସିଥିଲେ । କିନ୍ତୁ ଦୁରଭାଗ୍ୟବଶତଃ ଆମର ରୁଫଟପ୍ ବାର ସମ୍ପୂର୍ଣ୍ଣ ବୁକ୍ ହୋଇସାରିଥିଲା । ଅନ୍ୟ ଏକ ଟ୍ବିଟରେ ହୋଟେଲ କାର୍ତ୍ତୃପକ୍ଷ ସେରେନା ଓ୍ବିଲିୟମ୍ସଙ୍କ ଉପଲବ୍ଧିକୁ ସମ୍ମାନ ଜଣାଇବା ସହ ପୁଣି ଥରେ ହୋଟେଲ ଆସିବାକୁ ଅନୁରୋଧ କରିଛନ୍ତି ।
ସେରେନା ଓ୍ବିଲିୟମ୍ସ ଅଲିମ୍ପିକ ପାଇଁ ଏବେ ପ୍ୟାରିସରେ ଅଛନ୍ତି । ସେ ଜୁଲାଇ ୨୬ରେ ଆୟୋଜିତ ଅଲିମ୍ପିକ୍ର ଉଦଘାଟନୀ ସମାରୋହରେ ଅନ୍ୟ ଆଥଲେଟଙ୍କ ସହ ମଶାଲ ଧରିଥିଲେ । ସେବେଠାରୁ ୨୩ ଥର ଗ୍ରାଣ୍ଡସ୍ଲାମ ବିଜୟୀ ସେରେନା ଓ୍ବିଲିୟମ୍ସ ଅଲିମ୍ପିକର ବିଭିନ୍ନ ଇଭେଣ୍ଟରେ ନଜର ଆସିଛନ୍ତି । ନୋଭାକ ଜୋକୋଭିକ, କାର୍ଲୋସ୍ ଆଲକାରାଜଙ୍କୁ ହରାଇ ସ୍ବର୍ଣ୍ଣ ଜିତିଥିବା ପୁରୁଷ ଏକକ ଟୁର୍ଣ୍ଣାମେଣ୍ଟ ଦେଖିଥିଲେ ସେରେନା ଓ୍ବିଲିୟମ୍ସ ।
